Songon dia do Carana Mangatasi Depresi?

Jaha ma akka tips taringot cara mangatasi depresi asa lam denggan perasaanmu.

• Aha do na lao ulahononmu?

• Boha do molo parah depresim?

• Akka na boi ulahononmu

• Akka ayat ni Bibel na boi mangurupi ho

Aha do na lao ulahononmu?

Pikkirhon ma dua contoh on:

Torus do sai lungun roha ni si Jennifer. Ganup ari sai tangis do ibana. Dang olo ibana pajuppang dohot halak na asing. Dang selera ibana mangan, maol modom, jala dang boi konsentrasi. Gabe didok roha ni si Jennifer ma, ‘Boasa boi au gabe songon on? Boi dope muse au marlas ni roha songon najolo i?’

Sahalak murid teladan do najolo si Mark. Alai saonari, dang lomo rohana sikkola. Akka nilaina di sikkola pe gabe dang denggan. Najolo lomo hian do rohana olahraga. Alai saonari, hira na so adong do gogona lao mangulahon i. Gabe bingung do akka donganna mangida ibana. Natua-tuana pe gabe khawatir do. Tutu do boi masa songon on tu akka na poso? Manang na adong do na sala di nasida?

Jotjot do dihilala ho songon na dihilala si Jennifer manang si Mark? Molo jotjot, aha do na ikkon ulahononmu? Adong dua na boi dipillit ho:

1. Berupaya lao mangatasi i sahalakmu

2. Paboahon i tu halak naung dewasa na boi dihaporseai ho

Pilihan A hira na denggan do idaon. Apalagi molo malas hamu makkatai. Alai pilihan na denggan do i? Didok di Bibel, “Dumenggan do dua halak sian na sahalak. . . . Ai molo madabu na sada, boi ma na sada nai manogu. Alai boha ma molo madabu na sahalak i jala dang adong na mangurupi?”—Parjamita 4:9, 10.

Pikkirhon ma contoh on: Bayakkon ma tersesat ho di sada inganan na berbahaya. Golap do inganan i jala godang akka halak na jahat. Aha ma na lao diulahon ho? Asa boi ho kaluar sian inganan i, dia do na dumenggan? Ho sandiri na mangalului dalan asa boi kaluar, manang dipangido ho bantuan sian halak na boi dihaporseai ho?

Depresi i sarupa ma songon inganan na berbahaya i. Memang sipata, tikki lungun rohatta boi do i mago sandiri. Alai molo sai torus do lungun roham, ikkon dipangido ho do halak na asing lao mangurupi ho.

DIDOK BIBEL: ‘Halak na papulikkon dirina . . . dang olo mangihutton poda na denggan.’—Poda 18:1.

Pilihan B i ma, makkatai tu natua-tuam manang tu halak naung dewasa na boi dihaporseai ho. Olo do ra hea masa tu nasida songon na masa tu ho jala marhasil mangatasi i. Boi do ho marsiajar sian nasida.

Ra didok roham do, ‘Dang diattusi natua-tuakku aha na huhilala!’ Alai tutu do songon i? Nang pe dang sarupa situasi na masa tu ho tu situasi ni nasida najolo, alai olo do ra hea dihilala nasida songon na dihilalami. Jadi, boi do ra natua-tuam mangurupi ho!

DIDOK BIBEL: “Adong do bisuk di akka na godang umurna, jala adong do parbinotoan di akka na matua.”—Job 12:12.

Intina: Molo diceritahon ho tu natua-tuam manang tu halak naung dewasa na boi dihaporseai taringot perasaanmu, ra boi do dilehon nasida saran na denggan.

Boha do molo parah depresim?

Molo ganup ari do lungun roham, ra nungnga marsahit depresi klinis ho manang depresi na parah. Jadi porlu do ho marubat.

Tikki remaja, biasana dang stabil dope emosim. Ra, sarupa songon i ma gejala ni depresi. Alai molo nungnga marsahit depresi ho, biasana maol do dikendalihon ho emosim jala dang boi i pittor mago. Jadi molo sai torus lungun roham, coba ma hatai i tu natua-tuam asa diboan ho marubat tu dokter.

DIDOK BIBEL: “Dang porlu pangubati tu halak na sehat, tu na marsahit do.”—Mateus 9:12.

Molo nga parah depresimi, unang pola maila ho. Memang, jotjot do depresi akka na poso, alai boi dope i dipamalum. Molo burju do akka donganmu, pasti holong do roha ni nasida tu ho.

Tips: Toktong ma sabar. Porlu do tikki asa boi malum sian depresi. Jadi, wajar do molo sipata boi dikendalihon ho perasaanmu, alai sipata dang boi i dikendalihon ho.a

Akka na boi diulahon ho

Dang soal parah manang na dang depresi na dihilala ho, adong do na boi diulahon ho asa unang sai lungun roham. Misalna, asa boi stabil emosimuna, taratur ma olahraga, mangallang sipanganon na sehat, jala cukkup ma hamu istirahat. (Parjamita 4:6; 1 Timoteus 4:8) Asing ni i, boi do tong disurat ho songon dia perasaanmu, tekadmu asa boi malum, dohot tikki gagal manang tikki marhasil ho mengendalihon emosim.

Molo depresi ho manang holan mengalami perubahan emosi biasa, ingot ma: Molo dipangido ho bantuan sian na asing jala berupaya ho asa malum, boi do diatasi ho depresimi.

Akka ayat ni Bibel na boi mangurupi ho

• “Jonok do Jahowa tu halak na mandele. Dipalua Ibana do akka halak na hancur rohana.”—Psalmen 34:18.

• “Pasahat ma holso ni roham tu Jahowa, sai urupanna do ho. Dang pasombuonna madabu halak na tigor marroha.”—Psalmen 55:22.

• “Au do Jahowa Debatam na maniop tangan kananmu, jala Au do Debata na mandok tu ho, ‘Unang ho mabiar. Urupanku do ho.’ ”—Jesaya 41:13.

• “Unang ma holsoan hamu lao mamikkiri taringot ari sogot.”—Mateus 6:34.

• “Pangido hamu ma saluhutna tu Debata. . . .  Lehonon ni Debata ma tu hamu hadameon na so boi diattusi jolma, na boi manjaga roha.”—Pilippi 4:6, 7.