1 Johannes

2 Hamu angka anakkonku, husurat do on tu hamu asa unang diulahon hamu dosa. Alai molo adong na mardosa, adong do na mangurupi hita na rap dohot Ama i, i ma Jesus Kristus na mangulahon lomo ni roha ni Debata. 2 Ibana do pelean pardamean tu angka dosanta, alai ndang holan dosanta dohot do dosa ni saluhut portibi on. 3 Molo tongtong taoloi angka parentana, on ma patuduhon na tatanda ibana. 4 Molo adong na mandok, “Hutanda do ibana,” alai ndang dioloi angka parentana, pargabus do i jala ndang adong hasintongan di bagasan dirina. 5 Alai manang ise na mangoloi hatana, i ma patuduhon na tutu ibana mangkaholongi Debata. Sian i ma taboto na marsada hita dohot ibana. 6 Manang ise na mandok marsada dohot ibana, ingkon ihuthononna do bogas ni patna.

7 Hamu angka na hinaholongan, ndang parenta na imbaru na husurathon tu hamu, alai parenta na leleng i do naung binegemuna sian mulana i. Parenta naung leleng on, i ma hata naung binegemuna. 8 Nang pe songon i, parenta na imbaru do na husurat on tu hamu, na sintong di bagasan ibana dohot di bagasan dirimuna. Ai na laho salpu nama haholomon i jala nunga marsinondang hatiuron na tutu i.

9 Manang ise na mandok di bagasan hatiuron ibana alai sogo rohana tu donganna, sasintongna di bagasan haholomon dope ibana. 10 Manang ise na mangkaholongi donganna, tongtong do ibana di bagasan hatiuron jala ndang adong di bagasan dirina na mambahen tartuktuk. 11 Manang ise na marsogo ni roha tu donganna, di bagasan haholomon do ibana. Di haholomon do ibana mardalan jala ndang diboto ibana tudia ibana laho, ai dipapitung haholomon i do matana.

12 Husurat do on tu hamu angka anakkonku, ai nunga disesa dosamuna alani goarna. 13 Hamu angka ama, husurat do on tu hamu ala nunga ditanda hamu ibana naung adong sian mulana i. Hamu angka na poso, husurat do on tu hamu ala nunga ditaluhon hamu Sibolis.* Hamu angka dakdanak, husurat do on tu hamu ala nunga ditanda hamu Ama i. 14 Hamu angka ama, husurat do on tu hamu ala nunga ditanda hamu ibana naung adong sian mulana i. Hamu angka na poso, husurat do on tu hamu ala togu haporseaonmuna jala tongtong hata ni Debata adong di hamu, jala nunga ditaluhon hamu Sibolis.*

15 Unang ma haholongi hamu portibi on dohot angka na di bagasanna. Molo dihaholongi sasahalak portibi on, ndang adong holong ni rohana tu Ama i. 16 Ai sude na adong di portibi on, i ma hisap-hisap ni daging, hisap-hisap ni mata dohot manganggarhon na adong di ibana, ndang sian Ama i anggo i alai sian portibi on do. 17 Na laho salpu do portibi on dohot hisap-hisapna, alai mangolu saleleng ni lelengna do halak na mangulahon lomo ni roha ni Debata.

18 Hamu anakkonku, tingki parpudi do nuaeng. Songon naung binegemuna, na laho ro nama antikristus. Gariada saonari pe, nunga godang tarida antikristus i. Sian i do taboto, nuaeng ma tingki parpudi. 19 Ditadingkon nasida do hita, ala ndang donganta nasida. Molo donganta nasida, tongtong do nasida rap dohot hita. Alai ditadingkon nasida do hita, alani i tangkas ma ndang sude donganta. 20 Nunga dipillit Nabadia i hamu jala nunga sude hamu mamboto hasintongan. 21 Husurat pe on tu hamu, ndang ala na so diboto hamu hasintongan. Alai ala diboto hamu do i jala ala ndang adong gabus na sian hasintongan.

22 Ise do sipargabus i, ia so ibana na so mangakkui Jesus i Kristus? On ma antikristus, i ma halak na so mangakkui Ama i dohot Anak i. 23 Manang ise na so mangakkui Anak i, ndang marsada ibana dohot Ama i. Alai manang ise na mangakkui Anak i, marsada do ibana dohot Ama i. 24 Naung binegemuna sian mulana, ingkon tongtong do i di bagasan rohamuna. Molo tongtong i di bagasan rohamuna, tongtong ma hamu marsada dohot Anak i jala marsada dohot Ama i. 25 Asing ni i, dijanjihon ibana do hangoluan na saleleng ni lelengna tu hita.

26 Husurat do on tu hamu, ala adong na naeng mangaliluhon hamu. 27 Nunga dipillit Debata hamu marhite tondi parbadiana jala tongtong ma i di bagasan hamu. Ndang porlu be manang ise mangajari hamu, alai ajarhonon ni tondi parbadia do saluhutna tu hamu. Sintong do i jala ndang adong gabus. Songon naung niajarhon ni i tu hamu, tongtong ma hamu marsada dohot ibana. 28 Saonari pe angka anakkonku, tongtong ma hamu marsada dohot ibana. Alani i, tingki dipataridahon ibana dirina, ndang mabiar be hita mangkatai jala ndang mandao hita sian ibana saleleng ari harorona ala maila. 29 Molo diboto hamu na mangulahon na sintong do ibana, botoonmuna ma anakna do manang ise na mangulahon na sintong.