Sada ratting ni hau anggur diponggol ala dang marparbue

Adong do Diajarhon di Bibel ‘Sahali Selamat Tetap Selamat’?

Na didok Bibel

Daong, dang adong ajaran di Bibel na mandok ‘sahali selamat, tetap ma selamat.’ Alana sasahalak naung marhaporseaon tu Jesus Kristus boi do gabe dang porsea be tu ibana. Jala dang boi malua halak na sisongon i. Bibel mandok, ikkon tapartahatton do haporseaotta ‘sian nasa gogo’. (Judas 3, 5) Nang pe nungnga porsea halak Kristen di abad parjolo tu Kristus, alai tong do didok si Paulus tu nasida, “Di bagasan biar ni roha dohot sangap, marsitutu ma hamu asa malua.”—Pilippi 2:12.

Dang sadalan ajaran i tu akka ayat ni Bibel

Takkas do dipaboa di Bibel akka dosa na balga na mambahen sasahalak dang parsidohot tu Harajaon ni Debata. (1 Korint 6:9-11; Galatia 5:19-21) Alai gabe dang marlapatan be ayat i, molo toho ajaran na mandok ‘sahali selamat, tetap ma selamat’. Asing ni i, takkas do dipaboa di Bibel boi do gabe dang selamat halak naung porsea tu Kristus molo toktong mangulahon dosa na balga. Didok di Heber 10:26, “Ai molo nungnga takkas taboto na sittong parbinotoan na tajalo taringot tu hasittongan i, hape sengaja hita mangulahon dosa, dang adong be pelean lao manesa dosatta i.”—Heber 6:4-6; 2 Petrus 2:20-22.
Dipaboa Jesus do tudosan taringot rikkot ni manjaga haporseaonta asa toktong togu. Di tudosan i disarupahon Jesus do dirina songon hau anggur, jala siseanna songon rattingna. Di mulana marparbue do akka ratting i, tarida do i sian pangalaho ni akka siseanna. Alai di pudian ni ari gabe “ratting [na so marparbue] na dibolokkon” ma nasida. Lapatanna dang na lao dipalua be nasida. (Johannes 15:1-6) Dipakke si Paulus do tudosan na sarupa, didok ibana sarupa do halak Kristen na so togu be haporseaona songon hau na lao ‘diponggolhon’.—Rom 11:17-22.
Dijujui do halak Kristen asa “sai jaga.” (Mateus 24:42; 25:13) Alana molo dang sai jaga sasahalak, boi do gabe diulahon ibana ‘akka ulaon di na holom’ manang dang diulahon ibana be sude paretta ni Jesus. Akibatna dang boi ibana selamat.—Rom 13:11-13; Pangungkapon 3:1-3.
Godang do ayat ni Bibel na patuduhon ikkon martahan sahat tu ujungna do asa boi selamat manang malua. (Mateus 24:13; Heber 10:36; 12:2, 3; Pangungkapon 2:10) Asing ni i las do roha ni akka halak Kristen di abad na parjolo, tikki dibege nasida toktong do togu haporseaon ni akka donganna nang pe manaon hasusaan. (1 Tessalonik 1:2, 3; 3 Johannes 3, 4) Jadi, molo dohot do halak na so setia dipalua manang selamat, boasa ma pola dijujui Bibel hita asa martahan sahat tu ujungna?
Dung diboto si Paulus na lao dipamate nama ibana satokkin nai, baru ma pos rohana mandokkon na lao dipalua Debata do ibana. (2 Timoteus 4:6-8) Alai tikki baru dope ibana dohot di ulaon marbarita, diboto ibana do boi do gabe dang dipalua ibana molo mangihutton giot-giot ni daging. Didok ibana, “Hulissingi do dagingku jala hubahen do au songon hatoban, asa molo dung hubaritahon barita na uli tu na asing, dang gabe dihasogohon Debata au.”—1 Korint 9:27; Pilippi 3:12-14.