Adong do Pamarettaon na Stabil na Boi Mamaretta Portibi on?—Aha do na Didok Bibel Taringot i?

Sursar do saonari akka pamarettaon di portibi on. Nang pe hira na aman jala stabil sada negara, olo do godang masalah di pamarettaonna. Misalna korupsi, penyalahgunaan kekuasaan, persaingan politik, dohot demon.

Dipaboa do di Bibel adong sada pamarettaon na stabil. Hea do ra dibege hamu taringot pamarettaon i. Pamarettaon i ma na dimaksud Jesus di tangiang na diajarhon ibana.

• “Songon on ma hamu martangiang: ‘Ale Amanami na di banua ginjang, sai dipabadia ma goarmu. Sai ro ma Harajaonmu. Sai saut ma lomo ni roham di tano on songon na di banua ginjang.’”—Mateus 6:9, 10.

Aha do na didok Bibel taringot Harajaon i?

Pamarettaon na stabil do Harajaon i

Sian surgo do Harajaon i mamaretta.

• Digoari Jesus do pamarettaon i “Harajaon banua ginjang.” (Mateus 4:17; 5:3, 10, 19, 20) Alani i ma didok ibana, “Dang sian portibi on Harajaokku.”—Johannes 18:36.

Harajaon i ma na lao manggattihon sude pamarettaon na adong di tano on.

• Didok Bibel, “Lao dihancurhon jala diropukkon harajaon i do sude harajaon na parjolo. Jala hot do harajaon i saleleng ni lelengna.”—Daniel 2:44.

Jesus Kristus do Raja ni Harajaon ni jala dang na lao hancur i.

• Didok Bibel, “Martahan do pamarettaonna saleleng ni lelengna jala dang boi digattihon. Harajaonna pe, dang boi dihancurhon.”—Daniel 7:13, 14.

Na lao aman jala dame ma tano on bahenon ni Harajaon i.

• Didok Bibel, “Ganup halak hundul ma di toru ni hau anggurna be dohot di toru ni hau arana be, dang adong be na mambahen nasida mabiar.”—Mika 4:4.

Asa lam godang na taboto taringot Harajaon i

Tikki di tano on Jesus, hampir sude do dipakke ibana tikkina lao paboahon “barita na uli.” (Mateus 9:35) Jala didok ibana do,

• “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.”—Mateus 24:14.

Saonari nungnga dipaboa be barita na uli taringot Harajaon i tu lobi sian 240 negara. Las rohanami manogihon hamu mangalului gumodang hatorangan taringot Harajaon i jala boha ma carana asa boi hamu gabe rakyat ni Harajaon i.

Tonton ma video Aha do Harajaon ni Debata i?