Dang Huboto Aha Tujuan ni Ngolukku—Boi do Agama, Debata, Manang Bibel Mangurupi Au?

Na didok Bibel

Boi. Bibel boi do mangalusi akka sukkun-sukkun na rikkot taringot parngoluon, jala boi do tong mangurupi asa dame rohatta jala marlas ni roha. Ida ma piga-piga alus ni sukkun-sukkun on.

1. Tutu do adong Sitoppa hita? Didok di Bibel, Debata do na “manoppa saluhutna”. (Pangungkapon 4:11) Ala Debata do na manoppa hita, diboto Ibana do aha na tahaporluhon asa boi dame ngolutta jala marlas ni roha.

2. Parduli do Debata tu au? Parduli. Alana didok do di Bibel, “Dang dao Ibana sian ganup hita.” (Ulaon ni Apostel 17:27) Diboto Debata do aha na masa tu hamu jala lomo do rohana mangurupi hamu asa marlas ni roha.—Jesaya 48:17, 18; 1 Petrus 5:7.

3. Boi do gabe dame rohakku molo hutanda Debata? Tikki ditoppa Debata jolma, nungnga disuanton Ibana tu bagasan rohatta keinginan lao mamboto aha tujuan ni ngolutta. Termasuk ma on keinginan lao mananda Sitoppa hita jala marale-ale tu Ibana. (Mateus 5:3) Molo tapajonok diritta tu Debata, olo do Ibana manjakkon hita. Alana didok di Bibel, “Pajonok hamu ma tu Debata, dung i pajonokonna ma tu hamu.”—Jakobus 4:8.

Marjuta halak nungnga makkilala las ni roha dohot dame ni roha ala marale-ale nasida tu Debata. Nang pe tatanda Debata, dang berarti na gabe so adong be masalahta. Alai, bisuk na adong di Bibel boi do mangurupi hita asa

• Marlas ni roha keluargatta.

• Mardame dohot na asing.

• Boi mangatasi tikki adong masalah songon depresi, susa di parhepengon, dohot sahit.

Godang do agama na mamakke Bibel, alai dang diulahon nasida na didok di Bibel i. Alai molo agama na sittong, diulahon do aha na diajarhon di Bibel. Jadi, boi do agama na sittong mangurupi hita mananda Debata.