Kei i i nyi jam​—Béba tole loñge?​—Kii Bibel i nkal?

Baéga ba nkoñ ’isi, bayimam ni bôt ba njôôñ yi ba bi tip pôdôl intelligence Artificielle (AI). Bomede ba bi tehe le i sélél i, i yé nseñ, ndi ba kon woñi, ni bikuu i sélél i, i nla lona.

• “AI a yé ntén sélél yada i mondo i i yé nseñ ngandak i len ini, i gwé ngap i nlémés niñ yés . . . Ndi i nlélém ngéda, AI i nkônde bés woñi i ñem, i ntihba yak mambén ma ma nsôñ niñ i mut binam, i boñ le bôt ba mbôdôl ha bé démôkrasi ñem.”​—Kamala Harris, nkena loñ Amérika nu nyônos iba, hilo hi nyônôs 4, hi sôñ Mpuye, 2023.

• “Tolaki intelligence artificielle (AI) i nti botñem inyu matibla, ndi i nlélém ngéda, yak woñi i yé mu inyu matibla ma, ni loñge i mut binam,” hala nyen juu li bidokta ni bayimam ba matibla ni nkoñ ’isi wonsôna, ba bi tila i hilo 9, i sôñ mpuye, nwii 2023, ñéga a yé Docteur Frederik Federspiel, mu kaat ini le BMJ Global Health.a

• “Nano AI a yila sélél ba nla gwélél inyu tjam minkoda mi manwin. Ndék ngéda, i ga bôdôl ba ngok bageene inyu jam li bôlô. Bayimam ba nkon ki woñi le AI i ga sôk bii nkoñ ’isi ikété ndutu.”​—The New York Times, hilo 1, hi sôñ mpuye, nwii 2023.

Bilôl gwon bi ga kal bés ibale ba nla gwélél AI inyu njômbi ilam tole inyu njômbi ibe. Kii Bibel i nkal ?

Inyuki bisélél bôt ba binam ba mbañ bi nlona bikuu hiki ngéda

Bibel i ntoñol inyuki di nla bé ba nkwoog nkaa le bisélél bôt ba binam ba mbañ, ba ga gwélél ndik gwo inyu loñge.

1. 1. To ibale njômbi i bôt ba binam i yé ilam, bomede ba nla bé yi i bisu bi ngéda ibale maboñok map ma ga lona bikuu bibe.

   • “Ngim njel i nene loñge i mis ma mut binam, ndi i nsôk i kena nye i nyemb.”​—Bingéngén 14:12

2. 2. I mbus le mut a mal bañ sélél, a nla bé yi lelaa bôt bape ba ga gwélél sélél yé.

   • “Me nlama yigle mo [bôlô yem] i mut a nlo i mbus yem. Njee a nyi too a ga bana pék too a ga ba jôñ mut? Ndi nyen a nlama yoñ mam momasôna me bi boñ biliya bi ngui i kôhna hana ‘isi, me gwélél ki pék I kôhna mo.”​—Ñañal 2:18, 19

I mahoñol mana, ma nyelel ndik le Nhek wés nyen a nlama éga bés.

Hee di kôli biine botñem yés

Nhek wés a mbôn le a ga nwas ha bé le kekikel bôt ba binam to bisélél gwap bi ôbôs hisi.

• “Hisi hi nom i boga ni boga.”​—Ñañal 1:4.

• “Bôt ba téé sép ba ga kôdôl hisi, ba niñ ki mu i boga ni boga.”​—Tjémbi 37:29.

Ikété Bibel, Nhek wés a nti biniigana bi bi mbôn bés dilo dilam. Inyu kônde yi mam mape Bibel i nkal, añ bikaat bini le “Existe-t-il un guide fiable” ni “Bañga botñem inyu dilo di nlo.”