Hamu Akka Naung Matua, Massai Arga do Hamu di Huria

Songon si Connie do tong perasaanmuna? Ra, nungnga martaon-taon hamu setia manomba Jahowa. Alai ala dibandingkon hamu situasimuna saonari dohot najolo, olo do gabe metmet rohamuna. Nang pe songon i, boi do hamu toktong marlas ni roha. Boha carana?

AHA DO NA DIPANGIDO JAHOWA SIAN HAMU?

Pikkirhon ma sukkun-sukkun on, ‘Aha do na dipangido Jahowa sian au?’ Parrohahon ma na disurat di 5 Musa 6:5. Didok disi, “Ikkon haholonganmuna do Jahowa Debatamuna sian nasa rohamuna, sian nasa ngolumuna, dohot sian nasa gogomuna.”

Songon na didok di ayat i, dipangido Jahowa do asa dihaholongi hamu Ibana sian nasa rohamuna, sian nasa ngolumuna, dohot sian nasa gogomuna. Alani i, unang ma bandingkon hamu dirimuna tu halak na asing. Manang unang ma bandingkon hamu aha na boi diulahon hamu saonari dohot najolo.

Rimangi ma on: Tikki poso dope hamu, marsitutu do hamu mangalehon na terbaik tu Jahowa sesuai tu situasimuna di tikki i. Alai saonari pe, toktong do dilehon hamu na terbaik sesuai tu situasimuna. Jadi, na diulahon hamu najolo dohot saonari sama-sama arga do i di Jahowa. Alana, sai marsitutu do hamu mangalehon na terbaik tu Ibana.

PENGALAMANMUNA BOI PATOGUHON NA ASING

On ma muse na boi diulahon hamu: Toktong ma hamu marpikkiran positif. Unang ma sai pikkirhon hamu akka na so boi be diulahon hamu. Alai, pikkirhon ma aha do na boi diulahon hamu saonari lao mangurupi halak na asing. Sasittongna, adong do na boi diulahon hamu saonari, na so boi diulahon hamu najolo tikki poso dope hamu. Aha ma i?

Ceritahon ma pengalamanmuna tu na asing. Parrohahon ma piga-piga contoh on:

Raja Daud: “Hea do au poso jala nungnga matua au saonari, alai dang hea dope huida halak na tigor marroha ditinggalhon, jala dang hea gellengna mangido-ido sipanganon.”—Ps. 37:25.

Si Josua: “Satokkin nai, mate nama au. Takkas do diboto hamu sian nasa rohamuna dohot sian nasa ngolumuna, dang adong nanggo sada pe sian janji ni Jahowa Debatamuna i na so saut. Saut do sude janjina i. Jala dang adong nanggo sada pe hatana i na so saut.”—Jos. 23:14.

Nungnga setia si Daud dohot si Josua manomba Jahowa saleleng marpulu taon, jala nungnga godang pengalaman ni nasida. Alani i, balga hian do pengaruh ni hata ni nasida i jala boi dihaporseai.

Dos songon i ma tong hamu. Molo nungnga martaon-taon hamu manomba Jahowa, pasti godang do pengalamanmuna. Jala nungnga diida hamu songon dia Jahowa mamasu-masu hamu dohot akka dongan na asing. Ceritahon ma pengalamanmuna i tu na asing. Pasti dipatogu do akka halak na mambege pengalamanmuna i, jala hamu pe pasti dipatogu do.—Rom 1:​11, 12.

Boi do hamu masipatoguan dohot akka dongan molo ro hamu marpungu. Si Connie na dipaboa nakkin mandok, “Las hian do rohakku tikki ro au marpungu tu Bale Harajaon. Alana disi boi do huhilala holong ni akka dongan. Jala lao patuduhon na holong rohakku tu nasida, hulehon do hadiah na sederhana tu nasida. Jadi, sai berupaya do au asa boi torus patoguhon akka dongan. Jala au pe dipatogu nasida do.”

MASSAI ARGA DO DI JAHOWA SUDE NA DIULAHON HAMU

Di Bibel, godang do disurat taringot naposo ni Jahowa na so tolap be mangulahon godang ulaon lao manomba Jahowa. Nang pe songon i, arga do nasida di Jahowa. Contohna, si Simeon. Halak Israel naung matua do ibana. Tikki ro ibana tu bagas joro, diida ibana do ra akka na poso mangulahon godang tugas na penting disi. Hape dang tolap be si Simeon mangulahon akka tugas sisongon i. Jadi olo do ra didok rohana, dang marguna be ibana di Jahowa. Alai di pandangan ni Jahowa, si Simeon on ‘halak na mangulahon na sittong jala na makkabiari Debata’. Asing ni i, dilehon Jahowa do kesempatan tu si Simeon boi mangida Jesus tikki poso-poso dope. Bahkan, dipakke Jahowa do si Simeon lao paboahon surirang taringot Jesus na lao gabe Messias. (Luk. 2:​25-35) On patuduhon na “ditogu-togu tondi parbadia do ibana”. Jadi na diida Jahowa sian si Simeon, i ma haporseaonna na togu i, dang umurna.

Pos ma rohamuna, arga do hamu di Jahowa nang pe dang godang be na boi diulahon hamu tu Ibana. Alana didok di Bibel, “Lomo do roha ni Debata tu halak na mangalehon sian ias ni rohana. Jala lomo do roha ni Debata tu halak na mangalehon sian na tolapna, dang sian na so tolapna.”—2 Kor. 8:12.

Jadi, pikkirhon ma akka aha na boi diulahon hamu saonari. Misalna, adong do corak dinas na boi diihutton hamu nang pe holan satokkin? Asing ni i, boi do ditelepon hamu manang dibahen hamu kartu ucapan lao patoguhon akka dongan? Memang, sederhana do ra na binahenmuna i. Alai ala nungnga leleng hamu manomba Jahowa, pasti massai patoguhon roha do i.

Nang pe dang godang be na boi diulahon hamu tu Jahowa, alai toktong do boi dilehon hamu na terbaik tu Ibana. Jala pasti las do rohamuna mangulahon i. Jaha ma sada pengalaman sian Afrika Timur di kotak “Ayat ni Bibel Paluahon Ibana”.

Ingot ma, gabe dipatogu do akka dongan ala diida nasida hamu toktong setia jala togu haporseaonmuna sahat tu saonari. Pos ma rohamuna, “tigor do Debata, dang lupahononna akka naung diulahon hamu dohot holong naung dipatudu hamu tu goarna i. Dipatuduhon hamu do i marhite mangurupi akka na badia i sahat tu saonari”.—Heb. 6:10.

TOKTONG MA URUPI NA ASING

Godang penelitian mandok, molo olo akka naung matua mangurupi na asing, gabe ussehat do nasida, dang pikun, jala boi ganjang umurna.

Memang molo diurupi hamu halak na asing, dang na gabe mulak poso hamu saonari. Haduan do di Harajaon ni Debata mulak poso hamu. Dung mamaretta Harajaon i, dang adong be dosa, na mambahen jolma matua jala mate.—Rom 5:12.

Nang pe songon i, toktong ma semangat hamu melayani Jahowa, termasuk ma mangurupi akka halak mananda Ibana. Molo diulahon hamu songon i, boi ma toktong togu haporseaonmuna jala boi ma gabe ussehat hamu. Alani i pos ma rohamuna, massai arga do hamu di Jahowa dohot di akka dongan.