Courtesy Jamie Christiani/Bulletin of the Atomic Scientists
TETAP MA MARJAGA-JAGA!
Nungnga Naeng tu Tonga Borngin be Jarum Jam Kiamat
Di tanggal 27 Januari 2026, dibahen akka ilmuwan ma jarum penunjuk menit di Jam Kiamata lam jonok tu waktu na patuduhon tonga borngin. Tonga borngin lapatanna, i ma kiamat na mambahen hancur tano on dohot sude isina.
“Dibahen akka ilmuwan dohot pakar internasional di Bulletin of the Atomic Scientists ma jarum Jam Kiamat lam jonok tu waktu na patuduhon tonga borngin. Saonari gabe 85 detik nai ma tu tonga borngin. Berarti nga lao hancur be portibi on.”—Bulletin of the Atomic Scientists.
“Nga takkas be aha na dipatudu Jam Kiamat i. Nungnga lam parah keadaan ni portibi on, dang tolap be jolma pasaehon akka masalah, jala dang adong na boi pasohon situasi on. Jadi ikkon muba do jolma. Boi do on taulahon. Alai ikkon tapaksa do tong akka pamimpin asa hatop bertindak.”—Alexandra Bell, presiden dohot CEO Bulletin of the Atomic Scientists.
Toho do nga naeng hancur be tano on dohot akka jolma? Porlu do hamu mabiar mamikkirhon na lao masa di ari na naeng ro? Aha do na didok Bibel taringot i?
Na lao masa di ari na naeng ro
Bibel mandok, “hot do anggo tano on saleleng ni lelengna” jala “mangolu ma [akka jolma] disi saleleng ni lelengna”. (Parjamita 1:4; Psalmen 37:29) Jadi dang na lao hancur manang gabe dang boi be diingani tano on dibahen jolma.
Memang didok Bibel “na lao salpu nama portibi on”.—1 Johannes 2:17.
Aha do lapatan ni na didok Bibel i? Asa diboto hamu alusna, jaha ma artikel “Tutu do Naeng Kiamat Portibi on? Tutu do Adong Dipaboa di Bibel na Lao Dihancurhon Sude Portibi on?”
Asa diboto hamu na didok Bibel taringot akka na lao masa di ari na naeng ro, jaha ma artikel “Andigan do Marujung Portibi on?”
Toktong ma marpikkiran positif
Nang pe godang masalah di portibi on saonari, boi do Bibel mangurupi hita asa toktong marpikkiran positif. Boha carana?
Adong do di Bibel akka nasehat na bermanfaat tu hita. (2 Timoteus 3:16, 17) Misalna asa diboto hamu boha carana Bibel boi mangurupi hamu toktong marpikkiran positif, jaha ma artikel “Cara Asa Unang Terlalu Khawatir”.
Adong do disurat di Bibel janji ni Debata na mandok na lao denggan do ngolutta di ari na naeng ro. (Rom 15:4) Jala nungnga dipaboa Bibel hian aha na lao masa di jamanta saonari dohot di ari na naeng ro. Jadi dang porlu hita mabiar mangadopi akka na lao masa di portibi on.
Asa lam godang dapotmuna manfaat sian akka nasehat na adong di Bibel, las rohanami manjujui hamu asa dohot marsiajar Bibel gratis.
a “Jam Kiamat, i ma jam na dibahen lao patuduhon sadia jonok hita tu kehancuran ni portibi on alani akka teknologi na berbahaya na tabahen. Jam Kiamat on paingotton hita, ikkon tapasae do akka masalah na adong di portibi on jala ikkon talului do cara molo naeng toktong hita mangolu di tano on.”—Bulletin of the Atomic Scientists.