SUKKUN-SUKKUN NI AKKA NA POSO
NUNGNGA RADE AU PINDA SIAN JABU JALA HIDUP MANDIRI?
Ra, tabo do didok roham molo hidup mandiri manang dang rap tinggal be ho dohot natua-tuam. Alai boi do i mambahen ho mabiar. Jadi songon dia do caram lao mamboto naung rade ho hidup mandiri?
Pikkirhon ma alasanna
Godang do alasan ni akka na poso boasa dang olo be nasida rap tinggal dohot natua-tuana. Alai adong do alasan na hurang denggan. Misalna, sahalak doli-doli na margoar si Mario mandok, “Naeng pinda pe au sian jabu ni natua-tuakku, asa bebas do au sian tanggung jawab di jabu.”
Sebenarna, dang gabe bebas ho molo dang rap tinggal be dohot natua-tuam. Si Onya na marumur 18 taon mandok, “Molo pinda ho sian jabu ni natua-tuam, ho sandiri do na ikkon paiasson jabu, mangaloppa, dohot mambayar akka tagihan. Dang boi be diurupi natua-tuam ho lao mangulahon i!”
Intina: Asa diboto ho naung rade do ho manang na dang hidup mandiri, ikkon takkas do diboto ho alasanna boasa naeng pinda ho.
Etong ma biayana
Didok Jesus, “Molo adong sian hamu na naeng pajongjokkon sada menara, pasti ikkon jolo hundul do ibana mangetong sadia godang hepeng na lao sipakaluaronna. Sian i botoonna ma cukkup do hepengna pajongjokkon menara i manang na dang.” (Lukas 14:28) Songon dia do hita boi mangetong biayana? Parrohahon ma on.
Didok di Bibel, ‘Parlinggoman do hepeng.’—Parjamita 7:12.
Maol do dihilala ho manabung hepengmu?
Boros do ho marhepeng?
Jotjot do ho maminjam hepeng?
Molo adong sada sian sukkun-sukkun na di ginjang i alusna ido, olo do ra adong masalah na balga na lao dihadapi ho molo hidup mandiri!
“Tikki marumur 19 taon ma abangku pinda sian jabu. Holan di bagasan sataon dope, nga habis tabunganna, jala mobilna pe ditarik bank. Alani i, gabe dang olo be bank mangalehon pinjaman tu ibana. Ujungna, dipangido ibana ma asa mulak muse tu jabu.”—Si Danielle.
Na boi diulahon ho saonari: Sukkun ma tu natua-tuam sadia do pengeluaran ni nasida sabulan lao manuhor akka kebutuhan sehari-hari. Akka aha do tagihan na ikkon dibayar? Songon dia do carana asa boi cukkup penghasilan ni nasida lao mambayar tagihan? Aha do na diulahon nasida asa boi manabung?
Intina: Dang mura mangatur parhepengon. Jadi, marsiajar ma ho mangatur parhepengonmu saleleng rap tinggal dope ho dohot natua-tuam. Molo nga hidup mandiri ho annon, gabe boi ma diboto ho mangatur parhepengonmu.
Didok di Bibel, “Ganup do halak martanggung jawab tu na diulahon ibana.”—Galatia 6:5.
Jotjot do dang pittor dikarejohon ho karejom?
Ikkon jolo disuru natua-tuam do ho paiasson jabu?
Jotjot do dilanggar ho aturan na dibahen taringot jam piga ikkon mulak tu jabu?
Molo adong sada sian sukkun-sukkun na di ginjang i alusna ido, ra gabe maol ma annon ho martanggung jawab molo hidup mandiri.
“Molo dang rap tinggal be hita dohot natua-tuatta, ikkon hita sandiri do na makkarejohon sude nang pe dang lomo rohatta mangulahon i. Ala dang adong be na paingotton hita, jadi ikkon denggan do taatur tikkitta lao mangulahon i sude.”—Si Jessica.
Na boi diulahon ho saonari: Di bagasan sabulan, marsiajar ma ho lao makkarejohon akka ulaon di jabu. Contohna, coba ma holan sahalakmu na paiasson jabu, manussi bajum sandiri, belanja, mangaloppa, dohot manussi piring. Molo boi diulahon ho i, gabe boi ma diboto ho songon dia annon molo hidup mandiri ho.
Intina: Molo naeng mandiri ho, marsiajar ma ho asa gabe halak na martanggung jawab.
Naeng hidup mandiri alai dang adong persiapan, sarupa ma i songon na terjun sian pesawat alai dang diboto songon dia cara mamakke parasut
Didok di Bibel, “Pasiding hamu ma rimas, muruk, hajahaton, hata na mangaleai.”—Kolosse 3:8.
Jotjot do ho bermasalah dohot halak na asing?
Mura-mura do ho muruk?
Sai dipaksa ho do halak na asing ikkon mangihutton pandapotmu?
Molo adong sada sian sukkun-sukkun na di ginjang i alusna ido, olo do ra gabe susa dihilala ho annon molo hidup mandiri manang molo nungnga menikah.
“Tikki rap sajabu au dohot halak na asing, gabe huboto ma aha hahurangakku. Jala huboto ma muse, dang boi hupaksa halak na asing asa toktong sabar menghadapi au tikki muruk au ala stres. Ikkon hulului do songon dia carana mangatasi stres.”—Si Helena.
Na boi diulahon ho saonari: Sian saonari, marsiajar ma ho asa toktong mardame dohot natua-tuam, kakak, ito, manang adekmu. Molo hahurangan ni keluargam sandiri pe dang boi diterima ho, apalagi ma hahurangan ni halak na asing.
Intina: Molo hidup mandiri ho, dang berarti gabe lomo-lomom. Porlu do pelatihan dohot persiapan. Coba ma sukkun tu akka halak naung hidup mandiri. Sukkun ma tu nasida, aut sugari boi waktu diputar, aha do na naeng dipadenggan nasida? Sebenarna manang aha pe keputusan na lao dibahen ho, denggan do molo jolo disukkun ho saran sian akka halak naung marpengalaman!