Sahalak bawa na poso berupaya naeng manarik hata naung sanga didok

SUKKUN-SUKKUN NI AKKA NA POSO

Boasa Jotjot Sala Hatakku?

“Sipata boi do hujaga asa unang asal hupandok hatakku. Alai sipata olo do asal hupandok hatakku dang jolo hupikkiri!”—Si James.

“Molo lagi suntuk pikkiranku, olo do asal hupandok hatakku. Alai tikki las rohakku, gabe pagodangku do au makkatai. Jadi boi ma didok, jotjot do sala hatakku.”—Si Marie.

Didok di Bibel, “Songon api do dila i.” Jala “harangan na bidang, boi do i tartutung bahenon ni api na gelleng”. (Jakobus 3:5, 6) Jotjot do gabe adong masalah na dibahen ho ala sala hata na didok ho? Molo ido, artikel on boi do mangurupi ho.

Boasa boi sala hatakku?

Ala dang sempurna. Didok di Bibel, “Sude do hita jotjot sala. Molo adong halak na so hea sala di pakkataion, halak na sempurna do i.” (Jakobus 3:2, surat na di toru) Ala dang sempurna, dang holan tikki mardalan hita hea tartuktuk, alai tikki makkatai pe olo do hita tartuktuk. Lapatanna, olo do sala hata na tadok.

“Ala dang sempurna otak dohot babakku, gabe jotjot do asal hupandok hatakku.”—Si Anna.

Pagodangku makkatai. Didok di Bibel, “Molo pagodanghu hata, pasti do adong na sala.” (Poda 10:19) Halak na pagodangku makkatai jala dang olo manangihon halak na asing, jotjot do mambahen haccit roha ni halak na asing.

“Halak na malo, dang sai godang makkatai. Contohna Jesus. Ibana ma halak na ummalo di portibi on. Alai adong do tikkina dang makkatai Jesus.”—Si Julia.

Hata gait-gait alai mambahen haccit roha ni na asing. Didok di Bibel, “Dos songon podang na manikkam do akka hata na asal dipandok.” (Poda 12:18) Sada contoh ni hata na so jolo manat dipikkirhon i ma, hata gait-gait na mambahen haccit roha ni na asing. Olo do ra didok sasahalak, “Na margait-gait do au.” Hape sebenarna hata gait-gaitna i nungnga mambahen halak gabe maila. Didok di Bibel, ikkon tabolokkon do “akka hata na mangaleai na mambahen haccit roha ni na asing”.—Epesus 4:31.

“Jotjot do au mandok akka hata na lucu. Alai jotjot do hata na hudok i gabe hira na mangaleai halak na asing. Alani i gabe jotjot ma hubahen masalah.”—Si Oksana.

Sahalak bawa na poso na berupaya lao pamasukkon odol naung kaluar asa masuk muse tu bagasan — Songon isi ni odol naung kaluar, hata naung sanga tadok dang boi be tatarik muse

Jolo pikkirhon ma hata na lao sidokkononmu

Memang maol do mangulahon i, alai boi do Bibel mangurupi ho. Parrohahon ma piga-piga nasehat on.

“Pikkiri ma i di roham . . . jala toktong ma ho hohom.”—Psalmen 4:4.

Sipata denggan do molo sip hita. Sahalak anak boru na margoar si Laura mandok, “Ra dang sarupa perasaanta tikki muruk dohot perasaanta tikki dang muruk. Las do rohakku ala dang asal hupandok hatakku tikki muruk.” Jadi molo sip hita, gabe dang asal tapandok hatatta.

“Pinggol do na mamboto denggan manang na dang begeon sada hata songon dila na mandai sipanganon.”—Job 12:11.

Asa unang menyesal ho di pudian ni ari, sebelum makkatai coba ma pikkirhon akka sukkun-sukkun on:

Tutu do hata na hudok i? Denggan do i? Adong do guna ni i?—Rom 14:19.
Boha do perasaanku molo adong na mandok songon i tu au?—Mateus 7:12.
Huargai do pandangan ni halak na asing?—Rom 12:10.
Saonari do tikki na pas lao mandok hatakku?—Parjamita 3:7.

“Toruk ma rohamuna, jala sangap ma bahen tu na asing.”—Pilippi 2:3.

Nasehat on boi do mangurupi ho asa berpandangan positif tu halak na asing jala mangurupi ho asa unang asal dipandok ho hatam. Alai boha do molo nga sanga adong hatam na mambahen haccit roha ni na asing? Patudu ma serep ni roha, jala pittor hatop ma ho minta maap. (Mateus 5:23, 24) Jala bertekad ma ho asa jolo marpikkir sebelum didok ho hatam.

Na didok akka donganmu

“Tikki makkata-hatai dohot dongan, jotjot do dang sengaja au mandok hata na sala. Hape molo hupaima holan sappulu detik pe, boi do jolo hupikkiri aha pengaruh ni hatakku tu halak na asing. Jala boi do jolo hupikkiri adong do manang na dang guna ni hatakki tu halak na asing. Alani i, gabe boi ma jolo hupikkiri aha hata na lao hudok.”—Si Taylor.

“Molo adong hata ni sasahalak na mambahen sogo rohatta, tumagon do jolo tapikkirhon boasa didok ibana songon i. Alana, jotjot do sasahalak asal dipandok hatana dang jolo dipikkiri. Alani i, unang pola pamasuk i tu roham. Alai sipata, hata na didok rohatta sala, olo do sittong. Jadi tikki masa sisongon i, penting do ikkon tenang hita jala denggan makkatai.”—Si Brandon.

“Asa unang tabahen haccit roha ni halak na asing, unang ma marpikkiran negatif hita. Cara pandangta tu na asing do na ikkon tapadenggan. Molo taulahon songon i, dang gabe tadok be akka hata na mambahen haccit roha ni na asing.”—Si Jessica.