Hamu Akka Naung Matua, Boi do Hamu Toktong Marlas ni Roha

1-2. Songon dia do pandangan ni Jahowa tu akka naposona naung matua? (Psalmen 92:​12-14; ida sampul.)

DI PIGA-PIGA inganan, sada hasangapon do molo nungnga matua. Alai di inganan na asing, berupaya do akka halak asa tetap awet muda. Misalna, molo diida nasida adong ubanna, pittor dicabut do i. Alai manang aha pe na dibahen nasida, tetap do nasida gabe matua.

² Alai, dang songon i pandangan ni Jahowa taringot akka naposona naung matua. (Poda 16:31) Dipatudos Jahowa do nasida songon hau na subur. (Jaha Psalmen 92:​12-14.) Boasa didok Ibana songon i? Biasana hau na subur, lomak bulungna, jala bagak nungnga marpulu taon umurna. Misalna, songon pohon sakura na di Jepang. Piga-piga pohon sakura na ubbagak nungnga marumur lobi sian saribu taon. Dos songon i ma akka naung matua. Massai uli jala arga do nasida di Jahowa. Dang ubanna i na diida Jahowa, alai akka sifat ni nasida na denggan i do. Jala dang soal songon dia situasi na diadopi nasida, toktong do nasida setia tu Jahowa.

3. Dipakke Jahowa do akka naung matua lao pasautton sakkapna. Paboa ma contohna.

³ Nang pe nungnga matua sasahalak, dang na gabe so marguna ibana di adopan ni Jahowa.a Buktina, jotjot do dipakke Jahowa akka naung matua lao pasautton sakkapna. Misalna, si Sara. Nungnga matua ibana tikki dipaboa Jahowa na lao marianakkon do ibana. Anakna i ma annon na gabe bangso na balga jala ompu ni Messias. (1 Mus. 17:​15-19) Asing ni i, si Musa. Nang pe nungnga matua ibana, disuru Jahowa do ibana mamboan halak Israel kaluar sian Mesir. (2 Mus. 7:​6, 7) Dung i, Apostel Johannes. Tikki nungnga matua ibana, ditogu-togu Jahowa do ibana lao manurat lima bukku na adong di Bibel.

4. Songon na didok di Poda 15:​15, aha do na mangurupi akka naung matua asa boi mangadopi sitaonon? (Ida gambar.)

⁴ Molo nungnga matua hita, pasti lam godang do sahitta jala maol do mangadopi sudena i. Godang do na mandok, “Maol do molo nungnga matua.” Alai molo toktong hamu marlas ni roha,b pasti boi do diadopi hamu sudena i. (Jaha Poda 15:15.) Di artikel on, lao tabahas ma aha do na boi diulahon akka naung matua asa toktong marlas ni roha. Dung i, tabahas ma aha do na boi taulahon lao mangurupi akka donganta naung matua di huria. Alai na parjolo, tabahas ma boasa dang sai mura toktong marlas ni roha molo nungnga matua hita.

NA MAMBAHEN MAGO LAS NI ROHA NI AKKA NAUNG MATUA

5. Aha do sipata na mambahen metmet roha ni akka naung matua?

⁵ Aha do na mambahen metmet rohamuna? Ra, ala dang godang be na boi diulahon hamu. Jala dang songon na uju i be gogomuna dohot kesehatanmuna. (Pjm. 7:10) I do na dihilala sahalak donganta borua na margoar si Ruby. Didok ibana, “Saonari, haccit do sude dagingku jala kaku. Lao mamakke baju pe maol do huhilala. Bahkan mamakke kaos kaki pe, maol do hurasa ala maol huangkat pathon. Tanganku pe hona radang sendi jala mati rasa. Alani i, gabe maol ma au mangulahon manang aha pe.” Songon i do tong na dihilala donganta si Harold, na hea melayani di Betel. Didok ibana, “Gogo hian do au tikki poso. Alai, saonari dang boi be huulahon akka hobikku, songon marbisbol. Gabe jut ma rohakku. Tikki marbisbol au, biasana didok akka halak do, ‘Si Harold ma na mangalempar bolana asa monang hita.’ Alai saonari, holan mangalempar bola i pe dang sanggup be au.”

6. (a) Aha do muse na boi mambahen metmet roha ni akka naung matua? (b) Lao mamutusson taringot mamboan kendaraan, aha do na porlu dipikkirhon akka naung matua? (Ida artikel “Cocok Dope Au Mamboan Kendaraan?” di majalah on.)

⁶ Metmet do tong rohamuna ala dang boi be sahalakmuna mangulahon akka ulaonmuna. Ikkon adong do ra na mangurus hamu, manang ikkon tinggal di jabu ni gellengmuna hamu. Asing ni i, ala nungnga moru kesehatan manang parnidaanmuna, gabe dang boi be bebas hamu manang tudia pe jala dang boi be mamboan kendaraan. Alani i, pasti lungun do rohamuna. Alai pos ma rohamuna, diattusi Jahowa do perasaanmuna. Ingot ma, massai arga do hamu di Jahowa dohot di halak na asing. Alana, holong hian do rohamuna tu Jahowa dohot tu akka dongan.—1 Sam. 16:7.

7. Molo didok rohamuna dang sanga diida hamu Armagedon, aha do na porlu diingot hamu?

⁷ Asing ni i, lungun do ra roha ni akka naung matua ala didok rohana dang sanga diida nasida ro Armagedon. Songon i do tong perasaanmuna? Taingot ma, pasti adong do alasan ni Jahowa umbahen na so ro dope ari i. (Jes. 30:18) Sabar do Ibana paimahon marjuta halak asa muba jala manomba Ibana. (2 Ptr. 3:9) Jadi coba ma pikkirhon on: Ala sabar Jahowa, gabe godang do halak na mananda Ibana. Olo do ra anggota keluargamuna sada sian i.

8. Gabe boha do sikapta molo marsahit hita?

⁸ Dang soal sadia umurta, molo marsahit hita, olo do ra hurang denggan hata manang pambahenanta tu na asing. Alai ujungna tasolsoli do i. (Pjm. 7:7; Jak. 3:2) Misalna, songon si Job. Naposo ni Jahowa na setia do ibana. Alai tikki susa ibana, ‘asal dipandokkoni ibana do hatana’. (Job 6:​1-3) Dos songon i ma hita akka naung matua. Ala marsahit, olo do ra gabe hurang denggan hata manang pambahenanta. Hape biasana dang songon i hita. Alai, unang ma alani situasitta i gabe lomo-lomotta tu na asing manang gabe sai menuntut tu nasida. Jala molo sanga tabahen haccit roha ni sasahalak, pittor minta maaf ma hita.—Mat. 5:​23, 24.

CARA ASA TOKTONG MARLAS NI ROHA

9. Aha do manfaatna molo olo hita diurupi halak na asing? (Ida gambar.)

⁹ Olo ma hita diurupi halak na asing. (Gal. 6:2) Memang, olo do ra segan hita mangido bantuan sian halak na asing. I ma na dihilala sahalak donganta borua na margoar si Gretl. Didok ibana, “Sipata, maila do au mangido bantuan ni halak na asing, ala mabiar au annon gabe repot nasida. Alai, ikkon huuba do cara marpikkirhi. Jala ikkon huakkui do na porlu au diurupi.” Ingot ma, molo olo hita diurupi halak na asing, boi do i mambahen las roha ni nasida. (Ul. 20:35) Jala hita pe, pasti las do rohatta ala taboto dihaholongi jala diparrohahon do hita.

10. Boasa penting mandok mauliate? (Ida gambar.)

¹⁰ Unang lupa mandok mauliate. (Kol. 3:15; 1 Tes. 5:18) Molo burju halak tu hita, las hian do rohatta. Alai, olo do sipata lupa hita mandok mauliate tu nasida. Jadi molo adong na mangurupi hita, tadok ma mauliate jala senyum ma hita tu nasida. Molo taulahon i, pasti las hian do roha ni nasida. Taida ma pengalaman ni donganta na margoar si Leah. Ibana mangurus akka naung matua di Betel. Didok ibana, “Adong sada donganta borua na huurus na sai mandok mauliate tu au. Bahkan dibahen ibana do kartu ucapan. Memang jeppek do hatana, alai berkesan do i di au. Setiap dilehon ibana kartu ucapan, las hian do rohakku ala huboto diargai ibana do bantuan na hulehon.”

11. Aha do na boi diulahon hamu lao mangurupi halak na asing? (Ida gambar.)

¹¹ Berupaya ma hamu mangurupi halak na asing. Molo dilehon hamu tikki dohot gogomuna lao mangurupi halak na asing, gabe dang sai masalahmuna be na dipikkiri hamu. Sada peribahasa Afrika mandok, akka naung matua i songon “perpustakaan” na marisi akka bukku parsiajaran na denggan. Alai, akka bukku i dang adong gunana molo holan dipajang disi. Jadi, hamu akka dongannami naung matua, berupaya ma hamu mambagihon na diboto hamu dohot pengalamanmuna tu akka na upposo sian hamu. Asa ditanda hamu nasida, bahen ma sukkun-sukkun jala denggan ma tangihon hamu nasida. Paboa ma songon dia Jahowa mangurupi hamu saleleng on, jala aha do manfaatna molo dioloi nasida Jahowa. Molo diapuli jala dipatogu hamu nasida, hamu pe pasti marlas ni roha do.—Ps. 71:18.

12. Songon na dipaboa di Jesaya 46:​4, aha do janji ni Jahowa tu akka naung matua? (Ida gambar.)

¹² Pangido ma gogo sian Jahowa. Sipata, olo do ra marsak jala loja hamu. Alai anggo Jahowa, “dang hea Ibana loja manang gale”. (Jes. 40:28) Dang hea habis gogo ni Jahowa, jala boi do lehononna gogona i tu hamu. (Jes. 40:​29-31) Bahkan marjanji do Ibana lao mangurupi hamu. (Jaha Jesaya 46:4.) Sai ditepati Jahowa do janjina. (Jos. 23:14; Jes. 55:​10, 11) Jadi molo martangiang hamu jala dihilala hamu holong dohot bantuan ni Jahowa, pasti gabe marlas ni roha do hamu.

13. Sian 2 Korint 4:​16-18, aha do na porlu taingot? (Ida gambar.)

¹³ Ingot ma, holan parsatokkinan do sitaononmuna. Didok di Bibel, holan parsatokkinan do usia tua dohot sahit. Molo diingot hamu on, pasti gabe lebih sabar jala boi ma hamu martahan mangadopi sitaononmuna. (Job 33:25; Jes. 33:24) Haduan gabe ussehat jala umgogo do hamu sian tikki poso dope hamu. Las do rohamuna mamboto on? (Jaha 2 Korint 4:​16-18.) Saonari, tabahas ma aha do na boi diulahon akka dongan di huria lao mangurupi akka naung matua?

TAURUPI MA NASIDA

14. Boasa penting manjuppangi jala manelepon akka naung matua?

¹⁴ Talehon ma tikkitta lao manjuppangi manang manelepon akka naung matua. (Heb. 13:16) Biasana, kesepian do akka naung matua. Taida ma pengalaman ni sahalak donganta bawa naung matua, na so boi be kaluar sian jabu. Didok ibana, “Bosan hian do au. Sipata, huhilala hira singa na matua na dihurung do au. Lungun hian do rohakku jala marsak.” Molo tajuppangi akka naung matua, boi ma dihilala nasida na holong rohatta tu nasida jala arga do nasida di hita. Jadi, talehon ma tikkitta lao manjuppangi manang manelepon akka naung matua di huriatta. Alai ala sibuk hita, olo do ra dang adong tikkitta lao mangulahon i. Alani i, aha do na boi tabahen asa boi taulahon “na urrikkot”, termasuk ma manjuppangi akka naung matua? (Plp. 1:10) Tabahen ma jadwal andigan naeng mangirim pesan, manelepon, manang manjuppangi nasida. Dung i, bahen ma jadwal i di kalendermuna. Unang ma paima sappe adong tikki na pas.

15. Aha do na boi taulahon rap dohot akka naung matua?

¹⁵ Olo do ra bingung hamu aha na lao dihatai manang diulahon hamu dohot akka naung matua. Alai, unang pola bingung. Patudu ma molo hamu ale-ale na burju. (Poda 17:17) Boha carana? Makkata-hatai ma hamu dohot nasida sebelum manang dung sae marpungu. Boi do disukkun hamu ayat favorit dohot pengalaman ni nasida na lucu tikki dakdanak. Asing ni i, ajak ma nasida rap manonton JW Broadcasting^®. Boi do muse dilehon hamu bantuan na asing. Misalna, mang-update tablet manang HP ni nasida dohot mandownload publikasi na terbaru. Sahalak donganta na margoar si Carol mandok, “Boi do diajak hamu akka naung matua mangulahon ulaon na dihalomohon rohamuna. Nang pe nungnga matua au, alai lomo dope rohakku belanja, rap mangan dohot akka dongan, jala mardalani.” Sahalak donganta na margoar si Maira mandok, “Adong donganku naung marumur 90 taon. Hape au 33 taon dope. Ala jotjot hami rap manonton jala margait-gait, gabe lupa do au uttua do hape umurna sian au. Jala molo adong masalah, rap marsiurupan do hami.”

16. Boasa porlu tadongani akka naung matua marubat?

¹⁶ Dongani ma nasida marubat. Boi do tataruhon nasida marubat tu dokter. Alai denggan do tong molo tadongani nasida manjuppangi dokter manang perawat. Tujuanna, asa denggan nasida diparrohahon jala diurupi. (Jes. 1:17) Asing ni i, boi do tasurat aha na didokkon dokter i. Sahalak donganta naung matua na margoar si Ruth mandok, “Molo holan sahalakku marubat, biasana dang porsea dokter i tu au. Sipata, didok dokter i do, ‘Ai so marsahit inang. Holan perasaanmu do i.’ Alai molo adong na mandongani au, gabe denggan do au diparrohahon. Jadi, mandok mauliate do au tu akka dongan na rade mandongani au.”

17. Songon dia do carana asa boi rap marbarita hamu dohot akka naung matua?

¹⁷ Rap marbarita ma hamu dohot nasida. Adong do piga-piga donganta naung matua na so tolap be marbarita sian jabu tu jabu. Jadi pikkirhon ma on: Boi do diajak hamu nasida rap manjaga gerai? Ra, boi do diboan hamu kursi asa boi hundul nasida di jonok ni gerai. Boi do tong diajak hamu nasida tu studimuna. Manang, boi do diajak hamu studimuna asa marsiajar di jabu ni nasida. Asing ni i, boi do diatur akka sintua asa dibahen parpunguan lao marbarita di jabu ni akka donganta naung matua. Molo berupaya hita makkaholongi akka naung matua jala taargai nasida, pasti las do roha ni Jahowa.—Poda 3:27; Rom 12:10.

18. Aha do na lao tabahas di artikel na mangihut?

¹⁸ Sian artikel on, taboto ma massai holong do roha ni Jahowa tu akka naung matua jala arga do nasida di Ibana. Tatiru ma Jahowa. Hamu akka dongannami naung matua, pasti dang mura situasimuna on. Alai, boi do hamu toktong marlas ni roha ala rade do Jahowa mangurupi hamu. (Ps. 37:25) Ingot ma, haduan gabe ussehat jala umgogo do hamu sian tikki poso dope hamu. Alai, adong do tong akka donganta na mangurus keluarga manang dongan naung matua dohot na marsahit. Boha do carana asa toktong nasida marlas ni roha? Tabahas ma i di artikel na mangihut.