Yôhanes a nsômbôl yi mam mape inyu Yésu

Hala a yé bebee le ngim nwii le Yôhanes Nsôble a yé mok, ndi a nok yaa ngan i mam ma hélha ma Yésu. Hoñol lelaa Yôhanes a nôgda ngéda banigil bé ba nkal nye le Yésu a ntugul man yik muda i Nain. Ndi, Yôhanes a gwé ngôñ le Yésu nyemede a toñle nye mam ma momasôna. Jon Yôhanes a nsébél banigil bé iba. Inyuki? Inyu bat Yésu le: “Baa wen u yé Nu a nlama lo, tole di nlama bem numpe?”​—Lukas 7:19.

Baa mbadga ini i nhélhana? Yôhanes a yé mut hémle, i ngéda a bé sôble Yésu hala a yé bebee le nwii ima, a bi tehe mbuu mpubi u Djob u nsôs ngii Yésu, a nok ki kiñ Djob i nkémhe. Di gwé bé njom i i ntinde bés i kal le hémle i Yôhanes i nhoi. Inyule ibale hala, ki Yésu a ntôp bé nye jôl lilam kiki a nke boñ hanano. Ndi, ibale Yôhanes a mpééna bé, inyuki a mbat Yésu mbadga i?

I nla ba le Yôhanes a nsômbôl ndik ba nkwoog nkaa le Yésu a yé toi Mésia. Hala a bé lama lédés nye mu kiki a yé ndap mok. Ndi, i nene le mbadga i Yôhanes i gwé nogna ipe. A nyi mbañ i Bibel i ñunda le Nhook u Djob u bé lama ba kiñe ni ntohol. Hala a yé ngandak sôñ nano le Yésu a nkôs sôble, ndi, Yôhanes a ngi yii i ndap mok. Jon Yôhanes a mbat ibale numpe a nlama lo inyu i yiha Yésu ni yônôs mam mape momasôna Mésia a nlama yônôs.

Iloole a kal ndik banigil ba Yôhanes le: ‘Ngo men me yé Nu a nlama lo,’ Yésu a nti ndémbél i ñunda le nyen Djob a mpohol, a mélés ngandak bôt ni nya makon yosôna. I mbus, a nkal banigil le: “Kena, ni añle Yôhanes i mam ni yé nok, ni tehge ki: Nano bôt ba ndim ba ntehna, yak bibôk bi bôt bi nke, bakon lô ba mbôôp, yak bôt ba ndok ba noga, bawoga ba ntémb i niñ, yak diyeyeba di ñemble ñañ nlam.”​—Matéô 11:4, 5.

Bebek mbadga i Yôhanes i ñunda le a bé bem le Yésu a boñ mam i lel ma a mboñ nano, bebek a pémés yak nye i mok. Ndi Yésu a yé unda Yôhanes le a nlama bé bem le a boñ jam li nloo bihélha bi mam a yé boñ.

Ngéda banigil ba Yôhanes ba nke, Yésu a nkal limut le Yôhanes a nlel mpôdôl. A yé ‘mut nwin’ Yéhôva, nu Malaki 3:1 a bi pôdôl. Nyen a yé ki mpôdôl Éliya nu Malaki 4:5, 6 a bi pôdôl. Yésu a ntoñol le: “Me nkal bé maliga le: Ikété bôt bôda ba ma gwal, to wada a yé ngi pam mu le a nloo Yôhanes Nsôble, ndi nuntitigi ikété Ane i ngii a nloo nye.”​—Matéô 11:11.

Ngéda a nkal le nu a yé ntitigi i Ane ngii a nloo Yôhanes, Yésu a yé unda le Yôhanes a mba bé nsoñgi u bôt ba nke i ngii. Yôhanes a bi kôôbana Yésu njel, ndi a bi wo ilole Kristô a nyibil njel maké ma ngii. (Lôk Héber 10:19, 20) To hala, Yôhanes a yé mpôdôl nu a ga kôdôl Ane Djob inyu niñ hana isi.