Tikki Tarpikkir Hamu Naeng Bunu Diri

Si Adriana na tading di Brasil mandok, “Torus do sai lungun rohakku. Jadi didok rohakku tumagon ma au mate.”

HEA DO lungun hian dihilala hamu sappe didok rohamuna tumagon ma mate? Molo hea, pasti diattusi hamu do songon dia pakkilalaan ni si Adriana. Jotjot do ibana paholsohu, marlungun ni roha, jala mandele. Didok dokter hona depresi klinis do ibana.

Taida ma muse pengalaman ni sahalak bawa na sian Jepang na margoar si Kaoru. Mangurus natorasna naung matua jala naung marsahit-sahit do ibana. Didok ibana, “Tikki i stres hian do au ala godang hian karejo di kantor. Gabe dang lakku be au mangan jala dang renges au modom. Didok rohakku tumagon ma au mate asa sae sude masalah on.”

Sahalak bawa sian Nigeria na margoar si Ojebode mandok, “Torus do lungun rohakku, bahkan boi do sappe tangis au. Gabe hulului ma cara lao bunu diri.” Tuani ma dang saut si Ojebode, si Kaoru, dohot si Adriana bunu diri. Alai ganup taon, hampir 800.000 halak ma na mate bunu diri.

NA BOI MANGURUPI

Unggodang do bawa na bunu diri. Ala somalna maila do nasida mangido asa diurupi. Hape hea do didok Jesus, porlu do dokter di halak na marsahit. (Lukas 5:31) Alani i molo tarpikkir hamu naeng bunu diri, unang ma maila mangido asa diurupi. Godang halak na depresi boi do gabe lam denggan pakkilalaanna ala marubat tu dokter. On ma na diulahon si Ojebode, si Kaoru, dohot si Adriana umbahen na boi nasida martahan.

Olo do ra dilehon dokter ubat manang konseling tu halak na depresi i. Manang duassa do dibahen tu ibana. Akka keluarga dohot akka dongan pe, ikkon sabar do jala rade mangurupi. Alai holan Jahowa do ale-ale na terbaik. Dilehon Ibana do Bibel lao mangurupi hita.

JALAN KELUAR NA PERMANEN

Ikkon leleng do diubati akka halak na depresi jala ikkon olo do nasida mambahen penyesuaian di ngolu ni nasida. Molo depresi hamu, boi do hamu marlas ni roha molo diingot hamu akka na lao masa di ari na naeng ro. Songon i ma na diulahon si Ojebode. Didok ibana, “Tarpaima do au saut Jesaya 33:24 na mandok, na lao ro ma tikkina dang adong be halak di tano on na mandok ‘Marsahit do au.’” Songon si Ojebode boi do tarapul rohatta molo taingot janji ni Debata na mandok, dang na lao adong be “na haccit” di “tano na imbaru”. (Pangungkapon 21:1, 4) Lapatanna dang adong be jolma na marsahit, termasuk na depresi. Jala akka na mambahen jolma gabe depresi pe, “dang tarsunggul be i di bagasan roha”.—Jesaya 65:17.

Ayat ni Bibel na Boi Mangurupi Hamu

Diattusi Debata do perasaanmuna.

“Au do Jahowa Debatam na maniop tangan kananmu. Jala Au do Debata na mandok tu ho, ‘Unang ho mabiar. Urupanku do ho’.”—Jesaya 41:13.

Jahowa do na paling mangattusi perasaanta, jala lomo do rohana mangurupi hita.

Rimangi ma Hata ni Debata.

“Dipangido [si Elia] ma asa mate ibana. Didok ma, ‘Ale Jahowa pamate ma au!’”—1 Raja-Raja 19:4.

Didok si Ojebode ma, “Tikki mangarimangi isi ni Bibel, gabe huboto ma hea do Panurirang Elia makkilala songon na huhilala.”

Marsiajar ma sian akka contoh na adong di Bibel.

“Nungnga hubahen [Jesus] pangidoakku tu Debata taringot tu ho [Petrus] asa unang mago haporseaonmu.” —Lukas 22:32.

Dung tolu hali si Petrus mansoadahon Jesus, gabe lungun ma rohana jala sai tangis ma ibana. Didok si Kaoru, “Pengalaman ni si Petrus mangurupi au mamboto na parduli do Jahowa dohot Jesus tu perasaan ni si Petrus. On patoguhon rohakku.”

Jala akka na mambahen jolma gabe depresi pe, “dang tarsunggul be i di bagasan roha”.—Jesaya 65:17