Johannes

10 “Tutu do na hudok on tu hamu, manang ise na masuk tu handang ni biru-biru ndang sian pintu, alai manjangkit sian tembok, panangko do i jala pangarampok. 2 Alai manang ise na masuk sian pintu, ibana do parmahan ni biru-biru i. 3 Bungkaon ni panjaga ma pintu tu ibana, jala begeon ni biru-biru i ma soarana. Ai jouonna do ganup biru-biruna jala togihononna ma i tu luar. 4 Dung diboan ibana kaluar sude biru-biru i, mardalan ma ibana di jolo ni angka biru-biru i, jala diihuthon ma ibana, ai ditanda do soarana. 5 Ndang olo angka biru-biru i mangihuthon halak na asing, alai lari do angka biru-biru i sian halak na asing, ai ndang ditanda soarana.” 6 Didok Jesus do umpama i tu nasida, alai ndang diantusi nasida na nidokna i.

7 Didok Jesus ma muse, “Tutu do na hudok on tu hamu, ahu do pintu ni biru-biru i. 8 Sude halak na mandok dirina parmahan na tutu asing ni ahu, panangko do i jala pangarampok, jala ndang ditangihon angka biru-biru i soara ni nasida. 9 Ahu do pintu i, malua do manang ise na masuk marhite ahu. Masuk jala kaluar ma ibana jala dapotna ma panjampalan. 10 Holan na manangko, mambunu dohot na mangago do ro panangko i. Anggo ahu ro, laho pangoluhon angka biru-biru i do asa dapotan ngolu na saleleng ni lelengna. 11 Ahu do parmahan na burju i. Dilehon parmahan na burju do ngoluna humongkop biru-biruna. 12 Anggo halak na digaji, na so parmahan, jala na so nampunasa biru-biru i, molo ro serigala lari do ibana, jala tadingkononna do biru-biru i. Dung i, soroon ni serigala i ma biru-biru i jala panserakononna. 13 Ai halak na digaji do ibana jala ndang sarihononna biru-biru i. 14 Ahu do parmahan na burju i. Hutanda do biru-birungku jala ditanda biru-birungku do ahu. 15 Songon Ama i na mananda ahu jala ahu mananda Ama i, hulehon do ngolungku humongkop biru-biru i.

16 “Adong dope biru-birungku na asing na so sian handang on jala ingkon dohot do angka i boanonku. Tangihonon ni nasida ma soarangku, gabe sada punguan ma nasida jala sada parmahan. 17 Dihaholongi Ama i do ahu ala hulehon do ngolungku asa jaloonku i muse. 18 Ndang adong na boi mambuat i sian ahu, alai mangihuthon lomo ni rohangku do hulehon i. Ai marhak do ahu mangalehon i jala marhak do ahu manjalo i muse. On do parenta na hujalo sian Damang.”

19 Gabe tubu ma muse parsalisian di tonga-tonga ni halak Jahudi alani hatana i. 20 Godang do sian nasida na mandok, “Na sinonggopan ni suru-suruan na jahat do ibana jala nunga rintik ibana. Tu aha be tangihononmuna ibana?” 21 Na asing mandok, “Ndang hatahonon ni na sinonggopan ni suru-suruan na jahat songon i. Ai boi ma bahenon ni suru-suruan na jahat marnida halak na mapitung?”

22 Tingki i, adong do perayaan di Jerusalem, i ma Perayaan Pabadiahon bagas joro jala ari ngali* do tingki i. 23 Mardalan-dalan ma Jesus di emper ni si Salomo na di bagas joro i. 24 Marpungu ma halak Jahudi mangkaliangi Jesus jala ninna ma, “Sadia leleng nai sungkun-sungkun rohanami bahenonmu? Molo Kristus i do ho, tangkas ma paboa tu hami.” 25 Dialusi Jesus ma nasida, “Nunga hupaboa tu hamu alai ndang porsea hamu. Angka ulaon na hubahen di bagasan goar ni Damang, i do na paboahon taringot tu ahu. 26 Alai ndang porsea hamu, ala ndang biru-birungku hamu. 27 Ditangihon biru-birungku do soarangku, hutanda do nasida, jala diihuthon do ahu. 28 Lehononku do hangoluan na saleleng ni lelengna tu nasida, ndang adong na boi mangago jala mambuat nasida sian ahu. 29 Ummarga do biru-biru na nilehon ni Damang i tu ahu sian saluhutna. Jala ndang adong na boi mambuat nasida sian Damang i. 30 Sada* do ahu dohot Ama i.”

31 Dibuat halak Jahudi ma muse batu laho mandangguri ibana. 32 Disungkun Jesus ma nasida, “Nunga godang hupatuduhon tu hamu ulaon na denggan na sian Damang i. Ulaon na dia do sian angka i na mambahen naeng dangguronmuna ahu?” 33 Dialusi halak Jahudi i ma ibana, “Ndang alani ulaon na denggan umbahen naeng hudangguri hami ho. Alai ala dileai ho do Debata. Jolma do ho, alai dibahen ho do dirim songon debata.” 34 Didok Jesus ma tu nasida, “Nda tarsurat do di Patikmuna, ‘Didok Debata, “Angka debata* do hamu”’? 35 Ndang boi muba bahenon ni jolma angka na tarsurat i. Antong, molo didok Ibana do “angka debata” tu angka halak na diburai i, 36 boasa ma dohononmuna tu ahu, ‘Na mangaleai Debata do ho’ ala hudok, ‘Anak ni Debata do ahu’? Hape na pinabadia jala na sinuru ni Ama i do ahu tu portibi on. 37 Molo so ulaon na sian Damang i na huulahon, unang pola porsea hamu tu ahu. 38 Alai molo i do huulahon, porsea ma hamu tu na huulahon i nang pe ndang porsea hamu tu ahu. Marhite i, antusanmuna ma jala tongtong ma hamu porsea na marsada do Ama i dohot ahu jala marsada do ahu dohot Ama i.” 39 Naeng ditangkup nasida ma muse Jesus, alai laho do ibana sian tonga-tonga ni nasida.

40 Laho ma muse Jesus tu bariba ni Sunge Jordan, tu inganan ni si Johannes parjolo sahali mandidihon, jala disi ma ibana tading. 41 Godang do halak ro mandapothon ibana jala ninna nasida ma, “Ndang adong nanggo sada tanda halongangan* dibahen si Johannes, alai sintong do sude na nidokna taringot tu ibana.” 42 Gabe godang ma halak na disi porsea tu ibana.