Diloas Debata do Hita Manottuhon Aha na lao Tapillit? Manang Nungnga Ditottuhon Ibana Hian Songon dia Nasibta?
Na didok Bibel
Dilehon Debata do tu jolma kebebasan mamillit, i ma kesanggupan lao mambahen keputusan tu diritta sandiri. Jadi dang ditakdirhon manang dang ditottuhon Debata aha na ikkon taulahon. Parrohahon ma aha na diajarhon Bibel taringot i.
Ditoppa Debata do jolma mirip songon Ibana. (1 Musa 1:26) Berbeda do jolma sian binatang. Molo binatang bertindak holan mangihutton nalurina. Alai molo hita boi do tatiru akka sifat ni Debata Sipanoppa hita, songon holong dohot keadilan. Jala dos songon Debata, bebas do hita manottuhon aha na ikkon taulahon.
Aha na taulahon boi do manottuhon songon dia masa depanta. Di Bibel dijujui do hita asa manangihon hata ni Debata. Artina, ikkon taoloi do sude parettana, dung i boi ma dapotta hangoluan. (5 Musa 30:19, 20) Alai molo naung ditottuhon hian do songon dia nasibta, dang adong be gunana taulahon sude paretta ni Debata. Sebenarna, dang hea dipaksa Debata hita asa mangulahon hatana. Alai sebalikna didok Debata do tu hita, “Autsugari diparrohahon ho akka parettakki! Dos songon sunge ma hadameonmu.”—Jesaya 48:18.
Dang hea ditakdirhon Debata gabe halak na berhasil do hita manang na dang. Asa boi hita berhasil, ikkon kerja keras do hita. Didok di Bibel, “Manang aha na boi ulahononmu, ulahon ma i sian nasa gogom.” (Poda 9:10) Didok do muse di Bibel, “Sai na saut do sakkap ni halak na ringgas.”—Poda 21:5.
Hadiah na istimewa do kebebasan mamillit na dilehon Debata. Alani i gabe boi ma hita mamillit lao makkaholongi Ibana sian nasa rohatta, dang ala na dipaksa.—Mateus 22:37.
Tutu do naung ditottuhon Debata sude?
Bibel mangajarhon tu hita, Pargogo na So Hatudosan do Debata. Jala dang adong manang ise pe na boi mangabbati Ibana patuduhon huasona i. (Job 37:23; Jesaya 40:26) Alai dang hea lomo-lomo ni Debata mamakke huasona i. Adong do disurat di Bibel ‘diorom Debata do dirina’ asa unang pittor manghukum halak Babel musu ni halak Israel. (Jesaya 42:14) Songon i do tong saonari, dilehon Debata do tu jolma kebebasan lao mamillit. Dipasombu Ibana dope halak na jahat mambahen na haccit tu donganna. Alai dang salelengna pasombuon ni Debata nasida songon i.—Psalmen 37:10, 11.