Pawel Gluza/500Px Plus/Getty Images
TETAP MA MARJAGA-JAGA!
Moru do Godang ni Binatang Liar Sahat tu 73 Persen di Bagasan 50 Taon on!—Aha do na Didok Bibel Taringot i?
Di tanggal 9 Oktober 2024, dipaboa organisasi Dana Dunia untuk Alam (WWF) ma sada laporan taringot dampak ni kegiatan ni jolma tu akka binatang liar. Pasti tarsonggot do hita mambege laporan ni organisasi i na mandok, “Di bagasan 50 taon on (1970-2020), nungnga moru godang ni binatang liar sahat tu 73 persen.” Jala didok laporan i muse, “Dang palobihu molo tadok aha na masa di bagasan lima taon nai, boi do manottuhon ngolu ni sude na adong di planet bumi on.”
Godang do halak na tarsonggot mambege laporan i. Alana dang lomo rohatta gabe sega tano on manang gabe susa akka binatang liar. Jala tikki ditoppa Debata pe jolma, nungnga dilehon Ibana tugas tu nasida asa mangurus akka binatang.—1 Musa 1:27, 28; Poda 12:10.
Sukkun-sukkun do ra rohamuna, ‘Tolap do hita manjaga akka binatang liar na adong di tano on? Aha do na didok Bibel taringot i?’
Adong do harapan
Dang tolap hita saonari manjaga sude binatang liar na adong di tano on. Holan Debata do na boi manjaga akka binatang i. Didok di Pangungkapon 11:18, na lao “ripassonon [ni Debata] ma halak na manegai tano on”. Adong dua na boi taboto sian ayat i:
1. Dang pasombuon ni Debata jolma manegai tano on salelengna.
2. Lao bertindak nama Debata satokkin nai. Boasa boi tadok songon i? Molo dibandingkon tu najolo, godang hian do saonari kegiatan ni jolma na boi mambahen akka binatang liar gabe punah.
Songon dia ma cara ni Debata lao mangatasi i? Bahenonna ma Harajaon ni Debata mamaretta tu tano on. (Mateus 6:10) Molo nungnga mamaretta i, diajari jala dilatik ma akka jolma lao mangurus jala manjaga akka binatang liar.—Jesaya 11:9.