Di nigle suhulnyuu i Yéhôva

1. Kii i nhélés we mu suhulnyuu i Yéhôva?

I NGÉDA u mbéñge baane i len ini, baa u nla kal le ba yé suhulnyuu? To jam. Ndi Yéhôva, nu nye a yé Nu ngui yosôna, a yé suhulnyuu. (Tjémbi 113:​5-8) Mut nye ki nye a ta bé suhulnyuu kiki Yéhôva; a ma ba bé ngôk kekikel. Munu yigil ini, di ga tehe mam ma-na ma ma ñunda le Yéhôva a yé suhulnyuu ni lelaa suhulnyuu yé i nene mu mam ma. Di ga tehe ki lelaa Yésu a bi nigle suhulnyuu i Isañ. I mam ma, ma ga hôla bés i kôôge bebee ni Yéhôva ni i kônde nigle suhulnyuu yé.

TONJEE A NLA KÔÔGE YÉHÔVA BEBEE

2. Kii kaat Tjémbi 62:8 i nkal bés inyu Yéhôva? (Béñge yak titii.)

² Hala a ta bé jam li ntomb i kôôge mut ngôk bebee. Ngôk wé u mboñ le bôt ba nkon woñi i kôôge nye bebee, ba nkeñgle yak nye. Yéhôva nye a ta bé hala. Kiki Tata wés nu ngii a yé suhulnyuu, a nkal bés le di kôôge nye bebee, a nti ki bés makénd le di kal nye nduña yés yosôna. (Añ Tjémbi 62:8.) Yéhôva a ñemble masoohe ma bagwélél bé nlélém kiki isañ a ñemble nduña i bon bé. Inyu hala nyen a bi boñ le ba tila masoohe ma bagwélél bé ikété Bibel. Hala a ñunda lelaa Yéhôva a ngwés a ñemble masoohe més. (Yôsua 10:​12-14; 1 Samuel 1:​10-18) Ndi ibale ngim mangéda, di nôgda le di kôli bé soohe Yéhôva inyu bibéba gwés, kii di nlama boñ?

3. Inyuki di nlama ba nkwoog nkaa le Yéhôva a ngwés le di soohe nye hiki ngéda?

³ Di nla soohe Yéhôva to ibale di nhoñol le di kôli bé ni gwéha yé. Inyuki di nkal hala? Mu hihéga hi man nnimlaga, Yésu a nhégha Yéhôva ni isañ man nu a gwé loñgeñem. Man a bé hoñol le isañ a ga leege bé nye inyule a bi boñ mam mabe. Ndi kii isañ a bi boñ i ngéda man a bi témb? I ngéda isañ a bi tehe nye a nlôl nyoo haa, “a ke ngwéé, a sambla nye, a sos nye limañ ni gwéha.” (Lukas 15:​17-20) Yéhôva a yé kiki isañ nu. I ngéda a nok masoohe ma bôt ba nok njôghe, ba kiññem i nkéés inyu bibéba ba bi boñ behee tole ba mandutu ma niñ ma ntét, suhulnyuu yé i ntinde nye i emble bo. (Minlénd mi Yérémia 3:​19, 20) Yéhôva a nkônôl bo ngoo, a nke ngwéé i boma bo inyu hôgbaha bo ni i unda le a ngwés bo. (Yésaya 57:15) Lelaa Yéhôva a nke ngwéé i boma bés? Yéhôva a yé a gwélél mimañ, bôt bés ba lihaa ba ba yé i ntôñ, ni lôk kéé inyu hôgbaha bés. (Yakôbô 5:​14, 15) Yéhôva a mboñ hala inyu boñ le di kônde kôôge nye bebee.

4. Inyuki hala a bé bé ndutu i kôôge Yésu bebee?

⁴ Lelaa Yésu a nigle Isañ? Yésu a yé suhulnyuu kiki Isañ. Inyu hala nyen i ngéda a bé hana ’isi, bôt ba bé kon bé woñi i kôôge nye bebee. Ba bé kon bé woñi i bat nye mambadga. (Markô 4:​10, 11) Yak i ngéda Yésu a bé bat bo mambadga inyu yi kii ba nhoñol toi, ba bé kal nye kii i bé bo i ñem. (Matéô 16:​13-16) Yak i ngéda ba bé boñ mahôha, ba bé kon bé woñi le Yésu a ga unbene bo; ba bé yi le Yésu a yé loñge mut, a nkônôl bôt ngoo, a bak mut a nhônba. (Matéô 17:​24-27) Kiki Yésu a bé nigle Isañ ngandak, hala a bi boñ le banigil bé ba kônde yi Yéhôva. (Yôhanes 14:9) Ba bi nok le Yéhôva a ta bé kiki baéga base ba ba yé bibéba bi bôt, ba bak ngôk, ba ook bôt. Maselna ni bo, Yéhôva nye a yé suhulnyuu, tonjee a nla kôôge nye bebee.

5. Lelaa suhulnyuu i nla boñ le bôt ba kônde kôôge bés bebee?

⁵ Lelaa di nla nigle Yéhôva? I ngéda di mboñ biliya i ba suhulnyuu, yak bôt ba nkôôge bés bebee. I ngéda di yé suhulnyuu, di nkil bé bôt bape njôñ, di ngôgôp bé, di ntéédana bé to mut hiun inyule i bilem bibe bi gwon bi mboñ le bôt ba kee bés ngwéé. Ndi suhulnyuu i nhôla bés i ba biloñge bi bôt, i hônba ni i nwéhél bôt bape inyule i bilem bilam bi gwon bi mboñ le bôt ba kôôge bés bebee. (Kôlôsé 3:​12-14) Mimañ mi nlama boñ biliya le lôk kéé i kôôge bo bebee. Inyu boñ hala, ba nlama ba ntôñ ni lôk kéé ngim mangéda. Kiki hihéga, ba ga ke i makoda i ndap Ane iloole ba boñ mo ni zoom. Tolakii ba pégi ngandak, ba mboñ biliya i ke i likalô li mandap ni mandap ni lôk kéé hiki ngéda pôla i nene. I ngéda mimañ mi mboñ hala, hala nyen yak lôk kéé i ga kônde yi bo, ba ba ki bebee i kal bo mandutu map.

YÉHÔVA A NOK BÔT

6-7. Ti dihéga di di ñunda le Yéhôva a yé bebee i héñha mahoñol i ngéda bagwélél bé ba nsoohe nye.

⁶ Bôt ba ngôk ba nhoñol le ba nyi ngandak, ba ngwés bé to le mut a kal bo jam jo ki jo. Ndi Yéhôva nye a yé suhulnyuu, a nok bôt, a nai bé to ni litehge jé li mam tolakii a nloo bés huum. Di yoñ le hihéga hi Miriam, manyañ Môsi. Nye ni Arôn ba bi huñbene Môsi, nu Yéhôva a bi téé inyu éga litén jé. Miriam a bé unda le a nti bé Yéhôva lipém. Jon Yéhôva a bi unbene Miriam ngandak, a leñ nye lô. I ngéda Arôn a bi yemhe Môsi le a hôla Miriam, yak Môsi a yemhe Yéhôva le a mbuubaha Miriam, kii Yéhôva a bi boñ? Yéhôva a ta bé kiki mut ngôk nu a nai ndik ni litehge jé li mam, ndi a bi boñ mam nya ipe. Kiki a yé suhulnyuu, a bi nok bo, a mbuubaha Miriam.​—Ñañga bôt 12:​1-15.

⁷ Yéhôva a bi unda ki le a yé suhulnyuu i ngéda a bi emble Kiñe Hézékia. Yéhôva a bi ep mpôdôl Yésaya i kal Hézékia le a ga wo. Hézékia a bi ee ngandak, a yemhe Yéhôva le a mbuubaha nye. Yéhôva a bi nok masoohe mé, a boñ le a kônde niñ 15 nwii. (2 Bikiñe 20:​1, 5, 6) Suhulnyuu i mboñ le Yéhôva a bana ñem ngôô, a nok ki bés.

8. Kii i ñunda le Yésu a nok bôt? (Markô 3:​1-6)

⁸ Lelaa Yésu a nigle Isañ? I ngéda Yésu a bé hana ’isi, a bé bôñôl bôt loñge i ngéda i bé pam le a boñ hala. Kiki hihéga, a bi mbuubaha bôt i kel sabat to hala kii baéga base ba bé gwés bé hala. (Añ Markô 3:​1-6.) Yésu a nke ni bisu i nok bôt to hala kii nyen a yé Ño ntôñ. I ngéda mut a mboñ béba ikeñi, Yésu a nhônba nye, a tinak nye pôla i héñha.​—Masoola 2:​2-5.

9. Lelaa di nla unda le di nok bôt? (Béñge yak bititii.)

⁹ Lelaa di nla nigle Yéhôva? Kiki Yéhôva, di nlama boñ biliya i nok bôt ni i boñ mam loñge. (Yakôbô 3:17) Kiki hihéga, bagwal ba mbem bé le bon bap ba boñ mam ba nla bé boñ. Hihéga hi Yakôb ni bon bé hi ñunda hala i kaat Bibôdle 33:​12-14. Bagwal ba ba yé suhulnyuu, ba nogok bon bap, ba mboñ biliya le ba hégha bañ man wap wada ni man wap numpe. Yak mimañ mi nlama unda le mi nok lôk kéé. Njel yada i yé le, mañ u nlama bé nai ni litehge jé li mam, ndi a nlama nit makidik ma mini mimañ mimpe ibale makidik ba nyoñ ma mbôk bé matiñ ma Bibel. (1 Timôtéô 3:​2, 3) Bésbobasôna di nlama boñ biliya i nok mahoñol ma bôt bape to ibale di ntehe bé mam kiki bo. (Rôma 14:1) Hiki wada wés a boñ biliya le ‘a nai bañ ni litehge jé li mam’ ikété likoda.​—Filipi 4:5.

YÉHÔVA A NHÔNBA

10. Lelaa Yéhôva a ñunda le a nhônba?

¹⁰ Bebek yak we u ma yimbe le bôt ba ngôk ba nhônba bé. Kinje maselna ni Yéhôva nu a yé ndémbél i mbôk ni sôk i hônba! Kiki hihéga, i dilo di Nôa, Yéhôva a bi kal Nôa le a ga bem 120 nwii ilole a ntjé bibéba bi bôt. (Bibôdle 6:3) Hala a bi ti Nôa ngéda i néñés bon bé ni i oñ nkuu ni lihaa jé. I mbus ngéda, Yéhôva a bi hônba i ngéda Abraham a bé bat nye mambadga inyu tjiba i Sôdôm ni Gômôra. Ibale mut ngôk nu, ki a bi timbhe Abraham le: ‘U kôli bé bat me i nya mambadga i, u nhoñol le u nyi jam iloo me?’ Ndi kiki Yéhôva a yé suhulnyuu, a bi emble Abraham ni wongut.​—Bibôdle 18:​20-33.

11. Kiki kaat 2 Pétrô 3:9 i ñunda, inyuki Yéhôva a nhônba munu ngéda yés?

¹¹ Yéhôva a ñunda le a nhônba yak munu ngéda yés. A mbem ngéda a bi téé inyu mélés béba. Inyuki a nhônba? “Inyule a nsômbôl bé le mut nye ki nye a tjiba, ndi a nsômbôl le bôt bobasôna ba pam i hiel miñem.” (Añ 2 Pétrô 3:9.) Ndi baa Yéhôva a nhônba yañga? To! Hônba yé i mboñ le didun di bôt di kôôge nye bebee. Di nhoñol yak le didun di bôt dipe di ga boñ hala. Ndi hônba i Yéhôva i gwé minwaa. Yéhôva a ngwés bôt ngandak, ndi a nwas bé le ba boñ to kii ba ngwés. A ga nwas bé le béba i nom letee.​—Habakuk 2:3.

12. Kii i ñunda le Yésu a nhônba kiki Yéhôva?

¹² Lelaa Yésu a nigle Isañ? Hala a yé dikôô di nwii nano le Yésu a nigle hônba i Isañ. Yésu a bi tehe lelaa Satan a bi ôm Yéhôva ni bôt ba binam nsohi u bitembee. (Bibôdle 3:​4, 5; Hiôb 1:11; Masoola 12:10) A tehe yak lelaa bôt ba binam ba nok ndutu kiyaga. Hégda lelaa a nyamnda ni ngôñ i “tjé minson mi Nsohop”! (1 Yôhanes 3:8) Kii i nhôla Yésu i bem ngéda Yéhôva a bi téé inyu tjé minson mi Nsohop nwominsôna? Jam jada li yé le Yésu a yé suhulnyuu, a nyi le Yéhôva nyen a nlama kit imbe ngéda a ga mélés béba.​—Minson mi baôma 1:7.

13. Lelaa Yésu a bi unda le a nhônba baôma bé, inyuki?

¹³ I ngéda Yésu a bé hana ’isi, a bi hônba yak baôma bé. Kiki hihéga, i ngéda baôma ba bé kaa inyu yi njee a yé nunkeñi ipôla yap, Yésu a bi lehel bé ñem. Ndi a bi ke ni bisu i hônba bo. (Lukas 9:46; 22:​24-27) A bé nkwoog nkaa le kii ngéda i ntagbe, ba ga héñha. Baa yak we u ma boñ jam libe ngandak ngélé? Ibale hala, baa u ta bé maséé le Yésu nyen a ba Kiñe yoñ kiki a yé suhulnyuu, a hônbaga?

14. Kii i nla hôla bés i hônba?

¹⁴ Lelaa di nla nigle Yéhôva? I ngéda di mboñ biliya i bana “mahoñol ma Kristô,” di nhoñol kiki Yéhôva, di boñok mam kiki nye. (1 Korintô 2:16) Kii i nla hôla bés i bana mahoñol ma Kristô? Njel ipe i ta bé. Di nlama ndik añ miñañ mi mi mpôdôl niñ i Yésu ikété Bibel. Di nlama yoñ ngéda i ôt pék mu miñañ mi inyu yi kii Yésu a bi boñ ni inyuki a bi boñ hala. Di nla ki soohe Yéhôva le a hôla bés i hônba ni suhulnyuu kiki Yésu. I ngéda di mboñ biliya i bana mahoñol ma Kristô, di ga kônde ba banigle Nyambe, hala a ga boñ le di hônba bibomb bi lôk kéé bañga lihônbaga, di ga nok ki le i mbat bés ngéda i hoñol ni i boñ mam kiki Yéhôva.​—Matéô 18:​26-30, 35.

YÉHÔVA A NYIMBE BÔT BA SUHULNYUU

15. Dimbe dihéga di ñunda le Yéhôva a ngwés bôt ba suhulnyuu? (Tjémbi 138:6)

¹⁵ Añ Tjémbi 138:6. Yéhôva nu a yé Nwet ngiinda yosôna a ndiihe bôt ba suhulnyuu! Di tehe le ndék dihéga di bôt ba suhulnyuu Yéhôva a bi yimbe. Bebek, bahogi ba nlo bé we i mahoñol ndi ba yé mu minañ mi Bibel. Kiki hihéga, Yéhôva a bi kal Môsi le a tila ñañ u nléla wada le Débôra, nu a bi gwélél lihaa li Isak ni li Yakôb 125 nwii! To ibale di nyi bé ngandak mam inyu ngwélél Yéhôva nu, Yéhôva a bi yoñ ngéda inyu boñ le Môsi a tila ñañ wé ni i unda le a ngwés nye. (Bibôdle 24:59; 35:​8, buk isi lipep.) Ngandak nwii mbus, Yéhôva a bi yimbe i mañge wanda nunu le David, nu a bé ntééda mintômba, a téé nye kiñe Israel. (2 Samuel 22:​1, 36) I ngéda Yésu a bi gwéé, Yéhôva a bi ti batééda mintômba lipém, a ep biañgel i boni le bon ba ba bôt ba bisu i yi le nu a ga ba Mésia a ngwéé i Bétléhém. (Lukas 2:​8-11) Yak i ngéda Yôsep bo Maria ba bi kena Yésu i témpel, Yéhôva a bi ti Siméôn bo Hana lipém, a boñ le ba tehe Man wé. (Lukas 2:​25-30, 36-38) Ñ, “to hala kiki Yéhôva a nyôgi i ngii, a nyimbe bôt ba suhulnyuu”!

16. Lelaa Yésu a bi unda le a nti bôt lipém kiki Isañ?

¹⁶ Lelaa Yésu a nigle Isañ? Yésu a nyimbe bôt ba suhulnyuu kiki Isañ. A bé niiga ‘i bôt ba bi ke bé i suklu ni gwañga bi bôt’ maliga inyu Ane Djob. (Minson mi baôma 4:13; Matéô 11:25) Yésu a bé mbuubaha bakokon, a boñok hala ni loñgeñem kayéle ba bé nôgda le a ngwés bo, a diihege ki bo. (Lukas 5:13) I u u nsôk ilole a nwo, Yésu a bi jôwa makôô ma baôma bé, bôlô le ndik minkol nwon mi mboñ. (Yôhanes 13:5) Ilole a mbet i ngii, a bi bééga banigil bé nson u u nlôôha mahee kiyaga: i hôla bôt bape i bana niñ boga. I nson u won yak bés di ngi gwelek i len ini.​—Matéô 28:​19, 20.

17. Lelaa di nla ti bôt bape lipém? (Béñge yak titii.)

¹⁷ Lelaa di nla nigle Yéhôva? Di nti bôt lipém i ngéda di ñañle bo ñañ nlam ibabé i béñge litén jap, kôgôô yap, too ba bi ke i suklu tole ba bi ke bé. Di nti yak lôk kéé i bôlôm ni i bôda lipém i ngéda di ntehe le ba nloo bés to ibale di gwé ngap ni ngandak minson iloo bo. (Filipi 2:3) Yéhôva a yé maséé i ngéda di yé “bôt ba bisu” i ti bape lipém.​—Rôma 12:10; Sôfônia 3:12.

18. Inyuki di gwé ngôñ i nigle suhulnyuu i Yéhôva?

¹⁸ I ngéda di mboñ biliya bi ngui i nigle suhulnyuu i Tata wés nu ngii le Yéhôva, bôt ba nkônde kôôge bés bebee, di nkônde nok bo, di nkônde ki hônba bo. Di ga ti yak bôt bape lipém kiki Yéhôva. Di hôiga bañ le i ngéda di mboñ kii yosôna di nla inyu nigle Nyambe wés nu suhulnyuu le Yéhôva, di ga kônde ba nseñ i mis mé!​—Yésaya 43:4.