Titus
3 Tongtong ma paingot nasida asa mangoloi jala unduk tu pamarenta dohot tu angka parhuaso, rade mangulahon ulaon na denggan, 2 ndang paroa-roahon manang ise pe, ndang parbada, alai parroha na dame jala lambok tu sude halak. 3 Ai hita pe najolo oto do, pangalo, lilu, dirajai hisap-hisap ni daging jala sai holan mangalului hasonangan, sai mangulahon na jahat dohot mangiburu, mangulahon ulaon na dihagigihon, marsogo ni roha tu dongan.
4 Alai dipatudu Debata Sipalua hita i do asi ni roha dohot holongna tu jolma, 5 ndang ala taulahon na sintong, alai alani asi ni rohana do. Dipalua do hita marhite pandidion asa boi hita manjalo hangoluan jala boi ma hita gabe jolma na imbaru marhite tondi parbadia. 6 Diusehon Debata do mansai godang tondi parbadiana tu hita marhite Jesus Kristus Sipalua hita. 7 Marhite asi ni rohana na mansai balga i, didok ma hita mangulahon na sintong. Gabe boi ma hita parsidohot manjalo hangoluan na saleleng ni lelengna songon pangkirimonta i.
8 Boi do tahaporseai angka hata on. Denggan ma parrohahon i, asa sude na porsea tu Debata boi sai mamingkirhon i jala tongtong mangulahon ulaon na denggan. Ai denggan do angka i jala marlaba tu jolma.
9 Alai pasiding ma angka parsoalan na so marguna, parsoalan taringot tu tarombo, dohot parsoalan manang parbadaan taringot tu Patik. Ai ndang adong guna ni i sude. 10 Molo adong na mangajarhon ajaran na so sintong, pasingot ma ibana. Molo dung dipasingot ho ibana dua hali alai ndang ditangihon, unang be antoi ibana. 11 Ai nunga lilu halak sisongon i sian dalan na sintong. Nunga mardosa ibana jala pangalahona i patuduhon naung sala ibana.
12 Dung husuru si Artemas manang si Tikikus mandapothon ho, tibu ma ho ro mandapothon ahu tu Nikopolis, ai didok rohangku disi nama ahu saleleng ari ngali.* 13 Parade ma sude na porlu tu si Jenas siboto patik i dohot tu si Apollos. Asa unang adong na hurang di nasida tingki di pardalanan. 14 Ingkon marsiajar do angka donganta mangulahon ulaon na denggan, asa boi nasida mangurupi tingki dihaporluhon, ai marhite i tongtong ma denggan ulaon ni nasida.
15 Sahat ma tabe ni sude dongan na adong dison tu ho. Pasahat ma tabe tu dongan sahaporseaon na marholong ni roha tu hami.
Sai didongani asi ni roha ni Debata na mansai balga i ma hamu sude.