2 Timoteus
2 Alani i anakku, asi ni roha ni Kristus Jesus na mansai balga i ma na tongtong mambahen ho margogo. 2 Angka na binegem sian ahu di jolo ni godang saksi, pasahat ma i tu angka baoa na marsihohot jala na malo mangajari na asing. 3 Dohot ma ho manaon hasusaan, songon tentara ni Kristus Jesus na burju. 4 Ndang adong sahalak tentara na mandalanhon tugasna huhut marsitutu mangalului hepeng.* Ai naeng do bahenonna las roha ni komandanna. 5 Asing ni i, sahalak na martanding pe ndang mandapot hadiah* molo ndang diihuthon aturan tingki martanding. 6 Ingkon pangula naung loja mangula do na parjolo mambuat parbue ni na niulana. 7 Pingkiri ma na hudok i tu ho. Bahenon ni Tuhan* i do ho mangantusi saluhutna.
8 Ingot ma, nunga hehe Jesus Kristus sian na mate. Ibana do pinompar ni si Daud, jala hombar do on tu barita na uli na hubaritahon i. 9 Alani i do ahu marsitaonon jala dipenjarahon songon sahalak parjahat. Alai nang pe songon i, ndang tarambatan* anggo hata ni Debata. 10 Dibahen i, sabar do ahu manaon hasusaan alani angka halak na tarpillit, asa boi nasida mandapot haluaon dohot hasangapon na saleleng ni lelengna marhite Kristus Jesus. 11 Sintong do hata on: Molo rap mate hita dohot ibana, rap mangolu ma muse hita dohot ibana. 12 Molo sabar hita manaon hasusaan, mamarenta ma hita gabe raja rap dohot ibana. Molo ndang olo hita mangangkui ibana, ibana pe ndang olo mangakkui hita. 13 Nang pe ndang marsihohot hita, tongtong do marsihohot Debata. Ai ndang ulahononna na maralo tu lomo ni rohana.
14 Tongtong ma paingot nasida taringot tu angka on. Di jolo ni Debata, podai ma nasida asa unang marbadai alani angka hata. Ndang adong guna ni i, ai gabe gaor* do halak na manangihon dibahen i. 15 Marsitutu ma ho asa dihalomohon Debata songon parkarejo na so siinsahan, na denggan mangajarhon jala patorangkon hasintongan i. 16 Unang ma tangihon angka halak na mandok hata na so marguna na mambahen halak ndang pasangaphon Debata, ai lam dao do halak sian Debata bahenon ni nasida. 17 Songon baro na rarat* do hata ni nasida i. Sian tonga-tonga ni nasida ma si Himeneus dohot si Piletus. 18 Nunga lilu nasida sian hasintongan. Didok nasida do naung masa haheheon i jala nunga sega haporseaon ni deba halak alani nasida. 19 Alai nang pe songon i, togu do fondasi na binahen ni Debata. Adong do disi meterai na marsurat, “Ditanda Jahowa do angka na di Ibana,” dohot “Ganup na manjou goar ni Jahowa ditadingkon ma hajahaton.”
20 Ndang holan barang-barang na sian mas dohot perak na adong di jabu na balga. Alai adong do na sian hau dohot sian tano liat. Na deba dipangke tu na sangap, alai na deba nai tu na hurang sangap. 21 Manang ise na mandao sian barang na dipangke tu na hurang sangap, gabe barang na dipangke tu na sangap ma ibana, dipabadia, marguna tu nampunasa, jala rade tu angka ulaon na denggan. 22 Alani i, pasiding ma dirim sian hisap-hisap ni angka na poso. Alai marsitutu ma ho mangulahon na sintong, patuduhon haporseaon, holong, dame rap dohot angka na manjou Tuhan* sian ias ni roha.
23 Pasiding ma parsoalan haotoon dohot na so marguna, ai diboto ho do parbadaan do ujung ni i. 24 Ai ndang porlu marbada naposo ni Tuhan* i, alai ingkon lambok do tu sude halak, malo mangajari, sabar manaon angka na jahat, 25 jala lambok maminsang angka halak na mangalo. Anggiat ma dilehon Debata tingki tu nasida asa muba, jala mandapot parbinotoan na bagas taringot tu hasintongan i. 26 Dung i mangantusi ma nasida jala malua sian jorat ni Sibolis, naung manangkup nasida jala mambahen nasida mangulahon lomo ni rohana.