Di ta bé bésbotama

1-2. (a) Inyuki di nla kal le di ta bé bésbotama i ngéda di mboma mandutu? (b) Kii di ga tehe munu yigil ini?

I NGÉDA di mboma mandutu, di yé di ba wengoñle di yé bésbotama i put lipan, di yik bé to lelaa di boñ inyu pam mu lipan li. Ndi di ta bé bésbotama. Tata wés nu ngii a ntehe mandutu di mboma, a yé ki bebee i lôl bés i mahôla. Yéhôva a nkal hiki ngwélél wé le: “M’a hôla we.”​—Yésaya 41:10.

² Munu yigil ini, di ga tehe lelaa Yéhôva a nhôla bés (1) i ngéda a ñéga bés, (2) i ngéda a ntôñ bés, (3) i ngéda a ntat bés, (4) i ngéda a nhôgbaha bés. Yéhôva a nkwés bés nkaa le to imbe ndutu di mboma, a yé mbén i hôya bés. A ga tjôô bé bés kekikel. Jon di ta bé bésbotama.

YÉHÔVA A ÑÉGA BÉS

3-4. Lelaa Yéhôva a ñéga bés? (Tjémbi 48:14)

³ Añ Tjémbi 48:14. Yéhôva a nyi le di nla bé éga bésbomede. Lelaa a ñéga bagwélél bé i len ini? Njel yada i yé le a ngwélél Bibel inyu éga bés. (Tjémbi 119:105) Yéhôva a ngwélél Bibel inyu hôla bés i yoñ makidik malam ni i hôlôs bilem bi bi ga hôla bés i ba maséé nano ni i bana niñ boga i dilo di nlo.a Kiki hihéga, a niiga bés le di téédana bañ mut hiun, di ba maliga ikété mam momasôna, di gwés ki bôt bape ni ñem wonsôna. (Tjémbi 37:8; Lôk Héber 13:18; 1 Pétrô 1:22) I ngéda di gwé i bilem bi, di nyila loñge ngwal, loñge sobiina ni loñge liwanda.

⁴ Handugi hala, ikété Bibel, Yéhôva a bi boñ le ba tila miñañ mi bôt ba ba bi boma minlélém mi mandutu kiki bés. (1 Korintô 10:13; Yakôbô 5:17) I ngéda di ñañ i miñañ mi, di ôt ki biniigana mu, di ñôt nseñ inyu ndék yosôna ni mam ima. Pog, di ga yimbe le di ta bé bésbotama, le bôt bape ba bi boma minlélém mi mandutu, ba yémbél ki mo. (1 Pétrô 5:9) Iba, di ga nigil ki i mam ma ga hôla bés i hônba mandutu més, di bak maséé.​—Rôma 15:4.

5. Bonjee Yéhôva a ngwélél inyu éga bés?

⁵ Yéhôva a ngwélél yak lôk kéé inyu éga bés.b Kiki hihéga, bagwélél ba makiiña ba mbéna yuuga bés i makoda inyu ti bés makénd. Minkwel nwap mi nti bés makénd, mi nhôla ki bés i tééda adna yés. (Minson mi baôma 15:40–16:5) Mimañ mi nsal ni ngui inyu hôla hiki wada wés i ba bebee ni Yéhôva. (1 Pétrô 5:​2, 3) Bagwal ba nhôla bon bap i gwés Yéhôva, i yoñ makidik malam ni i bana bilem bilam. (Bingéngén 22:6) Mankéé nu muda nu a yé nhôôlak a yé ndémbél inyu njohok bisita, a tinak bo maéba malam, a tinak ki bo makénd.​—Titô 2:​3-5.

6. Kii di nlama boñ inyu boñ le maéba ma Yéhôva ma bane bés nseñ?

⁶ Yéhôva a nti bés mam ma mbéda bés inyu yoñ makidik malam ni i bana niñ ilam. Lelaa di nla unda le di nkon maséé ni mam a mbôñôl bés? Kaat Bingéngén 3:​5, 6 i nkal le: “Bôdôl Yéhôva ñem ni ñem woñ wonsôna, u nigbene bañ yi yoñ wemede.” Ibale di mboñ hala, ‘a ga boñ le mam ma kee loñge i niñ yés,’ hala a nkobla le a ga hôla bés i keñgle ngandak mandutu ni i bana niñ ilam. Di nti Yéhôva mayéga le a nyi bés loñge loñge, a gwéhék bés ngandak, inyu hala nyen a nti bés maéba ma ma nhôla bés!​—Tjémbi 32:8.

YÉHÔVA A NTÔÑ BÉS

7. Lelaa Yéhôva a ñunda le a ntôñ bés? (Filipi 4:19)

⁷ Añ Filipi 4:19. U héya le Yéhôva a ñéga bés i pes mbuu, a nsayap yak biliya gwés i kôhna bijek, mbot ni homa liyééne. (Matéô 6:33; 2 Tésalônika 3:12) Hala a ta bé béba i tôñ inyu mam ma, ndi Yéhôva a ngwés bé le di lôôha tôñ. (Béñge note d’étude i kaat Matéô 6:25 i Bibel i Pulasi.) Inyuki? Inyule Tata wés a yé mbén i tjôô bagwélél bé. (Matéô 6:8; Lôk Héber 13:5) I ngéda Yéhôva a nkal le a ntôñ bés, di nlama bôdôl nye ñem.

8. Kii Yéhôva a bi bôñôl David?

⁸ Di tehe lelaa Yéhôva a bi hôla David. I ngéda David a bé ke Saulô ngwéé, Yéhôva a bi ti nye ni bôt bé mam momasôna ma bé béda bo inyu niñ. I ngéda David a bi hoñol lelaa Yéhôva a bi tôñ nye nwii ndi nwii, a bi kal le: “Me bé mañge, nano me ñun, ndi me maa bé tehe Nyambe a ntjôô mut a téé sép, to tehe bon bé ba nyagal bijek.” (Tjémbi 37:25) Nlélém kiki David, yak we u bi tehe lelaa Yéhôva a ntôñ we ni lôk kéé i mangéda mabe.

9. Lelaa Yéhôva a ntôñ bagwélél bé i len ini i ngéda bikuu? (Béñge yak bititii.)

⁹ Yéhôva a ntôñ bôt bé, yak i ngéda bikuu. Kiki hihéga, i ngéda njal i bé i Yérusalem i hiai bisu, lôk kéé i mambok mape i bi ômle lôk kéé i Yérusalem i mam ma bé béda bo. (Minson mi baôma 11:​27-30; Rôma 15:​25, 26) Yak i len ini, bagwélél ba Djob ba gwé lem likap. I ngéda bikuu bi nkwo, Yéhôva a ntinde bagwélél bé i ti lôk kéé i bikuu bi nkwél bijek, malép, mambot, ni bee. Bôt ba maoñ ba ntibil mandap ma lôk kéé ni mandap ma Ane ma ma nkwo. Bagwélél ba Yéhôva ba nhôgbaha yak ba ba nimis mandap ni bôt bap,c ba gwéélak Bibel inyu ti bo makénd.

10-11. Kii ndémbél i Borys i niiga bés?

¹⁰ Yéhôva a ntôñ yak i bet ba ngwélél bé nye. Yak bés di nyéñ manjel i unda ba ba ngwélél bé Yéhôva loñgeñem. (Galatia 6:10) I ngéda di mboñ hala, hala a nti mbôgi ilam. Di yoñ hihéga hi Borys, ñéga suklu wada i Ukren. Borys a bé bé Mbôgi Yéhôva ndi a bé ti baudu bé ba ba bé Mbôgi Yéhôva lipém, a undga bo loñgeñem. I ngéda i bi pam le Borys a kee gwét ngwéé i loñ ipe, lôk kéé i bi hôla nye. I mbus ngéda, ba bi naña nye i Mbigda nyemb Yésu, a ke. I ngéda Borys a nhoñol mam momasôna lôk kéé i bi bôñôl nye, a nkal le: “Mbôgi Yéhôva i bi unda me loñgeñem, i yoñ ki ndun ni me. Me nti Mbôgi Yéhôva mayéga ngandak.”

¹¹ Yak bés di nla nigle konangoo i Tata wés nu ngii i ngéda di ñunda bôt bape gwéha, too ba ngwélél Yéhôva, too ba ngwélél bé nye. (Lukas 6:​31, 36) Di mbot ñem le i gwéha di ñunda bo i ga tinde bo i kônde yéñ yi mam inyu Yéhôva ni i gwélél nye lôñ yada ni bés. (1 Pétrô 2:12) To ibale ba mpohol i gwélél Yéhôva tole heni, bés di ga ba maséé inyule “ti i nlona maséé iloo kôhna.”​—Minson mi baôma 20:35.

YÉHÔVA A NTAT BÉS

12. Lelaa Yéhôva a ntat bagwélél bé i len ini? (Tjémbi 91:​1, 2, 14)

¹² Añ Tjémbi 91:​1, 2, 14. I len ini, Yéhôva a mbôn bés le a ga tat bés i pes mbuu. A ga nwas bé le Satan a kéñ bagwélél bé i gwélél nye. (Yôhanes 17:15) Di nla ba nkwoog nkaa le “i njiiha ikeñi,” Yéhôva a ga sôñ bagwélél bé, ha ndik i pes mbuu bé, ndi yak i pes minsôn.​—Masoola 7:​9, 14.

13. Lelaa Yéhôva a ntat hiki wada wés?

¹³ Lelaa Yéhôva a ntat hiki wada wés i len ini? Ni njel Bitilna, Yéhôva a nhôla bés i yi kii i yé loñge ni kii i yé béba. (Lôk Héber 5:14) I ngéda di noñ maéba ma Bibel, di nsôñ maada més ni Yéhôva, di nyoñ ki makidik malam ma ma nhôla bés i bana niñ i maséé. (Tjémbi 91:4) Yéhôva a ngwélél yak ntôñ wé inyu hôla bés i téñbe ni nye. (Yésaya 32:​1, 2) Lôk kéé i ngwés Yéhôva, i nôglak nye. I ngéda di ntégbaha ngéda ni bo i makoda, i likalô, tole i ngéda di nlôôs loñge ngéda ni bo, hala a nti bés makénd, hala a nhôla ki bés i keñgle bilôñ bibe.​—Bingéngén 13:20.

14. (a) Inyuki Yéhôva a nsôñ bé bés hiki ngéda di mboma ndutu? (b) Kii kaat Tjémbi 9:10 i niiga bés? (Béñge yak matila isi lipep.)

¹⁴ I ngéda kôba, Yéhôva a bé tat bagwélél bé i pes minsôn. Ndi a bé boñ bé hala hiki ngéda. Bibel i niiga bés le to ngéda mbe, “mimpuhge mi mam” mi nla pémél to njee. (Ñañal 9:11) Yéhôva a bé a nwas le bagwélél bé bahogi ba boma ndééñga, yak nyemb, ndik inyu unda le Satan a yé mut bitembee. (Hiôb 2:​4-6; Matéô 23:34) Yak i len ini, Yéhôva a mboñ hala. To ibale Yéhôva a nhéya bé mandutu més, di nla ba nkwoog nkaa le a ga tjôô bé i bôt ba ngwés nye.d​—Tjémbi 9:10.

YÉHÔVA A NHÔGBAHA BÉS

15. Lelaa masoohe, Bibel, ni bilôk bikéé bi nti bés hogbe? (2 Korintô 1:​3, 4)

¹⁵ Añ 2 Korintô 1:​3, 4. Ngim mangéda, ndutu i yé i nai bés, yak nduña i nai. Bebek u môdi woñ homa wetama hanano inyule ndutu i nai. Baa mut a yé le a nok we? Ñ, Yéhôva a nok we. A nok ndutu i ngéda di nok ndutu, a nti ki bés hogbe ikété “manoodana més momasôna.” Lelaa? I ngéda di nyemhe Yéhôva, a nti bés “nsañ u Nyambe u u nloo mam momasôna mut binam a nla nok.” (Filipi 4:​6, 7) Yak bibañga bi Yéhôva di ñañ ikété Bibel bi nhôgbaha bés. Yéhôva a ñunda bés gwéha yé, pék yé, a nti ki bés botñem, hala a nlédés bés. I ngéda di nke i makoda, lôk kéé i nhôgbaha bés, yak minkwel di ñemble nyoo mi nti bés makénd.

16. Kii ndémbél i Nathan bo Priscilla i niiga bés?

¹⁶ Ndémbél i Nathan bo Priscilla, ba ba nyééne i Amérika, i ñunda bés lelaa Yéhôva a ngwélél Bañga yé inyu lédés bagwélél bé. Hala a yé ndék nwii le ba bi kit le ba nke i het ngôñ i batéé likalô i bé. Nathan a nkal le: “Di bé yi le Yéhôva a ga sayap bés.” Ndi bo ngi pam nyoo, ba kwo kon, yak liyep li nai. I mbus ngéda, ba bi témb i mbai yap, yak nyoo liyep li koba bo. Nathan a nkal le: “Me bé nok bé inyuki Yéhôva a bi sayap bé bés kiki me bé hoñol. Me bôdôl badba le: ‘Bo me la, me mboñ kii?’” I mbus ngéda, Nathan bo Priscilla ba bi pam i nok le Nyambe a bi yôi bé bo. Nathan a nkônde le: “Mu mangéda ma, di bi léba minlôñ mi bikaat mi mi bi lédés bés ngandak. Iloole di héléé i béñge mandutu més, di bi bigda lelaa Yéhôva a bi sayap bés. Hala a bi hôla bés i kôôba inyu manoodana ma bé lo.”

17. Lelaa lôk kéé i bi lédés sita Helga? (Béñge yak titii.)

¹⁷ Lôk kéé i mboñ ki mam mape inyu lédés bés. Mambe ma? Di béñge ndémbél i Helga, nu a yé i Oñgri. Mandutu ma bi kok nye nwii ndi nwii, a lehel ñem, a hoñol le a ta ha bé nseñ. Ndi i ngéda a nhoñol lelaa Yéhôva a bi gwélél lôk kéé inyu lédés nye, a nkal le: “Hiki ngéda me bééna nduña inyu bôlô yem, inyu man wem nu a bé kônôl me tole inyu jam lipe, Yéhôva a bé a lédés me. Mu 30 ma nwii ma ntagbe, Yéhôva a bi yôi bé me to kel yada, a bé gwélél lôk kéé inyu ti me makénd ni bibuk bilam. Lôk kéé i bé tilna me, tole i bé bégés me i ngéda me bééna toi ngôñ le ba ti me makénd.”

18. Lelaa di yé le di lédés bôt bape?

¹⁸ Kinje bisai di gwé i nigle Yéhôva i ngéda di nti lôk kéé yés hogbe! Lelaa di nla boñ hala? Di nla yoñ ngéda i emble bo, i mômôs bo, ni i hôla bo i boñ ngim mam. (Bingéngén 3:27) Di nlama yéñ manjel inyu hôgbaha ba bobasôna ba nok ndutu, yak ba ba ngwélél bé Yéhôva. Ibale mut wés libôk a nok ndutu, a nkon, tole a gwé nduña, di nlama yuuga nye, di yoñ ngéda i emble nye, di éñél ki nye minlôñ mi Bibel mi mi nhôgbaha nye. I ngéda di nigle Yéhôva, “Nyambe nu hogbe yosôna,” di yé le di hôla lôk kéé i hônba mandutu map, di yé yak le di tinde i bôt ba ngwélél bé Yéhôva i jôp i ntôñ.​—Matéô 5:16.

YÉHÔVA A GA YÔI BÉ BÉS KEKIKEL

19. Kii Yéhôva a mbôñôl bés, lelaa di nla nigle nye?

¹⁹ Yéhôva a ngwés ba bobasôna ba ngwés nye. A yé mbén i yôi bés i ngéda di yé ikété ndutu. Kiki ngwal a ntôñ man, hala nyen yak Yéhôva a ntôñ bagwélél bé. A ñéga bés, a ntôñ bés, a ntat bés, a nhôgbaha ki bés. Di nigle Tata wés nu ngii i ngéda di nti bôt bape makénd mu mandutu map. To imbe ndutu di mboma, di hôiga bañ le Yéhôva a yé ni bés. Ngo nyen a nkal bés le: “U kon bañ woñi inyule me yé ni we.” (Yésaya 41:10) Hala a nlôôha lédés bés. Jon di yé nkwoog nkaa le di ga ba bé bésbotama!