Aha do Maksudna Dipalua?

Alus ni Bibel

Sipata dipakke Bibel do hata ‘malua’ dohot “paluahon” lao patuduhon sasahalak na malua sian bahaya manang hamatean. (1 Musa 32:11; 2 Musa 14:13, 14) Alai unjotjot do hata on dipakke lao patuduhon halak na dipalua sian dosa. (Mateus 1:21) Parohon hamatean do dosa i. Jadi molo dipalua sasahalak sian dosa, boi ma ibana mangolu saleleng ni lelengna.—Johannes 3:16, 17.a

Boha do carana asa boi hita dipalua?

Asa boi hita dipalua sian dosa, ikkon porsea do hita tu Jesus jala ikkon tapatudu do haporseaon i marhite mangoloi parettana.—Ulaon ni Apostel 4:10, 12; Rom 10:9, 10; Heber 5:9.

Bibel mandok ikkon tarida do haporseaotta sian parniulaon, i ma mangoloi paretta ni Debata. (Jakobus 2:24, 26) Alai on dang patuduhon alani gogotta do umbahen na boi hita malua. Alana “silehon-lehon ni Debata” do haluaon i. Jala dilehon Ibana do i alani ‘asi ni rohana’.—Epesus 2:8, 9.

Molo nga dipalua sasahalak sian dosa, pasti malua do ibana saleleng-lelengna?

Daong. Dos ma i songon sasahalak na hea diurupi asa unang lonong. Boi do ibana madabu muse tu aek jala lonong. Dos songon i ma, nang pe nga dipalua sasahalak sian dosa dang berarti pasti malua ibana saleleng ni lelengna. Ikkon toktong do dipatudu ibana haporseaonna asa boi malua. Bibel mandok, akka halak Kristen naung dipalua sian dosa porlu do ‘mampartahatton haporseaon sian nasa gogona’. (Judas 3) Asing ni i didok Bibel do muse, “Di bagasan biar ni roha dohot sangap, marsitutu ma hamu asa malua.”—Pilippi 2:12.

Ise do Sipalua—Debata manang Jesus?

Takkas do dipaboa di Bibel sian Debata do ro haluaon, alani i ma jotjot Ibana digoari “Sipalua” manang “na paluahon”. (1 Samuel 10:19; Jesaya 43:11; Titus 2:10; Judas 25) Asing ni i, dipakke Debata do piga-piga bawa di jaman ni halak Israel najolo lao paluahon nasida sian akka musu. Jala digoari ma nasida “na paluahon”. (Nehemia 9:27; Panguhum 3:9, 15; 2 Raja-Raja 13:5)b Dos songon i ma ala dipakke Debata do pelean tobusan ni Jesus lao paluahon hita sian dosa, didok do Jesus i “Sipalua”.—Ulaon ni Apostel 5:31; Titus 1:4.c

Sude do halak lao dipalua?

Daong. Adong do piga-piga halak na so dipalua. (2 Tessalonik 1:9) Di jaman ni Jesus, hea do disukkun halak tu ibana, “Holan saotik do na boi selamat?” Didok Jesus ma, “Bahen ma nasa gogom lao masuk sian pintu na soppit i. Ai hudok ma tu hamu, godang do halak na naeng masuk tusi, alai dang tarbahessa.”—Lukas 13:23, 24.

Pandapot na sala na mandok sude do halak dipalua

Pandapot na sala: Sude do halak lao dipalua Debata. Alana 2 Petrus 3:9 mandok, ‘Dang lomo roha ni Debata diripasson manang ise pe.’

Na sasittongna: Lomo do roha ni Debata paluahon jolma, alai dang dipaksa Ibana asa olo jolma dipalua. Alana di “ari panguhuman” lao diripasson Debata do “akka na so pasangappon” Ibana.”—2 Petrus 3:7.