2 Timoteus
1 Sian si Paulus na gabe apostel ni Kristus Jesus mangihuthon lomo ni roha ni Debata, laho paboahon janji taringot tu hangoluan na nilehonna tu angka halak na marsada dohot Kristus Jesus, 2 mandapothon si Timoteus anak na huhaholongi:
Anggiat ma dipatuduhon tu ho haburjuon,* asi ni roha, dohot hadameon na sian Debata Ama i dohot na sian Kristus Jesus Tuanta i.
3 Mandok mauliate do ahu tu Debata, na husomba marhite panggora ni roha na denggan songon na binahen ni angka ompungku. Sai huingot do ho di tangiangku arian nang borngin. 4 Molo huingot ho na tangis i, sai naeng pajumpang do ahu dohot ho asa sonang rohangki. 5 Ai huingot do haporseaonmu na tarida marhite parniulaon. Parjolo do ompungmu si Lois dohot inangmu si Eunike patuduhon i, jala pos do rohangku songon i do nang haporseaonmu.
6 Alani i do hupaingot ho, asa unang lupa ho tu* silehon-lehon ni Debata na adong di ho. Dilehon do i tingki huampehon tanganku tu ho. 7 Ai tondi parbadia na nilehon ni Debata tu hita ndang mambahen hita mabiar. Alai mambahen hita margogo, marholong ni roha, jala marbisuk. 8 Alani i, unang ma maila ho mamaritahon taringot tu Tuanta manang taringot tu ahu, na tarhurung alani ibana. Alai dohot ma ho manaon hasusaan alani barita na uli huhut mangasahon huaso ni Debata. 9 Ndang alani pambahenanta umbahen dipalua hita jala dijou gabe angka halak na badia, alai alani lomo ni rohana do dohot asi ni rohana na mansai balga i. Dilehon Ibana do i tu hita sian najolo marhite Kristus Jesus. 10 Alai, nunga tangkas be saonari asi ni rohana na mansai balga i dung patar tarida Kristus Jesus Sipalua hita. Ibana do na paujungkon hamatean. Marhite barita na uli, dipatuduhon ibana do songon dia mandapot hangoluan dohot pamatang na so ra sega. 11 Dipillit do ahu gabe parbarita, apostel, jala guru laho paboahon barita na uli i.
12 Alani i ma hutaon sudena on, alai ndang maila ahu disi. Ai hutanda do Debata na huhaporseai. Jala pos do rohangku, jagaonna do na hupasahat i tu Ibana sahat tu ari i. 13 Ihuthon ma poda na sintong na gabe sitiruon naung binegem sian ahu, jala tongtong ma patuduhon holong dohot haporseaon ala naung marsada ho dohot Kristus Jesus. 14 Jaga ma arta na arga na pinasahatna tu ho marhite tondi parbadia na adong di hita.
15 Nunga diboto ho naung sude halak na di provinsi Asia manadingkon ahu, dohot do si Pigelus nang si Hermogenes. 16 Anggiat ma dipatuduhon Tuhan* asi ni rohana tu keluarga ni si Onesiporus. Ai jotjot do dipatogu ibana rohangku jala ndang maila ibana nang pe dipenjara ahu. 17 Gariada tingki di Rom ibana, marsitutu do ibana manjumpangi ahu. 18 Anggiat ma dilehon Tuhan* tu ibana asi ni roha na sian Jahowa di ari i. Jala tangkas do diboto ho sude na binahenna tu ahu tingki di Epesus.