Johannes

9 Tingki mardalan Jesus, diida ibana ma sahalak baoa na mapitung sian mulai tubu. 2 Disungkun angka siseanna ma Jesus, “Guru, alani dosa ni ise do umbahen na mapitung ibana sian mulai tubu? Alani dosana do manang dosa ni natua-tuana?” 3 Dialusi Jesus ma, “Ndang alani dosana manang dosa ni natua-tuana, alai asa tarida do ulaon ni Debata marhite ibana. 4 Saleleng arian dope ingkon taulahon do ulaon ni Ibana na marsuru ahu. Molo dung borngin, ndang adong be manang ise na boi karejo. 5 Saleleng di portibi on dope ahu, ahu do panondang ni portibi on.” 6 Dung didok ibana songon i, ditijuri ibana ma tano, dilala ma tano i jala diapushon ma tu mata ni baoa i. 7 Dung i didok Jesus ma, “Laho ma ho marsuap tu kolam Siloam” (molo diterjemahon lapatanna, “Na Sinuru”). Laho ma ibana marsuap jala nunga boi ibana marnida tingki mulak.

8 Didok angka hombar jabuna dohot angka halak na somal mangida ibana mangido-ido i ma, “Nda on do halak na sai hundul mangido-ido i?” 9 Adong ma na mandok, “Ibana do i.” Na asing muse mandok, “Ndang ibana i, na suman do tu ibana.” Alai sai didok baoa i ma, “Ahu do i.” 10 Gabe disungkun nasida ma ibana, “Songon dia gabe boi ho marnida?” 11 Dialusi ibana ma, “Adong sahalak baoa na margoar Jesus, diapushon ibana ma gambo tu matangku, dung i disuru ma ahu marsuap tu kolam Siloam. Laho ma ahu marsuap gabe boi ma ahu marnida.” 12 Disungkun nasida ma, “Didia do ibana?” Dialusi baoa i ma, “Ndang huboto.”

13 Diboan nasida ma baoa i tu halak Parise. 14 Pas di ari Sabbat do Jesus na mambahen gambo i dohot na mambahen marnida mata ni baoa i. 15 Disungkun halak Parise i ma muse tu baoa i songon dia ibana boi marnida. Didok ibana ma tu nasida, “Diapushon ibana ma gambo tu matangku, dung i marsuap ma ahu gabe boi ma ahu marnida.” 16 Adong ma deba sian halak Parise i mandok, “Ndang sian Debata halak na mambahen on, ai ndang diradoti ibana ari Sabbat.” Na deba nai mandok, “Sian dia ma boi halak pardosa mambahen tanda halongangan* na songon on?” Dung i gabe marsalisi ma nasida sama nasida. 17 Disungkun nasida ma muse baoa i, “Songon dia do pandapotmu taringot tu ibana ala nunga dibahen ho marnida?” Dialusi ibana ma, “Panurirang do ibana.”

18 Alai ndang olo halak Jahudi i porsea na mapitung hian ibana jala nunga boi marnida. Dung i dijou nasida ma natua-tuana. 19 Disungkun nasida ma natua-tuana i, “Anakmuna do on? Tutu do ibana mapitung sian mulai tubu? Songon dia do boi ibana marnida saonari?” 20 Dialusi natua-tuana i ma, “Anaknami do ibana jala mapitung do ibana sian mulai tubu. 21 Alai ndang huboto hami songon dia ibana boi marnida saonari, jala ndang huboto hami ise na mambahen ibana boi marnida. Sungkun hamu ma ibana, ai nunga balga ibana jala ibana sandiri ma na mangalusi.” 22 Didok natua-tuana i pe songon i ala mabiar do nasida tu halak Jahudi i. Ai nunga sahata halak Jahudi pakaluarhon sian sinagoga* manang ise na mangkaporseai Jesus i do Kristus. 23 Alani i ma didok natua-tuana i, “Sungkun hamu ma ibana, ai nunga balga ibana.”

24 Dijou nasida ma muse baoa i jala didok ma tu ibana, “Pasangap ma Debata, dok ma na sintong. Na huboto hami, pardosa do halak na pamalumhon ho i.” 25 Dialusi baoa i ma, “Ndang huboto manang na pardosa ibana manang na ndang. Holan on do na huboto, mapitung hian do ahu, alai saonari nunga boi marnida.” 26 Disungkun nasida ma muse tu ibana, “Aha do dibahen ibana tu ho? Songon dia do dibahen pamalumhon matami?” 27 Dialusi ibana ma nasida, “Nunga hupaboa tu hamu, alai ndang olo hamu manangihon. Boasa ma naeng begeonmuna i muse? Na naeng dohot do hamu gabe siseanna?” 28 Dileai nasida ma ibana, ninna ma, “Ho do siseanna, molo hami sisean ni si Musa do. 29 Huboto hami, mangkatai do Debata tu si Musa. Alai ndang huboto hami manang sian dia ibana ro.” 30 Dialusi ibana ma, “Bingung do ahu mamereng hamu, ndang diboto hamu manang na sian dia ibana ro, hape nunga dibahen ibana marnida matangku. 31 Taboto do, ndang ditangihon Debata pardosa, alai ditangihon Ibana do manang ise na mangkabiari Ibana dohot na mangulahon lomo ni rohana. 32 Sian najolo, ndang hea dope binege adong na boi pamalumhon halak na mapitung sian mulai tubu. 33 Molo ndang ro sian Debata ibana, ndang boi bahenonna songon i.” 34 Dialusi nasida ma ibana, “Gok dosa do ho tubu, alai naeng ajaranmu hami?” Dung i, dipakaluar nasida ma ibana sian i!

35 Dibege Jesus ma naung dipakaluar ibana sian i. Tingki pajumpang nasida, didok Jesus ma, “Porsea do ho tu Anak ni jolma i?” 36 Dialusi baoa i ma, “Ise do ibana Amang, asa boi ahu porsea tu ibana?” 37 Didok Jesus ma tu ibana, “Nunga diida ho ibana. Sasintongna, ibana do na mangkatai tu ho.” 38 Didok ibana ma, “Porsea do ahu Tuan.” Laos marsinggang ma ibana di jolo ni Jesus. 39 Didok Jesus ma, “Laho manguhumi do ahu ro tu portibi on, asa marnida angka na mapitung jala asa mapitung angka na marnida.” 40 Adong do deba halak Parise na mambege hata ni Jesus i. Ninna nasida ma, “Na nidokmu nuaeng, na dohot do hami mapitung?” 41 Dialusi Jesus ma nasida, “Molo mapitung hamu, ndang mardosa hamu. Alai ala didok hamu do, ‘Marnida do hami.’ Gabe tongtong ma hamu mardosa.”