SUKKUN-SUKKUN NI AKKA NA POSO
Boha do molo Marsahit Natua-tuakku?
Memang, godangan akka na poso dang porlu dope mangurus natua-tuana. Ra ala sehat dope natua-tua ni nasida.
Alai boha ma molo marsahit omak manang bapakmu tikki remaja dope ho? Parrohahon ma pengalaman ni dua na poso on.
Pengalaman ni si Emmaline
Marsahit sindrom Ehlers-Danlos (EDS) do omakku. Sahit na parah do on jala haccitan do ibana alani i. Hona dampak do sendina, kulitna, dohot pembuluh darahna.
Dang adong dope ubat ni sahit on, jala lam parah do kondisi ni omak saleleng lobi sian sappulu taon na parpudi on. Hea do nga naeng mate omak ala rendah hian hitung darahna. Jala hea do didok omak tumagon do ibana mate alani haccitna dihilala.
Saksi Jahowa do hami sakeluarga. Boi do dihilala hami haburjuon ni akka dongan di huria, jala gabe dipatogu do hami alani i! Misalna, baru-baru on dilehon sahalak borua na poso do tu hami kartu ucapan. Didok ibana holong hian do rohana tu hami, jala olo do ibana ro molo adong na porlu diurupi. Las hian do rohakku ala dapottu dongan na songon ibana!
Dipatogu do au ala manjaha Bibel, jala adong do piga-piga ayat favorittu. Misalna, Psalmen 34:18 na mandok, “Jonok do Jahowa tu halak na mandele”, dohot Heber 13:6 na mandok, “Jahowa do na mangurupi au, dang mabiar au.”
Cocok hian do huhilala Heber 13:6 i tu au. Alana mabiar do au so tung mate omakkon. Holong hian do rohakku tu ibana, jala bersyukur do au ala boi dope huurus omak saleleng on. Jadi ayat i mambahen pos rohakku, tolap do au mandalani ngolukku dang soal aha na masa.
Sahit keturunan do sindrom EDS on. Mulana sian oppung borukku turun tu omakku, jala saonari sian omak gabe turun ma tu au. Jadi au pe marsahit sindrom EDS do. Gabe mabiar do au alani i. Alai Heber 13:6 i ma na paposson rohakku, adong do Jahowa na “mangurupi au”.
Saonari, berupaya do au mangargai aha na adong dope di au. Dang olo au mangingot-ingot akka naung salpu, jala dang khawatir au taringot ari na naeng ro. Ai boi do au gabe stres molo sai hupikkirhon taringot sahit ni omak on. Hape didok do di Bibel, akka masalah na tahadapi saonari holan “parsatokkinan do i jala dang borat” molo dibandingkon tu janji ni Debata taringot hangoluan na salelengna di ari na naeng ro.—2 Korint 4:17; Pangungkapon 21:1-4.
Pikkirhon ma: Aha do na mangurupi si Emmaline asa toktong marpikkiran positif? Boha do carana asa boi ho toktong marpikkiran positif tikki adong masalah na ro?
Pengalaman ni si Emily
Tikki SMA au, depresi ma bapakku. Mulai sian i, gabe muba do bapak. Gabe jotjot ma lungun rohana, mabiar, jala khawatir. Nungnga 15 taon ibana songon i. Diboto ibana do akka na ro tu pikkiranna i holan perasaan sambing. Jadi pasti marsak do rohana ala dang boi dialo ibana perasaanna i.
Saksi Jahowa do hami sakeluarga, jala sai berupaya do huria mangurupi hami. Diattusi akka dongan di huria do perasaannami, jala burju do nasida tu hami. Dang dibahen nasida bapak gabe merasa dang mararga di huria. Gabe lam holong do rohakku tu bapak dung huida perjuanganna menghadapi sahitna i.
Najolo tikki sehat bapak, boi do ibana marlas ni roha, dang holsoan, jala dang sai marsak. Masihol do au mangida bapak songon najolo i. Alai saonari, ikkon ganup ari do dialo bapak musu na so boi diida ibana. Gabe lungun do rohakku molo hupikkirhon i.
Alai berjuang do bapak asa toktong marpikkiran positif. Baru-baru on, tikki parah hian depresina, berupaya do ibana manjaha Bibel ganup ari. Memang holan piga-piga ayat do dijaha ibana, alai gabe dipatogu do ibana alani i. Ulaon na sederhana do i, alai hira i ma na mambahen ibana toktong mangolu. Bangga do au ala berjuang ibana menghadapi sudena i.
Lomo hian do rohakku manjaha Nehemia 8:10. Didok do disi, “Dilehon Jahowa do las ni roha na mambahen hamu togu.” Toho do na didok ayat on. Nang pe lungun hian rohakku, alai gabe las do muse rohakku tikki bergaul dohot akka dongan, ro tu parpunguan, jala dohot tu akka ulaon na asing di huria. Sian teladan ni bapak gabe marsiajar do au, manang aha pe masalah na tahadapi, sai rade do Jahowa mangurupi hita.
Pikkirhon ma: Songon dia do cara ni si Emily mangurupi bapakna na marsahit? Songon dia ma carana asa boi hamu mangurupi akka halak na depresi?