Boasa Massai Godang Agama na Mangakku Kristen?

Na didok Bibel

Dipakke akka halak do ajaran ni Jesus Kristus lao mambahen godang “agama Kristen”. Alai didok di Bibel, holan sada do agama Kristen na sittong. Parrohahon ma boasa didok Bibel songon i.

1. Didok Jesus, “hasittongan” do na diajarhon ibana. Jala porsea do halak Kristen di abad na parjolo molo na diihutton nasida i “hasittongan”. (Johannes 8:​32; 2 Petrus 2:2; 2 Johannes 4; 3 Johannes 3) On patuduhon molo adong agama na mangajarhon akka na maralo tu ajaran ni Jesus, dang agama Kristen na sittong i.

2. Didok di Bibel, ikkon ‘sada do roha ni halak Kristen di pakkataion’. (1 Korint 1:​10) Alai marasing-asing do ajaran ni godang agama Kristen. Bahkan dang sarupa ajaran ni nasida taringot lapatan ni halak Kristen. Tottu dang agama Kristen na sittong agama sisongon i.​—1 Petrus 2:​21.

3. Nungnga dipaboa Jesus hian na lao godang do halak na mangakku Kristen. Alai, ditolak Jesus do nasida ala dang diulahon nasida parettana. (Mateus 7:​21-​23; Lukas 6:​46) Piga-piga halak dang mangulahon paretta ni Jesus ala dang diboto nasida aha na sasittongna diajarhon di Bibel. Ditipu pamimpin agama do nasida. Alana, godangan sian pamimpin agama i mangulahon tugasna holan lao mandapot uttung. (Mateus 7:​15) Adong do muse halak na mamillit gabe anggota ni sada agama ala cocok ajaran ni agama i tu roha ni nasida. Hape dang sesuai ajaran i tu na diajarhon di Bibel.​—2 Timoteus 4:​3, 4.

Di ilustrasi taringot eme dohot simareme-eme, dipaboa Jesus do na lao godang ma halak maninggalhon agama Kristen na sittong jala mangajarhon ajaran na sala. (Mateus 13:24-​30, 36-​43) Leleng do dang boi dibedahon dia agama Kristen na sittong dohot na so sittong. Didok Jesus do muse, lam godang do halak na murtad dung mate akka apostel. (Ulaon ni Apostel 20:29, 30) Marasing-asing do ajaran ni akka na murtad i, alai sude ajaran ni nasida i “nungnga lilu sian hasittongan”.​—2 Timoteus 2:​18.

Alai dipaboa Jesus do muse, na lao ro ma tikkina lam takkas tarida perbedaan ni agama Kristen na sittong dohot na so sittong. Jala nungnga terjadi i saonari, i ma saleleng “panutup ni jaman on”.​—Mateus 13:30, 39.