Titus

2 Alai anggo ho, tongtong ma ajarhon na hombar tu ajaran na sintong i. 2 Ajari ma angka baoa na matua asa boi mangarajai dirina, martanggung jawab, marbisuk, marhaporseaon na togu, marholong ni roha jala sabar. 3 Songon i nang angka borua na matua, ajari ma nasida asa marpangalaho na parohon sangap tu Debata. Ndang olo paroa-roahon donganna, ndang hatagian minum anggur, mangajarhon angka na denggan, 4 asa boi diajari* nasida borua na poso mangkaholongi tunggane dolina dohot ianakhonna, 5 asa marbisuk, badia, denggan mangaradoti angka na di jabuna, burju, jala unduk tu tunggane dolina. Molo diulahon nasida i ndang adong be na mangaleai hata ni Debata.

6 Songon i ma, tongtong ma ajari angka baoa na poso asa marbisuk, 7 gabe sitiruon ma ho di sude ulaon na denggan. Marsitutu ma mangajarhon na sintong,* 8 pangke ma angka hata na denggan na so siinsahan, asa maila angka musunta ala so adong na roa sidohononna taringot tu hita. 9 Ingkon unduk do hatoban tu tuanna di saluhut, marsitutu palashon roha ni tuanna, ndang mangalo, 10 manang manangko sian tuanna i. Ingkon boi do ibana dihaporseai, asa parohon pujian tu pangajarion ni Debata Sipalua hita.

11 Ai nunga dipatuduhon Debata asi ni rohana na mansai balga i na parohon haluaon tu sude jolma. 12 Marhite asi ni rohana i, boi ma tapasiding pangalaho na so pasangaphon Debata dohot hisap-hisap ni portibi on. Alani i, boi ma torang pingkiranta, boi ma taulahon na sintong dohot lomo ni roha ni Debata di tingki on,* 13 huhut paimahon pangkirimon na parohon las ni roha dohot paimahon dipatuduhon hamuliaon ni Debata na Sun Hinagogo i dohot hamuliaon ni Jesus Kristus Sipalua hita, 14 na mangalehon dirina laho paluahon hita* sian sude ragam ni hajahaton,* jala na pabadiahon hita asa boi gabe bangsona na sumurung. Alani i, boi ma taulahon angka ulaon na denggan sian nasa rohanta.

15 Tongtong ma ajarhon angka i, ai nunga dilehon tu ho tanggung jawab laho mamodai* jala maminsang angka na sala. Unang ma adong na marlea ni roha tu ho.