Toktong ma “Marale-ale tu Debata”

1. Aha do kebutuhan ni sude jolma? (Mateus 5:3)

DIBOTO Jahowa do akka na dihaporluhon jolma. Contohna, porlu do di hita sipanganon, pakkean, dohot tempat tinggal. Molo dang adong i, gabe susa do hita bahkan boi gabe mate. Alai, dang holan i na tahaporluhon. Tikki ditoppa Debata hita, disuanton do tu rohatta kebutuhan lao marale-ale tu Ibana. (Jaha Mateus 5:3.) Jadi asa boi hita marlas ni roha, ikkon tasadari do na porlu hita marale-ale tu Jahowa jala toktong porsea tu Ibana.

2. Boasa hita boi dipatudos songon sahalak pangido-ido?

² Di bahasa aslina, hata “mamboto rikkot ni marale-ale tu Debata” dipatudos do tu sahalak pangido-ido na mangido bantuan. Bayakkon ma adong sahalak pangido-ido na maribak-ribak bajuna jala kelaparan. Dang adong ingananna marlinggom. Mohopan do ibana tikki arian jala ngalian tikki borngin. Alani penampilanna, dang olo halak jonok tu ibana. Loja hian do dihilala ibana jala lungun rohana. Alai diboto pangido-ido i do asa boi ibana toktong mangolu, ikkon dipangido ibana do bantuan. Dos songon i ma halak na mamboto rikkot ni marale-ale tu Debata. Ikkon marsitutu do ibana mangido bantuan ni Debata jala olo diurupi.

3. Aha do na lao tabahas di artikel on?

³ Di artikel on, lao tabahas ma cerita taringot borua Penisia na mangido bantuan ni Jesus. Sian cerita i, taboto ma tolu sifat na ikkon adong di hita asa boi torus marale-ale tu Jahowa. Dung i, tabahas ma sitiruon sian akka bawa na togu haporseaonna, i ma Apostel Petrus, Apostel Paulus, dohot Raja Daud.

MARSEREP NI ROHA, DANG MENYERAH, JALA MARHAPORSEAON

4. Aha do na dipangido sahalak borua Penisia tu Jesus?

⁴ Di sada tikki, ro ma sahalak borua Penisia manjuppangi Jesus. ‘Massai haccit do ditaon boruna ala disonggopi suru-suruan na jahat.’ (Mat. 15:​21-28) Marsinggang ma borua i jala mangelek asa diurupi Jesus ibana. Tikki na pajuppang i ibana dohot Jesus, dipatudu ibana do tolu sifat na massai denggan. Akka aha ma i?

5. Akka sifat aha do na dipatudu borua i, jala boha do tanggapan ni Jesus? (Ida gambar.)

⁵ Dipatudu borua Penisia i do serep ni roha. Sian dia taboto? Tikki makkatai Jesus dohot ibana, dipatudos Jesus do ibana songon anak ni biang. Biasana, halak na so Jahudi do na memelihara anak ni biang. Nang pe songon i didok Jesus tu borua Penisia i, dang tersinggung ibana. Boha do perasaanmuna molo didok Jesus songon i tu hamu? Gabe tersinggung do hamu jala dang olo be mangido bantuan sian ibana? Asing ni i, dang menyerah borua i. Sian dia taboto? Torus do dijugulhon ibana mangido bantuan ni Jesus. Boasa diulahon ibana i? Ala porsea do ibana tu Jesus. Haporseaonna i ma na mambahen olo Jesus mangurupi ibana. Memang di mulana, didok Jesus do “holan tu halak Israel na songon biru-biru na lilu i do [ibana] disuru”. Nang pe songon i, dioloi ibana do pangidoan ni borua i. Jala dipalua ma boruna sian suru-suruan na jahat.

6. Aha do na boi tatiru sian borua Penisia i?

⁶ Asa torus hita marale-ale dohot Jahowa, tatiru ma borua Penisia i. Serep ma rohatta, unang menyerah, jala marhaporseaon na togu. Boasa? Molo serep rohatta, gabe olo ma hita torus mangido bantuan ni Debata. Asing ni i, ikkon porsea do hita tu Jesus Kristus dohot tu akka na manguluhon hita. (Mat. 24:​45-47) Molo tapatudu akka sifat i, las ma roha ni Jahowa dohot Jesus jala diurupi ma hita asa torus marale-ale dohot nasida. (Bandingkon tu Jakobus 1:​5-7.) Saonari, tabahas ma akka aha do na diparade Jahowa asa toktong hita marale-ale dohot Ibana jala asa marlas ni roha hita. Dung i, tabahas ma aha do na taparsiajari sian Apostel Petrus, Apostel Paulus, dohot Raja Daud.

TIRU MA SI PETRUS JALA TORUS MA PARSIAJARI HATA NI DEBATA

7. Aha do na diparettahon Jesus tu si Petrus, jala aha do na ikkon diulahon si Petrus? (Heber 5:14–6:1)

⁷ Tabahas ma sitiruon sian Apostel Petrus. Ibana ma halak na parjolo na mamboto molo Jesus i Messias. Diboto ibana do muse Jesus do na dipakke Jahowa lao mangajari akka halak taringot “hangoluan na saleleng ni lelengna”. (Joh. 6:​66-68) Andorang so nakkok Jesus tu surgo, dilehon ibana do paretta on tu si Petrus, “Lehon ma mangan anak ni biru-birukki.” (Joh. 21:17) Diulahon si Petrus do i, jala ditogu-togu Jahowa do ibana lao mambahen dua surat na mangurupi akka huria di tikki i. Alai si Petrus pe, ikkon dilehon ibana do tikkina lao mamparsiajari Hata ni Debata. Misalna, diparsiajari ibana do akka surat na dibahen si Paulus. Memang didok ibana, adong do akka isi ni surat i “na maol attusan”. (2 Ptr. 3:​15, 16) Nang pe songon i, marsitutu do si Petrus mamparsiajari i. Pos do rohana, pasti diurupi Jahowa do ibana mangattusi “sipanganon na karas” na dipaboa si Paulus jala mangulahon i.—Jaha Heber 5:14–6:1.

8. Aha do na diulahon si Petrus dung diida ibana parnidaan sian Jahowa?

⁸ Asing ni i, ala togu haporseaon ni si Petrus diihutton ibana do tudu-tudu na sian Debata. Misalna tikki di Kota Joppe si Petrus, dilehon Debata ma sada parnidaan tu ibana. Jala adong ma suru-suruan na mandok tu si Petrus asa diallang ibana akka binatang na ramun mangihutton Patik ni si Musa. Pasti tarsonggot do si Petrus mambege i. Alana halak Jahudi do ibana. Di mulana didok si Petrus do, “Dang olo au Tuan! Ai dang hea dope huallang sipanganon na ramun dohot na so diloas allangon mangihutton patik.” Alai didok suru-suruan i ma, “Molo dung didok Debata ias, dang boi be dohononmu i ramun.” (Ul. 10:​9-15) Aha do na diulahon si Petrus dukkon i? Pittor dipauba ibana do cara marpikkirna. Sian dia taboto? Dung diida ibana parnidaan i, adong ma ro tolu bawa na disuru si Kornelius manjuppangi ibana. Dipangido nasida ma si Petrus asa ro tu jabu ni si Kornelius. Sebelumna, dang olo si Petrus ro tu jabu ni halak na so Jahudi. Alana ramun do halak na so Jahudi di halak Jahudi. (Ul. 10:​28, 29) Alai dung diida si Petrus parnidaan i, dipauba ibana ma cara marpikkirna jala diulahon ibana ma lomo ni roha ni Jahowa. (Poda 4:18) Marbarita ma ibana tu si Kornelius dohot tu keluargana. Gabe porsea ma nasida tu Jesus, manjalo tondi parbadia, jala tardidi.—Ul. 10:​44-48.

9. Aha do manfaatna molo taparsiajari ajaran na maol taattusi?

⁹ Songon si Petrus, taratur ma hita mamparsiajari Hata ni Debata. Memang biasana unlomo do rohatta mamparsiajari ajaran dasar na mura taattusi. Alai, ikkon taparsiajari do tong ajaran na maol taattusi na dos songon sipanganon na karas. Alani i, talehon ma tikki lao mangulahon i. Boasa? Adong dua manfaatna. Na parjolo, gabe lam takkas ma tatanda Jahowa. Hasilna, gabe lam holong ma rohatta tu Ibana jala lam taargai ma Ibana. Na paduahon, gabe lam semangat ma hita paboahon taringot Jahowa tu halak na asing. (Rom 11:33; Pgk. 4:11) Asing ni i, adong do muse na taparsiajari sian si Petrus. Molo adong pangattusionta na disesuaihon, pittor tasesuaihon ma tong cara marpikkirta dohot tindakanta. Molo taulahon i, boi ma hita toktong jonok tu Jahowa jala setia tu Ibana.

TIRU MA SI PAULUS JALA PAKKE MA PANGALAHO NA IMBARU

10. Aha do na porlu taulahon lao mambahen las roha ni Jahowa? (Kolosse 3:​8-10)

¹⁰ Diurupi Jahowa do tong hita asa boi patuduhon akka pangalaho na mambahen las rohana. Didok Apostel Paulus, ikkon ‘tatanggalhon do pangalaho na leleng jala tapakke ma pangalaho na imbaru’. (Jaha Kolosse 3:​8-10.) Memang dang sai mura mangulahon i. I ma na dihilala si Paulus. Mulai sian tikki poso dope ibana, berupaya do ibana mambahen las roha ni Debata. (Gal. 1:14; Plp. 3:​4, 5) Alai ala hurang parbinotoanna taringot Debata, gabe dang diboto ibana boha cara na sittong lao manomba Debata. Alani i, dang olo ibana manjalo ajaran taringot Kristus jala ‘ginjang do rohana’. Jadi di tikki i, dang dipatudu si Paulus akka sifat na mambahen las roha ni Debata.—1 Tim. 1:13.

11. Aha do na ikkon dipauba si Paulus sian dirina?

¹¹ Andorang so gabe halak Kristen, mura-mura do si Paulus muruk. Di bukku Ulaon ni Apostel dipaboa, sogo hian do roha ni si Paulus mangida akka sisean ni Jesus. Bahkan ‘sai diancam ibana do nasida jala naeng dibunu’. (Ul. 9:1) Dung gabe halak Kristen, pasti marsitutu do si Paulus mananggalhon pangalaho na leleng. (Eps. 4:​22, 31) Nang pe songon i, hea do gagal si Paulus. Sanga do ibana ‘marbada’ dohot si Barnabas. (Ul. 15:​37-39) Alai nang pe gagal, dang menyerah si Paulus. ‘Dilissingi ibana do dagingna’, lapatanna berjuang do ibana mangalo hagaleonna asa boi mambahen las roha ni Jahowa.—1 Kor. 9:27.

12. Aha do na mambahen si Paulus marhasil paubahon pangalahona?

¹² Ala serep roha ni si Paulus, gabe boi ma dipakke ibana pangalaho na imbaru. (Plp. 4:13) Songon si Petrus, diasahon si Paulus do “gogo ni Debata”. (1 Ptr. 4:11) Memang sipata gagal do si Paulus jala metmet rohana. Alai dang menyerah ibana. Diingot ibana ma songon dia Jahowa mangurupi ibana saleleng on. Ala diingot ibana i, gabe lam bertekad ma ibana paubahon pangalahona jala mambahen las roha ni Jahowa.—Rom 7:​21-25.

13. Aha do na boi tatiru sian si Paulus?

¹³ Tatiru ma si Paulus. Nang pe nungnga martaon-taon hita manomba Jahowa, torus ma hita berupaya mamakke pangalaho na imbaru. Memang sipata, olo do gagal hita. Misalna, muruk do ra hita manang tabahen haccit roha ni na asing. Molo masa i, unang ma didok rohatta dang na boi be hita mambahen las roha ni Jahowa. Berupaya ma hita torus paubahon cara marpikkirta dohot tindakanta. (Rom 12:​1, 2; Eps. 4:24) Jala taingot ma on: Asa boi tapakke pangalaho na imbaru, ikkon taboto do aha na dipangido Jahowa asa taulahon.

TIRU MA SI DAUD JALA LOAS MA JAHOWA MANGALINGGOMI HITA

14-15. Aha do na diulahon Jahowa lao mangalinggomi akka naposona? (Psalmen 27:5) (Ida sampul.)

¹⁴ Aha do muse na tahaporluhon asa boi hita marlas ni roha? Porlu do di hita parlinggoman sian Jahowa. Alai boha do cara ni Jahowa mangalinggomi hita? Jala aha do na ikkon taulahon asa toktong hita dilinggomi Jahowa?

¹⁵ Pos do roha ni Raja Daud, pasti dilinggomi Jahowa do ibana tikki masa hasusaan. (Jaha Psalmen 27:5.) Songon dia do Jahowa mangalinggomi akka naposona saonari? Dilinggomi Jahowa do hita sian manang aha pe na boi manegai haporseaotta. Jala marjanji do Ibana, dang adong sinjata manang aha pe na boi mangalo hita. (Ps. 34:7; Jes. 54:17) Memang gogo do Sibolis dohot akka na mangihutton ibana. Alai umgogo do Jahowa sian nasida. Bahkan nang pe mate hita dibahen nasida, paheheon ni Jahowa do hita haduan. (1 Kor. 15:​55-57; Pgk. 21:​3, 4) Asing ni i, diurupi Jahowa do hita tikki marsak hita asa boi toktong tasomba Ibana. (Poda 12:25; Mat. 6:​27-29) Dilehon Jahowa do akka dongan sahaporseaon na rade mangurupi hita. Jala adong do tong akka sintua na sai rade mamparmahani hita. (Jes. 32:​1, 2) Dibahen do tong parpunguan. Disi boi ma hita mandapot pangurupion dohot parlinggoman sian Jahowa.—Heb. 10:​24, 25.

16. Boha do cara ni Jahowa mangalinggomi si Daud?

¹⁶ Tikki dioloi si Daud paretta ni Jahowa, diurupi Jahowa do ibana mambahen keputusan na denggan. Hasilna, gabe marlas ni roha ma ibana. Songon i ma Jahowa mangalinggomi si Daud. (Bandingkon tu Poda 5:​1, 2.) Alai tikki dang dioloi si Daud paretta ni Jahowa, gabe susa do ibana. Jala ikkon ditaon ibana do akibat sian keputusanna na so denggan. (2 Sam. 12:​9, 10) Hea do tong susa si Daud alani pambahenan ni halak na asing. Di situasi sisongon i, dipaboa si Daud do sude na di rohana tu Jahowa. Dipatogu Jahowa ma ibana. Jala dipapos Jahowa ma rohana, na massai holong do roha ni Jahowa tu ibana jala pasti dilinggomi do ibana.—Ps. 23:​1-6.

17. Aha do na boi tatiru sian si Daud?

¹⁷ Tatiru ma si Daud. Tapangido ma bantuan ni Jahowa tikki lao mambahen keputusan. Jala taingot ma tikki susa hita, dang na so dilinggomi Jahowa hita. Alai olo do ra ala tabahen keputusan na so denggan. (Gal. 6:​7, 8) Asing ni i, olo do ra gabe susa hita alani pambahenan ni halak na asing. Tikki masa i, tapaboa ma sude arsak ni rohatta tu Jahowa jala tapangido ma bantuanna. Pos ma rohatta, pasti dijaga Jahowa do rohatta dohot pikkiranta.—Plp. 4:​6, 7.

TOKTONG MA TAASAHON JAHOWA

18. Songon dia do tanggapan ni akka halak taringot marale-ale tu Debata, jala aha do na ikkon taulahon asa toktong marale-ale tu Debata? (Ida gambar.)

¹⁸ Ayat tahunan di taon 2026, i ma: “Marlas ni roha ma na mamboto rikkot ni marale-ale tu Debata.” Massai penting do taulahon na didok Jesus i saonari, jala ikkon sai taasahon do Jahowa. Boasa? Alana godang do halak di humaliangta na so marlas ni roha. Didok roha ni nasida, dang porlu nasida marale-ale tu Debata. Adong do na porsea tu Debata, alai dang diboto nasida cara na sittong lao manomba Ibana. Adong do muse na mangasahon jolma. Unang ma tatiru nasida. Jadi aha ma na ikkon taulahon? Torus ma taparsiajari Hata ni Debata, tapakke ma pangalaho na imbaru, jala taoloi ma Debata asa torus dilinggomi Ibana hita.