Bangomin ba ba yé bôt ba malôga, ba nibik​—Kii Ane Djob y’a boñ inyu i nya mam i?

Bôt ba nyéñ le i bet ba bééga énél ba ba bôt le bape nla bôdôl ñem; bôt ba nwaa tehe bangomin ba ba yé bôt ba malôga, bôt ba wip. I nwii 2023, ba bi bat ngandak bôt mambadga mu jam li; ndimbhe yap i bé le, mu nsoñgi u bôt ba nla bé bôdôl ñem, bôt ba pôlitik ba yé bôt ba bisu bisu.a

Bibel i mpôdôl ngim énél i het Ñane a yé mut maliga i manjel momasôna, mut le bape ba nla bôdôl yaga ñem, nu a ñoo malôga ni wip. I énél i yoñ Bibel i nsébél le Ane Djob, Ñénél a bak Yésu Kristô nyemede.​—Yésaya 9:7.

Yésu a bi unda ngi pééna yo ki yo le a ntôñ toi bôt ba binam. (Matéô 9:35, 36) Mu tel yé i Kiñe i Ane Djob, a ga boñ le i bôt bobasôna ba nit énél yé ba niñ ikété nsañ ni telepsép.​—Tjémbi 72:12-14.