Pangungkapon

7 Dung salpu i, huida ma opat suru-suruan jongjong di opat suhi ni tano on. Ditiop nasida ma alogo na ro sian opat ujung ni tano on, asa unang mangullus alogo i tu tano, tu laut manang tu angka hau na dia pe. 2 Dung i huida ma suru-suruan na asing nangkok sian timur* mamboan meterai ni Debata na mangolu i. Gogo ma didok ibana tu opat suru-suruan na diloas manegai tano on dohot laut, 3 ninna ma, “Unang segai tano on nang laut nang angka hau, paima dibahen hami meterai tu angka naposo ni Debata di pardompahan ni nasida.”

4 Jala hubege ma godang ni halak na hona meterai i 144.000 halak. Nasida ro sian ganup marga ni halak Israel:

5 Sian marga Juda dimeterai ma 12.000 halak;

sian marga Ruben 12.000 halak;

sian marga Gad 12.000 halak;

6 sian marga Aser 12.000 halak;

sian marga Naptali 12.000 halak;

sian marga Manasse 12.000 halak;

7 sian marga Simeon 12.000 halak;

sian marga Lepi 12.000 halak;

sian marga Isasar 12.000 halak;

8 sian marga Zebulon 12.000 halak;

sian marga Josep 12.000 halak;

jala sian marga Benjamin 12.000 halak ma na dimeterai.

9 Dung salpu i huida ma sada punguan bolon na so habilangan ni jolma, na ro sian saluhut bangso, marga, dohot bahasa. Jongjong do nasida di jolo ni habangsa i dohot di jolo ni Anak ni Biru-biru i mamangke jubah na bontar, jala adong do di tangan ni nasida dangka ni hau palem.* 10 Sai didok nasida do gogo, “Sian Debatanta na hundul di habangsa i dohot sian Anak ni Biru-biru i do ro haluaon.”

11 Jongjong ma sude suru-suruan i di humaliang ni habangsa i, di humaliang ni angka sintua, dohot di humaliang ni opat kerubim i. Marsinggang ma nasida di jolo ni habangsa i manomba Debata, 12 huhut mandok, “Amen! Puji-pujian, hamuliaon, habisuhon, hamauliateon, hasangapon, huaso, dohot hagogoon ma di Debatanta saleleng ni lelengna. Amen.”

13 Disungkun sahalak sian angka sintua i ma ahu, “Ise do angka halak na mamangke jubah na bontar i? Sian dia do nasida ro?” 14 Hudok ma tu ibana, “Ale Tuanku, ho do na mamboto i.” Dung i didok ibana ma tu ahu, “Nasida do na malua sian hasusaan bolon. Nunga disunsi nasida jubah nasida jala bontar dibahen di bagasan mudar ni Anak ni Biru-biru i. 15 Alani i do nasida di jolo ni habangsa ni Debata jala marhobas tu Ibana arian nang borngin di bagas jorona. Jala linggoman ni Ibana na hundul di habangsa i ma nasida.* 16 Ndang male be nasida manang mauas, jala ndang taonon ni nasida be las ni ari dohot na mohop. 17 Ai parmahanon ni Anak ni Biru-biru na di tonga-tonga ni habangsa i ma nasida. Boanonna ma nasida tu mata mual ni aek hangoluan, jala apusan ni Debata ma nasa ilu-ilu sian mata nasida.”