Boi do Sasahalak Mangulahon Poligami?

Na didok Bibel

Najolo memang hea do dipaloas Debata sahalak bawa lobi sian sada istrina. (1 Musa 4:19; 16:1-4; 29:18-29) Alai sasittongna sian mulana dang lomo roha ni Debata sasahalak mangulahon poligami manang lobi sian sada istri. Buktina holan sada do dilehon Ibana istri tu si Adam.

Tikki ro Jesus tu tano on, dilehon Debata do huaso tu ibana lao padenggatton aturan taringot perkawinan, i ma monogami manang holan sada istri. (Johannes 8:28) Tikki adong na manukkun Jesus taringot perkawinan, didok Jesus ma, “Na so hea do dijaha hamu, sian mulana i do ditoppa Debata bawa dohot borua? Jala didok do, ‘Alani i, ikkon tadikkonon ni bawa ma omakna dohot bapakna, asa toktong rap dohot istrina jala gabe sada daging ma nasida na dua.’”—Mateus 19:4, 5.

Di pudian ni ari, adong do sahalak sisean ni Jesus na ditogu-togu tondi parbadia manurat, “Ganup bawa ma maristri jala ganup borua ma marsuami.” (1 Korint 7:2) Jala Bibel mandok molo sahalak bawa naeng mandapot tanggung jawab di huria, ikkon ‘holan sada do istrina’.—1 Timoteus 3:2, 12.