‘I yé bés loñge le di tiige Nyambe bebee!’

1-2. (a) Kii di nlama boñ inyu bana bañga liwanda? (b) Kii di ga tehe munu yigil ini?

BAA u gwé bañga liwanda? Lelaa ni bi boñ ndi ni yila mawanda? Bebek le u bi lôôs ngéda ni nye, u yi mandutu a bi boma, u yi yak i mam a ngwés ni mam a ñoo. U bi yimbe bilem gwé bilam, hala a tinde we i nigle nye, u gwés ki nye.

² I mbéda ngéda ni biliya bi ngui inyu bana bañga liwanda. Nlélém jam won u yé i ngéda di nsômbôl yila liwanda ni Yéhôva Nyambe. I yigil ini i ga unda bés lelaa di nla tiige Nyambe wés bebee, ni bisai di nkôhna i ngéda di mboñ hala. Di tehe ndugi inyuki i yé loñge i tiige bebee ni bañga yés liwanda le Yéhôva.

3. Inyuki di nlama hoñol bisai di nkôs ibale di yé liwanda ni Yéhôva? Ti hihéga.

³ Bésbomede di nyi le i yé loñge i tiige bebee ni Yéhôva. Ndi ibale di nyoñ ngéda i hoñol bisai di nkôs ibale di yé mawanda mé, hala a ga tinde bés i tiige nye bebee. (Tjémbi 63:​6-8) Kiki hihéga, di nyi le i yé loñge i je loñge, i noi loñge, i boñ sport ni i nyo malép ngandak. Ndi ngim bôt i nhoñol bé i mam ma, i nyoñ bé to ngéda ni mbôô wap. Ndi ibale di mbéna hoñol i mam ma, d’a ba di mboñ mo hiki ngéda. Yak bés, to hala kiki di nyi le i yé loñge i tiige bebee ni Yéhôva, ibale di nyoñ ngéda i hoñol bisai di nkôs, hala a ga tinde bés i kônde tiige nye bebee.​—Tjémbi 119:​27-30

4. Kii ntôp tjémbi a bi kal i kaat Tjémbi 73:28?

⁴ Añ Tjémbi 73:28. I nwet a bi tila kaat Tjémbi 73 a bé man Lôk Lévi nu a bé tôp tjémbi i témpel Yéhôva. I mpôna le a bi gwélél Yéhôva ni ñem wé wonsôna nwii ndi nwii. Ndi a bé yi le nyemede ni bôt bape ba nlama bigda le i yé loñge i “tiige Nyambe bebee.” Bimbe bisai di nkôs i ngéda di ntiige nye bebee?

‘I NGÉDA DI NTIIGE NYAMBE BEBEE,’ DI YÉ MASÉÉ

5. (a) Inyuki di yé maséé i ngéda di ntiige Nyambe bebee? (b) Lelaa kaat Bingéngén 2:​6-16 i nhôla bés i yi tjandi di nla keñgle, ibale di noñ maéba ma Yéhôva ma ma yé mu Bañga yé?

⁵ Kiki di ntiige Yéhôva bebee, hala nyen di nkônde kon maséé. (Tjémbi 65:4) Ngandak mam yon i ntinde bés i kal hala. Jam jada li yé le i ngéda di noñ maéba ma Yéhôva ma ma yé i Bañga yé, di yé maséé. I maéba ma, ma nhôla bés i keñgle bilôñ bibe ni bibéba bikeñi. (Añ Bingéngén 2:​6-16.) Inyu hala nyen Bibel i nkal le: “I mut a nléba pék a yé kimasoda, yak ni mut a nkôhna yi i bagal mam.”​—Bingéngén 3:13.

6. Inyuki ntôp tjémbi a bé kônha ngoo?

⁶ Yak i bés ba di ngwélél Yéhôva, di yé di ba ngoo ngim mangéda. I mut a bi tila kaat Tjémbi 73 a bé kônha ngoo i ngéda a bé tehe mandutu mé. I ngeñ a bé tehe le bibéba bi bôt bi niñ loñge, ki le bi nôgôl bé Nyambe, hala a bé tééñga nye, a bi kahal tam bo. A bé hoñol le bibéba bi bôt ni bôt ba lipamal bon ba yé mingwañ mi bôt, ba bak mbôô, ba nok bé to ndutu. (Tjémbi 73:​3-7, 12) I mam mana momasôna ma bi boñ le a kahal badba too nseñ u yé i gwélél Yéhôva. Njôô i bi boñ nye le a kal le: “Yañga nyen me bi tééda ñem u mpôp, yañga ki nyen me bi jôwa moo mem inyu unda le me yé nginsohi.”​—Tjémbi 73:13.

7. Kii i nla hôla bés i ngéda di nkônha ngoo? (Béñge yak titii i lipep li bisu.)

⁷ Ntôp tjémbi a bi nwas bé le mandutu mé ma tômbôs nye. A bi ban ñem, a “jôp i homa mpubhaga nu Nyambe,” nyoo nyen Yéhôva a bi tine nye maéba malam. (Tjémbi 73:​17-19) Yéhôva, bañga yés liwanda, a nyi i ngéda di yé ikété ndutu. Ibale di nsoohe nye, di nwas ki le a éga bés ni njel Bañga yé ni ntôñ wé, d’a bana ngui i nihbe mandutu més. To ibale nduña i yé bés nnayak, Yéhôva a nhôgbaha bés, a mômôs ki bés.​—Tjémbi 94:19.a

‘I NGÉDA DI NTIIGE NYAMBE BEBEE,’ DI GWÉ NIÑ ILAM NI BOTÑEM

8. Bimbe bisai bipe di nkôs i ngéda di ntiige Nyambe bebee?

⁸ Bisai bipe bi yé i ngéda di ntiige Nyambe bebee. Pog, i ngéda di ntiige Nyambe bebee, di gwé niñ ilam. Iba, i ngéda di ntiige Nyambe bebee, di gwé botñem. (Yérémia 29:11) Di kônde le pôdôl i mam ma mo ima.

9. Inyuki di yé maséé i ngéda di ntiige Yéhôva bebee?

⁹ I ngéda di ntiige Yéhôva bebee, di gwé niñ ilam. Ngandak bôt i i nhémle bé Nyambe i nkal le niñ i ta bé nseñ ni le bôt ba binam ba ga mal hana ’isi. Ndi yigil yés i Bibel i bi kwés bés nkaa le Nyambe “a yé ni le a nyila nu a mbom i bôt ba nyéñ toi nye.” (Lôk Héber 11:6) Yak i len ini, niñ i nél bés inyule di mboñ i mam Yéhôva a nkal bés le di boñ, di ngwélél Tata wés nu ngii le Yéhôva.​—Ndiimba Mbén 10:​12, 13.

10. Kii kaat Tjémbi 37:29 i nkal inyu bet ba mbôdôl Yéhôva ñem?

¹⁰ Inyu ngandak bôt, niñ yosôna i yé ndik le ba kee i bôlô, ba biiba, ba gwal bon, ba tééda moni mi ba ga yôñôl ngui i retraite. Ba gwé bé jam mu too Djob a yé, too a ta bé. Ndi bagwélél ba Yéhôva ba mbôdôl nye ñem. (Tjémbi 25:​3-5; 1 Timôtéô 6:17) Ñ, di mbôdôl Nyambe wés ni Liwanda jés ñem. Di nyi le i mam momasôna a mbôn bés ma ga yon. Ngandak bisai i mbem bés. Mu bisai bi, jam jada li yé le di ga bégés Yéhôva i boga ni boga, i paradis.​—Añ Tjémbi 37:29.

11. Bimbe bisai di nkôs i ngéda di ntiige Nyambe bebee, kii yak nye a nôgda?

¹¹ Bisai bipe bi yé i ngéda di ntiige Nyambe bebee. Kiki hihéga, Yéhôva a nkal le ibale di mboñ béba ndi di tam yo, a ga nwéhél bés. (Yésaya 1:18) Inyu hala nyen kiññem i nlama ha bé tééñga bés inyu bibéba di bi boñ behee. (Tjémbi 32:​1-5) Bisai bipe bi yé le di nkônha Yéhôva maséé. (Bingéngén 23:15) Yak bé ni nyi bisai bipe di nkôs i ngéda di ntiige Nyambe bebee. Ndi kii i nla hôla bés le di kônde tiige nye bebee?

LELAA DI NLA KÔNDE “TIIGE NYAMBE BEBEE”

12. Kii u ma boñ inyu tiige Yéhôva bebee?

¹² Ibale u yé nsôblege, hala a nkobla le u ntiige Yéhôva bebee. U nigil ngandak mam inyu Yéhôva bo Yésu Kristô, u ntam bibéba gwoñ, u nlédés hémle yoñ, u mboñ ki biliya i nôgôl mambén ma Yéhôva. Ndi inyu boñ le di kônde tiige Nyambe bebee, i mbat le di kee ni bisu i boñ i mam ma.​—Kôlôsé 2:6.

13. Mambe mam ma nla hôla bés i kônde tiige Yéhôva bebee?

¹³ Kii i nla hôla bés i kônde tiige bebee ni Yéhôva? (1) Di kee ni bisu i añ Bibel ni i nigil yo. Di nlama ndik bé añ Bibel inyu yi Nyambe, ndi di nlama yéñ yi sômbôl yé ni i noñ matiñ mé. (Éfésô 5:​15-17) (2) Di nlama ôt pék mu mam momasôna ma ma ñunda le a ngwés bés, inyu lédés hémle yés. (3) Di nlama oo mam Yéhôva a ñoo, di keñgle ki bôt ba ba mboñ mam mabe.​—Tjémbi 1:1; 101:3.

14. Inoñnaga ni 1 Korintô 10:​31, mambe mam di nla boñ hiki kel inyu lémél Yéhôva? (Béñge yak bititii.)

¹⁴ Añ 1 Korintô 10:31. I yé loñge le di boñ mam ma nlémél Yéhôva. Di nke ndik bé i makoda ni i likalô, di nlama yak lémél Yéhôva mu mam di mboñ hiki kel. Kiki hihéga, i ngéda di yé maliga ikété mam momasôna, di kabak, di nkônha Yéhôva maséé. (2 Korintô 8:21; 9:7) Yéhôva a gwé ki ngôñ le di unda nye le di nti nye mayéga inyu niñ a bi ti bés. Di ñunda le di nti nye mayéga i ngéda di nkeñgle mbéna je ni ngandak nyôba, di yoñok ki ngéda ni mbôô wés. Mam momasôna di mboñ inyu lémél Yéhôva, yak disisii di mam di nkônha nye maséé.​—Lukas 16:10.

15. Lelaa Yéhôva a ngwés le di tehe bôt bape?

¹⁵ Yéhôva a ñunda bôt ba téé sép ni bôt ba téé bé sép loñgeñem. (Matéô 5:45) A nsômbôl le yak bés di unda bôt bape loñgeñem. Kiki hihéga, di nlama bé ‘ôbôs jôl li mut nye ki nye, di ba bañ to bôt ba ngwés momol, . . . di undga bôt bobasôna ñemlima ngéda yosôna.’ (Titô 3:2) Hala a nkobla le di nlama bé yan bôt bape inyule ba ngwélél bé Yéhôva. (2 Timôtéô 2:​23-25) I ngéda di nti bôt bobasôna lipém, di nkônde tiige Yéhôva bebee.

TO DI MBAAGE, DI NLA “TIIGE NYAMBE BEBEE”

16. Imbe ndutu ntila kaat Tjémbi 73 a bi boma?

¹⁶ Ndi baa u ga boñ lelaa ibale u nkahal hoñol le u kôli bé ni gwéha i Yéhôva? Di mbôk di tehe le i mut a bi tila kaat Tjémbi 73 a bi boma i nya ndutu i. A bi kal le: “Makôô mem ma bé bebee ni baage; mabal mem ma bé ma ma sendi.” (Tjémbi 73:2) A bi sôô bé le “ñem u bé hénd” nye. Nye a “bé jôñ mut,” a bé “kiki nuga,” a “bééna bé yi,” i bisu bi Yéhôva. (Tjémbi 73:21, 22) Baa a bi hoñol le kiki a mbaage, a kôli ha bé le Yéhôva a gwés nye?

17. (a) Kii ntôp tjémbi a bi boñ i ngéda i bi pam nye i héya bitamb? (b) Ñañ wé u niiga kii bés? (Béñge yak bititii.)

¹⁷ To ibale ntôp tjémbi a bé hoñol le Yéhôva a bé ha bé ni nye, hala a bi nom bé. Bibuk gwé bi ñunda le bebek i ngéda i bi pam nye i héya bitamb, a bi tiige bebee ni Yéhôva, a kal le: “Ndi nano, me yé ni we [Yéhôva] ngéda yosôna; u bi gwel woo wem walôm. Ni maéba moñ, u ñéga me, u nkena ki me i homa lipém li yéne.” (Tjémbi 73:​23, 24) Yak bés di nlama solbene yak Yéhôva, nu a yé liaa jés i ngéda di nkahal nimis makénd. (Tjémbi 73:26; 94:18) To ibale di mbaage, di kon bañ woñi i tiige bebee ni Yéhôva, di hôiga bañ le a yé “bebee i nwéhél.” (Tjémbi 86:5) I ngéda ndutu i nai, ha nyen di nlama toi tiige bebee ni Nyambe wés.​—Tjémbi 103:​13, 14.

DI “TIIGE NYAMBE BEBEE” I BOGA NI BOGA

18. Inyuki di ga waa bé tiige Yéhôva bebee?

¹⁸ Di ga waa bé tiige Yéhôva bebee, di ga ke ni bisu i yi nye i boga ni boga. Bibel i nkal le manjel ma Yéhôva, pék yé, ni yi yé bi “mbuma ñañ.”​—Rôma 11:33.

19. Kii kaat Tjémbi i niiga bés?

¹⁹ Kaat Tjémbi 79:13 i nkal le: “Bés bôt ba litén joñ ni mintômba mi bémba yoñ, d’a ti we mayéga i boga ni boga; d’a añle ki tjai tjodisôna bibégés gwoñ.” Yak bés di ga kôhna bisai i boga ni boga ibale di nwaa bé tiige Yéhôva bebee. Di nla kal le: “Nyambe a yé nu a nti ñem wem ngui, a yé ki ngaba yem i mba ni mba.”​—Tjémbi 73:26.