Pangungkapon

6 Dung i huida ma dibungka Anak ni Biru-biru i sada sian pitu segel i. Hubege ma sada sian opat kerubim* i marsoara songon ronggur mandok, “Ro ma ho!” 2 Huida ma sada hoda na bontar. Na hundul di hoda i maniop sada busur jala dilehon do mahkota tu ibana. Laho ma ibana mamorangi musuna jala manaluhon nasida.

3 Tingki dibungka ibana segel na paduahon, hubege ma kerubim na paduahon mandok, “Ro ma ho!” 4 Huida ma ro hoda na asing, i ma hoda na rara songon api. Diloas do na hundul di hoda i mambuat hadameon sian tano on, alani i gabe masibunuan ma angka jolma. Dung i dilehon ma tu ibana sada podang na balga.

5 Tingki dibungka ibana segel na patoluhon, hubege ma kerubim na patoluhon mandok, “Ro ma ho!” Dung i huida ma sada hoda na birong jala na hundul di hoda i maniop sada timbangan. 6 Hubege ma soara sian tonga-tonga ni opat kerubim i na mandok, “Saliter gandum argana sadinar* jala tolu liter barli argana sadinar. Otik-otik ma pangke miak jetun dohot anggur i.”

7 Tingki dibungka ibana segel na paopathon, hubege ma soara ni kerubim na paopathon mandok, “Ro ma ho!” 8 Dung i huida ma sada hoda na langan-langan.* Na hundul di hoda i margoar Hamatean jala mangihut do Kuburan* jonok di pudina. Dilehon do tu nasida huaso laho mangarajai saparopat portibi on laho mambunu marhite podang na ganjang, haraparon, sahit na parohon hamatean dohot binatang buas.

9 Tingki dibungka ibana segel na palimahon, huida ma di toru ni langgatan i mudar ni angka halak na hona bunu. Alani hata ni Debata dohot alani ulaon ni nasida marbarita do nasida hona bunu. 10 Dung i gogo ma didok nasida, “Ale Tuan Natumimbul, na badia jala na sintong, sadia leleng nai asa uhumonmu jala baloshononmu mudarnami tu angka halak na maringanan di tano on?” 11 Jala dilehon ma tu nasida ganup jubah na bontar. Didok ma tu nasida asa maradian satongkin, paima gok bilangan ni angka naposo dongan ni nasida dohot haha anggi ni nasida na tarbunu songon nasida.

12 Dung i huida ma dibungka ibana segel na paonomhon. Masa ma gempa* na mansai gogo, marbirong ma mata ni ari songon goni na birong* jala marrara ma bulan songon mudar. 13 Mardabuan ma angka bintang tu tano on songon parbue ni hau ara na tata na mardabuan alani alogo na gogo. 14 Mago ma langit i songon harotas na digulung jala pinda ma ganup dolok dohot pulo sian ingananna. 15 Martabuni ma angka raja ni tano on, angka parpangkat na timbo, angka komandan militer, na mora, na gogo, angka hatoban dohot angka halak na merdeka di angka liang dohot di holang-holang ni angka batu na di dolok. 16 Dung i sai didok nasida ma tu angka dolok dohot tu angka batu i, “Tipa jala tabunihon ma hami sian jolo ni Ibana na hundul di habangsa i dohot sian rimas ni Anak ni Biru-biru i. 17 Ai nunga ro ari rimas ni nasida na mansai balga i, ise ma na boi malua sian i?”