Olo do Debata Manguba Keputusanna?

Na didok Bibel

Olo do Debata manguba keputusanna molo bertobat sasahalak. Misalna, tikki dipaboa Debata na lao hukumonna halak Israel najolo, didok Ibana do, “Atik boha olo bangso i manangihon, jala ganup halak olo muba sian pangalaho ni nasida na jahat. Molo diulahon nasida i, Au pe hupauba ma aha naung hutottuhon hian di rohakku taringot tu jea na lao huparo tu nasida alani pangalaho ni nasida na jahat i.”​—Jeremia 26:3.

Di godang terjemahan ni Bibel, diterjemahon do ayat on hira naeng mandok na “bertobat” Debata tikki dibatalhon Ibana rencanana lao manghukum halak Israel. Alai molo didok bertobat, gabe hira na hea ma Debata mambahen kesalahan. Hape di bahasa Heber, ayat on boi do artina “manguba keputusan manang rencana”. Sahalak profesor mandok, “Molo olo jolma bertobat, pasti olo do Debata manguba keputusanna.”

Memang boi do Debata manguba keputusanna, alai dang na gabe ikkon diulahon Ibana i. Parrohahon ma piga-piga contoh di Bibel na patuduhon, hea do Debata dang manguba keputusanna:

• Tikki dipangido si Balas tu Debata asa dipaloas ibana mamburai halak Israel, dang dioloi Debata pangidoanna i, jala dang diuba Debata keputusanna.​—4 Musa 23:18-​20.

• Dung gabe jahat Raja Saul, dang olo be Jahowa mambahen si Saul toktong gabe raja. Jala dang diuba Debata keputusanna i.​—1 Samuel 15:28, 29.

• Ditepati Jahowa do janjina lao mambahen Anakna gabe malim sahat tu saleleng ni lelengna. Dang na lao diuba Debata keputusanna i.​—Psalmen 110:4.

Didok do di Bibel molo Debata dang hea muba. Na gabe maralo do isi ni Bibel?

Memang, didok do di Bibel, “Jahowa do Au, jala dang hea Au muba.” (Maleaki 3:6) Didok do muse di Bibel, “Na so olo muba [Debata] songon parhusor ni bayangan”. (Jakobus 1:​17) Alai dang maralo ayat on tu na didok di Bibel na boi do Debata manguba keputusanna. Dang hea muba Debata, maksudna dang hea muba akka sifat ni Debata, songon holong dohot hatigoranna. (5 Musa 32:4; 1 Johannes 4:8) Alai boi do Ibana mambahen sada petunjuk di sada tikki, alai berbeda muse petunjukna di tikki na asing. Contohna tikki naeng marporang si Daud dua hali, dang sarupa petunjuk na dilehon Debata di dua parporangan i. Alai rap marhasil do duassa.​—2 Samuel 5:​18-​25.

Na manolsoli do Debata ala manoppa jolma?

Daong. Memang, kecewa do Debata ala godang jolma na so mangoloi jala manomba Ibana. Dung dipaboa songon dia pangalaho ni akka halak di jaman ni si Noak sebelum ro Aek na Sumar manang Air Bah, didok do di Bibel, “Manolsoli ma Jahowa ala ditoppa Ibana jolma i di tano on. Jala massai haccit ma rohana.” (1 Musa 6:6, surat na di toru) Hata “manolsoli” di ayat on na diterjemahon sian bahasa Heber, boi do artina “manguba keputusan”. Ala gabe jahat akka halak na mangolu sebelum ro Air Bah, gabe diuba Debata ma keputusanna tu nasida. (1 Musa 6:​5, 11) Memang lungun do roha ni Debata ala diulahon nasida na jahat. Alai dang gabe muba perasaan ni Debata tu jolma. Diselamatton Ibana do si Noak dohot keluargana sian Air Bah asa boi jolma toktong mangolu di tano on.​—1 Musa 8:​21; 2 Petrus 2:​5, 9.