SUKKUN-SUKKUN NI AKKA NA POSO
Boha do Carana Mangatasi Lungun ni Roha Tikki Masa Sitaonon?
Ise pe halakna, boi do masa sitaonon tu ibana. Bibel mandok, “Dang halak na hatop marlojong na sai monang di parlumbaan. . . . Ai boi do masa tu nasida sude akka na so diharappon di tikki na so panagaman.” (Parjamita 9:11) Adong do piga-piga na poso na hea makkilala songon i. Alai, aha do na diulahon nasida tikki lungun rohana ala masa sitaonon? Parrohahon ma dua pengalaman on.
SI REBEKAH
Cerai ma natua-tuakku tikki marumur 14 taon au.
Dang terima au naung cerai bapak dohot omak. Sai hudok do di rohakku, ‘Holan satokkin do bapak lao, holan naeng patenangkon dirina do ibana. Kan holong do roha ni bapak tu omak.’ Alai boasa gabe ditinggalhon bapak omak? Boasa gabe ditinggalhon bapak au?
Maol hian do huhilala lao cerita taringot on tu halak na asing. Dang olo be au mamikkirhon i. Tikki i dang husadari na muruk do au. Sai busisaon do au, jala dang boi modom.
Tikki marumur 19 taon au, mate ma omak ala marsahit kanker. Sahabattu do ibana.
Haccit hian do huhilala tikki cerai omak dohot bapak. Alai umhaccit do huhilala tikki mate omak. Hancur hian do perasaanku. Dang tarjalo au sude na masa on. Gabe lam maol ma au modom, jala sai torus do au busisaon.
Alai, adong do na boi mangurupi au. Misalna, didok do di Poda 18:1 asa unang papulikkon diri. Jadi huihutton ma saran i.
Jala ala Saksi Jahowa do au, hujaha ma akka publikasi na marisi akka nasehat sian Bibel na boi menghibur au. Misalna tikki cerai omak dohot bapak, hujaha do bukku Pertanyaan Kaum Muda—Jawaban yang Praktis, tarlumobi di Jilid 2 na marjudul “Bisakah Aku Bahagia dalam Keluarga Orang Tua Tunggal?”
Sada sian ayat ni Bibel na massai hona tu rohakku i ma Mateus 6:25-34. Di ayat 27 didok Jesus do, “Ise sian hamu na boi manambai umurna apala samenit ala sai holsoan?”
Boi do masa sitaonon tu manang ise pe. Alai marsiajar do au sian omak, massai penting do mamboto carana menghadapi situasi sisongon i. Godang hian do hasusaan na dihadapi omak. Diceraihon do ibana, jala marsahit na parah. Alai sabar do omak menghadapi i sude, jala setia do ibana tu Jahowa sahat tu na mate. Toktong do sai huingot sude na diajarhon omak tu au taringot Jahowa.
Pikkirhon ma: Tikki masa sitaonon, aha do manfaatna molo dijaha ho Bibel dohot publikasi na marisi nasehat sian Bibel?—Psalmen 94:19.
SI CORDELL
Tikki marumur 17 taon au, huida do tikki tos hosa ni bapakku. I ma pengalaman na massai haccit na hea huhilala. Hancur hian do perasaanku.
Dang porsea au naung mate bapak. Dang bapakku na ditutup pakke kain i. Hudok do di rohakku, ‘Marsogot dungo do i.’ Hira na kosong do pikkiranku, jala dang huboto naeng mangulahon manang aha.
Saksi Jahowa do hami sakeluarga. Tikki mate bapakku, diurupi akka dongan di huria do hami. Diparade nasida do sipanganon, jala sai didongani do hami. Torus do dibahen nasida songon i nang pe nungnga leleng bapak mate. Bantuan ni nasida paposson rohakku na diulahon Saksi Jahowa do aha na diajarhon Jesus.—Johannes 13:35.
Tarapul do rohakku tikki manjaha 2 Korint 4:17, 18. Didok disi, “Ai sitaonon na masa tu hita, parsatokkinan do i jala dang borat, parohon hasangapon na balga jala na martahan saleleng ni lelengna do i di hita. Akka na so tarida ma taparrohahon, dang akka na tarida. Ai parsatokkinan do akka na tarida i, alai martahan sahat tu saleleng ni lelengna do na so tarida i.”
Dipatogu do au tikki hujaha ayat 18 i. Holan satokkin do sitaonon na masa tu bapak i, alai molo janji ni Debata taringot ari na naeng ro martahan salelengna do. Dung mate bapak, gabe hurimangi ma aha do cita-cita na ikkon hubahen jala ikkon songon dia au mamakke tikkikku.
Pikkirhon ma: Tikki masa sitaonon, songon dia do i boi mangurupi hamu manottuhon cita-cita na ikkon dibahen hamu?—1 Johannes 2:17.