1 Johannes

1 Husurathon hami do tu hamu taringot tu hata hangoluan i. Nunga adong hian i sian mulana, nunga hubege hami, nunga huida hami dohot matanami, nunga huparrohahon hami jala nunga hujama hami i dohot tangannami. 2 (Dipapatar do hangoluan na saleleng ni lelengna i tu hami jala nunga huida hami i. On do na hubaritahon jala na hupaboa hami tu hamu. Sian Ama i do hangoluan na saleleng ni lelengna i jala nunga dipapatar i tu hami.) 3 Hubaritahon hami do tu hamu na huida hami dohot na hubege hami, asa marsada hamu dohot hami songon hami na marsada tu Ama i dohot tu Anakna, i ma Jesus Kristus. 4 Husurathon hami do sudena on asa gok las ni rohanta.

5 On do barita naung hubege hami sian ibana jala na hupaboa hami tu hamu: Hatiuron do Debata jala ndang adong haholomon di Ibana. 6 Molo tadok, “Marsada hita dohot Debata,” hape mardalan dope hita di haholomon, margabus do hita disi jala ndang mangulahon hasintongan. 7 Alai molo mardalan hita di hatiuron songon Ibana na di bagasan hatiuron, marsada do hita sude. Jala ias ma hita sian sude dosa bahenon ni mudar ni Anakna, i ma Jesus.

8 Molo tadok, “Ndang mardosa hita,” na manipu dirinta do hita disi jala ndang adong hasintongan di bagasan dirinta. 9 Molo taakkui angka dosanta, sesaon ni Debata do i jala paiasonna do hita sian sude ulaon na jahat. Ai haposan do Debata jala na tigor. 10 Molo tadok, “Ndang mardosa hita,” gabe pargabus ma tabahen Debata, jala ndang adong hatana di bagasan hita.