Aha do na Didok Bibel Taringot Transfusi Darah?

Na didok Bibel

Diorai Bibel do hita mangallang mudar. Jadi, dang boi tapamasuk mudar manang komponen utama ni mudar tu dagingta manang songon dia pe carana, misalna mangallang sipanganon na adong mudarna manang transfusi darah. Pikkirhon ma akka ayat on:

• 1 Musa 9:4. Dung salpu Air Bah, dipaloas Debata do si Noak dohot keluargana mangallang jagal ni binatang. Alai diorai Debata do nasida mangallang mudar ni binatang i. Didok Debata do tu si Noak, “Unang allang hamu jagal na adong dope mudarna.” Mulai sian i marlakku ma paretta on tu sude halak, alana keturunan ni si Noak do sude jolma.

• 3 Musa 17:14. “Unang allang hamu mudar ni manang aha pe. Ai di mudar i do ngolu ni nasa na mangolu. Ikkon dipamate do manang ise na mangallang mudar.” Di adopan ni Debata, sarupa do mudar tu hangoluan, jala appuna ni Debata do i. Nang pe holan tu bangso Israel najolo dilehon paretta asa unang mangallang mudar, alai sian paretta i gabe taboto ma sada hal na serius do on di adopan ni Debata.

• Ulaon ni Apostel 15:20. ‘Padao ma dirimuna sian mudar.’ Dang holan tu si Noak dilehon Debata paretta on, alai dohot do tu halak Kristen. Sejarah patuduhon dang olo halak Kristen di abad na parjolo mangallang mudar manang mamakke mudar gabe ubat.

Boasa diparettahon Debata asa tapadao diritta sian mudar?

Adong do piga-piga alasan di bidang medis na mambahen hita menolak transfusi darah. Alai na uppetting, diparettahon Debata do asa tapadao diritta sian mudar. Ala Debata do na mangalehon hangoluan, badia do hangoluan i di Ibana. Jadi mudar i pe badia do tong di Ibana.—3 Musa 17:11; Kolosse 1:20.