Akurat do Akka Hatorangan Taringot Parngoluan ni Jesus na Disurat di Bibel?

Na didok Bibel

Si Lukas na manurat taringot parngoluan ni Jesus mandok, “[Nungnga] manat hutakkasi sudena i sian mulana.”—Lukas 1:3.

Piga-piga halak mandok, molo kisah taringot parngoluan ni Jesus na di surat di akka Injil, i ma surat ni si Mateus, si Markus, si Lukas, dohot si Johannes nungnga diuba hira-hira di abad na paopatton.

Alai adong do sada fragmen manang potongan sian Injil Johannes na didapot di Mesir di awal ni abad 20. Saonari digoari do potongan i Papyrus Rylands 457 (P⁵²) jala disimpan di John Rylands Library, Manhester, Inggris. Potongan i marisi akka ayat na adong di Bibel modern, i ma Johannes 18:31-33, 37, 38.

On ma potongan manuskrip na uttua di Akka Bukku Junani Kristen. Godang do akka pakar porsea molo potongan on disurat hira-hira di taon 125 M, hira-hira 25 taon dukkon sae disurat bukku aslina. Jala, isi ni potongan ni manuskrip i pe hampir sarupa do dohot akka manuskrip na terbaru.