Salpuhonon ni Debata nama Sitaononta Satokkin nai

Hea do Panurirang Habakuk mandok songon on, “Ale Jahowa, sadia leleng nai au jou-jou tu Ho lao mangido asa diurupi? Andigan do tangihononmu au? Sahat tu andigan do pangidookku asa diurupi Ho au? Andigan do dipalua Ho au sian hajahaton?” (Habakuk 1:2, 3) Boasa ma didok ibana songon i? Na hurang do haporseaonna tu Debata? Daong. Las do roha ni Debata mangida ibana. Alani i ma didok Debata tu si Habakuk nungnga ditottuhon Ibana tikki lao pasohon sude sitaonon.—Habakuk 2:2, 3.

Tikki susa hita manang keluargatta, olo do gabe tadok na palambathu Debata mangurupi hita. Jala didok rohatta saonari ma nian Debata bertindak. Hape didok di Bibel, “Dang na lambat Jahowa pasautton janjina, songon na nidok ni na deba. Sabar do Ibana tu hamu, ala dang lomo rohana diripasson manang ise pe, alai naeng ma sude jolma marhamubaon.”—2 Petrus 3:9.

ANDIGAN DO DEBATA BERTINDAK?

Satokkin nai! Sian dia taboto? Hea do didok Jesus, na lao adong do sada sundut (generasi) na mangida akka “tanda ni panutup ni jaman on”. Jala na lao rap masa do sude akka tanda i. (Mateus 24:3-42) Nungnga masa na didok ni Jesus i saonari. Jadi na lao bertindak nama Debata satokkin nai.a

Alai boha ma cara ni Debata lao pasohon sude sitaonon? Tikki di tano on Jesus, dilehon Debata do tu ibana huaso lao mangurupi akka jolma na marsitaonon. Taida ma piga-piga contohna.

Bencana Alam: Tikki marparau Jesus dohot akka apostelna di Laut Galilea, ro ma alogo na massai gogo jala naeng lonong ma parau ni nasida. Alai dipatudu Jesus ma di tikki i, na boi do ibana dohot Bapakna mengendalihon kekuatan alam. (Kolosse 1:15, 16) Holan songon on do didok Jesus, “Hus! So ma!” Boha do ujungna? “So ma alogo i. Gabe tenang ma laut i.”—Markus 4:35-39.

Sahit: Ditanda halak do Jesus boi pamaluppon na mapitung, na pakpang, na solpoton (epilepsi), na marsahit kusta, dohot akka sahit na asing. “Dipamalum do sude na marsahit i.”—Mateus 4:23, 24; 8:16; 11:2-5.

Haraparon: Dilehon Jahowa do huaso tu Jesus lao mambahen godang sipanganon marhite mukjizat. Molo tajaha di Bibel, dua hali ma Jesus mangalehon mangan marribu halak.—Mateus 14:14-21; 15:32-38.

Hamatean: Tikki di tano on Jesus, adong tolu halak na dipahehe ibana. Sahalak sian na tolu i, adong do naung opat ari mate. Sian on gabe taboto ma, sanggup do Jahowa mambahen mangolu muse halak naung mate.—Markus 5:35-42; Lukas 7:11-16; Johannes 11:3-44.