Nungnga Dipauba Ibana Cara Marpikkirna

ADONG sahalak doli-doli sian Tarsus na margoar si Saulus.a Diida ibana do tikki dipamate halak Jahudi si Stepanus. Setuju do si Saulus tikki na dipamate i si Stepanus. Alana pos do rohana agama Jahudi do agama na sittong. Dukkon i, ‘sai diancam si Saulus do akka sisean’ ni Jesus na di Jerusalem. Dipenjarahon ibana do godang sisean ni Jesus, jala naeng dibunu ibana do nasida. Alani i, gabe godang ma sisean ni Jesus na ikkon melarikan diri sian Jerusalem. Alai dang cukkup i dihilala si Saulus. Naeng dianiaya ibana do akka sisean ni Jesus na adong di inganan na asing. Alani i, dibahen ibana ma surat tu sintua ni malim asa diloas ibana manakkup akka sisean ni Jesus na adong di Kota Damaskus.

Dung dapot ni si Saulus surat ijin i, lao ma ibana dohot akka donganna tu Damaskus na di sabola utara. Di tikki i, dang diboto si Saulus naung dipahehe Jesus jala nungnga di surgo rap dohot Bapakna. Diboto Jahowa dohot Jesus do sude taringot si Saulus. Diida nasida do godang akka sifat na denggan na adong di si Saulus. Diboto nasida do na boi si Saulus muba, jala godang na boi ulahononna haduan tu Jahowa. Tikki nga jonok si Saulus dohot akka donganna i tu Damaskus, toppu ma ro cahaya sian langit tu sakaliling ni nasida. ‘Uttiur do cahaya i sian mataniari’. Gabe dabu ma si Saulus tu tano jala dang boi be diida ibana manang aha.

Dung i, dibege si Saulus ma soara sian surgo na mandok, “Saulus, Saulus, boasa dibahen ho na haccit tu au? Ho sandiri do na susa molo sai disipaki ho tukkot bosi.” Di tikki i, somal do akka halak mamakke tukkot bosi na piccur ujungna lao manogu-nogu lombu. Molo sai disipaki lombu i tukkot bosi i, gabe haccit ma dihilala lombu i. Sian hata on gabe diattusi si Saulus ma, sarupa ma ibana songon lombu na sai mangalo parmahanna. Dung i disukkun si Saulus ma, “Ise do ho Tuan?” Tarsonggot do roha ni si Saulus dung mambege soara i mandok, “Jesus do au, na disiksami.” Disuru Jesus do asa jongjong si Saulus, jala dilehon ma tugas tu ibana. Ikkon diurupi si Saulus do akka halak asa mamboto hasittongan taringot Jesus dohot barita na uli taringot Harajaon ni Debata.

Dung dibege si Saulus sude na didokkon Jesus, gabe disadari ibana ma, na kejam do ibana saleleng on jala ginjang rohana. Jala diboto ibana ma na ikkon bertobat do ibana. Dang boi dope si Saulus marnida. Alani i, ditogu-togu akka donganna ma ibana masuk tu Damaskus. Saleleng tolu ari, dang mangan jala dang minum si Saulus lao patuduhon na disolsoli ibana kesalahanna i. Dang holan i, leleng do si Saulus martangiang tu Jahowa. Jala dipaboa ibana ma na manolsoli do ibana ala nungnga menganiaya Anak haholongan ni Debata. Dung i, disuru Jesus ma sahalak sisean na margoar si Ananias lao manjuppangi si Saulus. Nang pe di mulana mabiar si Ananias, alai olo do ibana lao. Tikki dibahen si Ananias tanganna tu ulu ni si Saulus, ‘madabu ma na songon sisik ni dekke sian mata ni si Saulus’. Gabe boi ma ibana marnida muse! Nungnga bertobat be si Saulus. Lam serep do rohana jala lam marbisuk. Dung i, ‘jongjong ma ibana jala tardidi’.

Dung gabe halak Kristen si Saulus, pittor marbarita do ibana. Alai dang tu Jerusalem ibana marbarita. Tu sinagoga na di Damaskus do ibana lao. Pasti dang mura di si Saulus mangulahon on. Ra, diboto halak Jahudi na disi do na hea dianiaya ibana akka sisean ni Jesus. Jadi, martangiang ma si Saulus mangido habaranion. Bayakkon ma, pasti tarsonggot do nasida tikki didok si Saulus nungnga sala be na diulahon ibana saleleng on, jala nungnga gabe sisean ni Jesus ibana. Alai dang holan i na diulahon si Saulus. Didok di Bibel, “Lam malo ma si Saulus mangajari. Boi do takkas dipatuduhon ibana, Jesus i do Kristus. Alani i, dang taralo ni halak Jahudi na di Damaskus be hatoranganna i.”

Tikki tinggal di Damaskus, sanga do si Saulus lao tu Arab, ra tu padang gurun na di Siria. Memang, dang dipaboa di Bibel aha alasanna lao tusi. Ra, asa boi do ibana martangiang sahalakna tu Jahowa jala bagas mangarimangi tugas na baru na dilehon Jesus tu ibana. Saleleng ni ngoluna, torus do si Saulus marsiajar jala mangarimangi Hata ni Debata. Nungnga dipauba ibana be cara marpikkirna. Di pudian ni ari, dijujui ibana do akka donganna na di Rom asa mangulahon na sarupa.—Rom 12:2.

Dang boi dilupahon si Saulus sude akka na jahat na hea diulahon ibana. Bahkan martaon-taon dukkon i didok ibana do, “Ginjang do rohakku najolo, huleai do Debata jala hulelei naposona.” (1 Tim. 1:13) Asing ni i, disolsoli si Saulus do ala setuju ibana dipamate si Stepanus. (Ul. 22:​19-21) Alai, aha do na mangurupi si Saulus asa unang torus merasa bersalah? Diingot ibana do naung diampuni Jahowa dohot Jesus ibana, jala torus do diurupi nasida ibana.

Dung hira-hira tolu taon si Saulus di Damaskus, ikkon melarikan diri do ibana sian kota i. Alana naeng dipamate halak Jahudi do ibana. Diurupi akka sisean na disi do si Saulus. Dipamasuk ma ibana tu bagasan karanjang jala dipaturun sian tembok ni kota. Dung i, lao ma si Saulus tu Jerusalem. Nang pe songon i, godang nai dope na lao diulahon si Saulus di ulaon marbarita.

Jaha ma ceritana di:

• Ulaon ni Apostel 8:​1-3; 9:​1-25; 26:​4, 5, 9-20

• Galatia 1:​13-18

Na lao dibahas:

Sian kisah on, boha do cara ni si Saulus na sian Tarsus patuduhon habaranion?

Bagas ma Parsiajari

1. 1. Boasa didok si Saulus “kota na tarbarita” do Tarsus huta hatubuanna i? (Ul. 21:39; w99 15/5 30 ¶1-wcgr) A

   Alusmuna

   

   Todd Bolen/BiblePlaces.com

2. 2. Boasa boi tadok na takkas do diboto si Saulus taringot kebiasaan dohot budaya ni halak Jahudi, Junani, dohot Rom? (bt 62, kotak ¶1-3)

   Alusmuna

3. 3. Tikki dipatuduhon Jesus dirina tu si Saulus, didok si Saulus do molo ibana “songon poso-poso na tubu di na so tikkina”. Aha do maksudna? (1 Kor. 15:8; w22.09 27)

   Alusmuna

4. 4. Aha do bukti na patuduhon sittong do hatorangan na disurat si Lukas di Ulaon ni Apostel 9:​11, 24, 25? (g03 8/2 24-26-wcgr) B

   Alusmuna

   

   Photo by ROLOC Color Slides

Pikkirhon ma Aha Parsiajaranna

• Serep do roha ni si Saulus. Dijalo ibana do bantuan sian si Ananias dohot sian akka dongan na asing. (Ul. 9:​17, 18; Kol. 4:​10, 11) Di situasi na songon dia do hita porlu manjalo bantuan sian akka dongan?

  Alusmuna

• Boi do gabe ginjang roha ni si Saulus ala timbo sikkolana jala godang naung dicapai ibana najolo. Boi do tong gabe torus ibana merasa bersalah ala hea mangulahon na sala. Alai dang diloas si Saulus i sude mangabbati ibana lao mangalehon na dumenggan tu Jahowa. (Plp. 3:​4-8; 1 Tim. 1:​12-16) Songon dia do hita boi maniru ibana? C

  Alusmuna

  

• Songon dia do caramuna maniru habaranion na dipatudu si Saulus di kisah on?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Sian kisah on, aha do na mambahen las rohamuna ala dohot si Saulus dipillit gabe dongan ni Kristus mamaretta di surgo?

  Alusmuna

Ida ma Muse on

Tonton ma video taringot sahalak bawa na hea menganiaya Saksi Jahowa songon si Saulus, alai ujungna muba gabe naposo ni Jahowa na bersemangat.

Holong do na Mambahen Muba “si Saulus na sian Sado” (5:50)

Aha do na boi taparsiajari sian si Saulus taringot taratur belajar pribadi, patuduhon holong tu na asing, jala marserep ni roha?

“Patogu ma Haporseaonmuna tu Jahowa Songon si Paulus” (w08 15/5 21-25-wcgr)