Akka Ise do na Lao tu Narokko?

Na didok Bibel

Narokko manang di bahasa asli ni Bibel didok “Syeol” dohot “Hades”, i ma lapatanna kuburan. Narokko i dang inganan lao manghukum akka halak na jahat di bagasan api na marsigorgor. Didok do di Bibel, di kuburan do “haduan sude halak na mangolu dipapungu”. (Job 30:23) Attong ise do na lao tu narokko? Halak na burju dohot na jahat.—Job 14:13; Psalmen 9:17.

Bahkan Jesus pe lao do tu narokko manang Hades tikki mate ibana. Alai, ‘dang dipasombu Debata ibana di Hades’, alana dipahehe Debata do ibana.—Ulaon ni Apostel 2:31, 32, surat na di toru.

Martahan salelengna do narokko i?

Lao kaluar do akka halak na adong di narokko, alana paheheon ni Jesus do annon nasida marhite huaso ni Debata. (Johannes 5:28, 29; Ulaon ni Apostel 24:15) Surirang na dipaboa di Pangungkapon 20:13 (surat na di toru) mandok, tikki masa haheheon, “dilehon hamatean dohot Hades ma akka na mate na adong di bagasanna”. Jadi ala “dang adong be hamatean”, gabe kosong ma narokko i jala dang adong be halak na lao tusi.—Pangungkapon 21:3, 4; 20:14.

Alai dang sude halak na mate lao tu narokko. Didok di Bibel, adong do halak na massai jahat jala dang olo muba. (Heber 10:26, 27) Tikki mate halak sisongon i, dang tu narokko nasida alai tu Gehena, na lapatanna hamatean na saleleng ni lelengna. (Mateus 5:29, 30) Misalna, Jesus mandok adong do piga-piga pamimpin agama na munafik di jamanna na lao masuk tu Gehena.—Mateus 23:27-33.