Yôhanes 16:33—“Me bi Yémbél Nkoñ ’Isi”

“Me nkal bé i mam mana inyu boñ le ni njel yem ni bana nsañ. N’a bana njiiha ikété nkoñ ’isi, ndi ni bana ñem ngui! Me bi yémbél nkoñ ’isi”—Yôhanes 16:33, Bitilna Bipubi. Ngobol mbok yondo. Matéô–Masoola..

“I bédga le me kal yak bé i mam mana inyu boñ le ni bana nsañ ikété adna ni me. N’a boma ngandak mandutu i nkoñ ’isi, ndi lédhana miñem, me mal nyémbél nkoñ ’isi”—Yôhanes 16:33, Parole vivante.

Ndoñi i kaat Yôhanes 16:33

Ni bipôdôl bini, Yésu a nyis banigil bé le yak bo ba nla pam i gwélél Nyambe to ibale ba boma mandutu ni ngolba.

“Me nkal bé i mam mana inyu boñ le ni njel yema ni bana nsañ.” Mamélél ma nlôñ unu ma ñunda le Yésu a bé kal bé le di ga bana nsañ inyule gwét bi ga ba ha bé. Nsañ u, u yé ñem nwee. Di nkôs nsañ u “ni njel” Yésu, nu a bi bôn le a’ ep mbuu Mpubi. I “nhôla” nu a bé lama ti banigil ba Yésu ngui i nihbe mandutu momasôna ba bé le ba boma.—Yôhanes 14:16, 26, 27.

“N’a bana njiiha ikété nkoñ ’isi, ndi ni bana ñem ngui!” Yésu a bi sôô bé banigil bé le ba ga kôhna mandutu kiki bo ngitelepsép ni ngolba. (Matéô 24:9; 2 Timôtéô 3:12) Ndi to hala, ba bé lama “bana ñem ngui,” tole “lédés ñem.”—Yôhanes 16:33, New International Version.

“Me bi yémbél nkoñ ’isi.” Hana homa nunu, i buk ini le “nkoñ ’isi” i ngwéélana inyu pôdôl bôt ba binam bobasôna ba ba ngwélél bé Djob.b Kaat 1 Yôhanes 5:19 i nkal le: “Nkoñ ’isi wonsôna u yé isi ane i mut mbe,” hala wee Satan. Maboñok ni mahoñol ma bôt ba “nkoñ ’isi” unu ma nkiha bé ni sômbôl i Djob.—1 Yôhanes 2:15-17.

Satan ni bôt bé ba bi noode kéñ Yésu i yônôs sômbôl i Djob i i bé le a niiga bôt a ti ki niñ yé nkikip kiki binoñ. (Matéô 20:28; Lukas 4:13; Yôhanes 18:37) Ndi Yésu a bi nwas bé le nkoñ ’isi u yoña nye kayéle a kôm Nyambe mbus. A bi téñbe letee ni i nyemb. Inyu hala nyen Yésu a bé a kôli kal le a bi yémbél nkoñ ’isi ni le Satan “ñane nkoñ ’isi” a “ñénél bé” nye.—Yôhanes 14:30.

Ni njel ndémbél yé, Yesu a bi unda banigil bé le yak bo ba nla pam i téñbe ni Nyambe to ibale ba mboma manoodana. Yésu a bé sômbôl kal le : “Ibale me bi yémbél nkoñ ’isi yak bé ni nla yémbél wo.”

Mam ma bi tagbe i ngéda kaat Yôhanes 16:33 i bé tilba

Yésu a bi kal bibañga bini u u nsôk ilole a wo. Lakii a bé yi le nyemb i yé bebee, a bi yoñ ngéda i ti baôma bé maéba ma nsôk. A bi kal yak bo ngim mam ma bé bem bo inyu boñ le ba ôt pék mu. A bi kal le: Ba ga tehe ha bé nye, ba ga kôhna ndééñga, ba ga nol yak bo. (Yôhanes 15:20; 16:2, 10) Kikii Yésu a bé yi le i mam mana ma bé le ma kônha banigil bé woñi, jon a bi mélés léta yé ni bibañga bi yé i kaat Yôhanes 16:33, inyu ti bo makénd ni lédés bo.

Bibañga bi Yésu ni ndémbél yé bi nla yak ti banigil bé makénd i len ini. Bikristen gwobisôna bi nla téñbe ni Djob to ibale ba boma manoodana.