Boi do Hita Manomba Patung?

Na didok Bibel

Dang boi. New Catholic Encyclopedia patorangkon taringot patik na dilehon Debata tu bangso Israel, “Sian godang ayat na adong di Bibel, takkas ma molo panombaon na sittong tu Debata ikkon ias do sian akka patung.” Parrohahon ma piga-piga ayat na mangihut na adong di Bibel:

• “Unang bahen hamu patung, manang gambar na suman tu manang aha pe na adong di langit, di tano on, manang na adong di aek di toru ni tano on. Unang marsomba hamu tu akka i. Jala unang olo hamu ditogihon lao manomba i. Ai Au do Jahowa Debatamuna. Hupangido do tu hamu asa holan Au Debata na disomba hamu.” (2 Musa 20:4, 5) Lomo do roha ni Debata asa holan Ibana na tasomba. Alani i dang lomo rohana molo hita manomba patung, gombar, berhala, dohot lambang.

• “Dang lehonokku hamuliaokku tu manang ise pe, manang pujian na dilehon tu Au gabe tu akka patung.” (Jesaya 42:8) Dang lomo roha ni Debata molo tasomba ibana marhite patung. Tikki halak Israel manomba Ibana marhite patung anak ni lombu, didok Debata nungnga mangulahon “dosa na balga” nasida.—2 Musa 32:7-9.

• “Unang ma tapikkir na songon patung na dipature tangan ni jolma Debata i, na dibahen sian mas, perak, manang batu.” (Ulaon ni Apostel 17:29) Ibadat na so sittong jotjot do mamakke patung “na dibahen sian mas, perak, manang batu”. Alai molo hita halak Kristen ikkon “mangihutton haporseaon do hita mangolu, dang mangihutton akka na taida”, songon na didok Bibel.—2 Korint 5:7.

• “Padao hamu ma dirimuna sian akka patung.” (1 Johannes 5:21) Sian patik na dilehon Debata tu bangso Israel suang songon i tu halak Kristen, Bibel paboahon na so jadi hita mamakke patung dohot lambang di panombaotta.