Sôblana ibabé i lep ngéda

1. Inyuki di nlama sôblana?

BAA u ngwés Yéhôva Nyambe, nu a bi ti we makébla malam momasôna, yak niñ yomede? Baa u nsômbôl unda nye le u ngwés nye? Njel i nlôôha lam i boñ hala i yé le u ti wemede nkikip i boñ sômbôl yé, u sôblana ki. I ngéda u ga boñ i mam ma mo ima nyen u ga jôp ikété lihaa li Yéhôva. Ha ngéda i, Isoñ ni Liwanda joñ a ga éga we, a yoñ ki ndun ni we inyule u ga ba wé. (Tjémbi 73:24; Yésaya 43:1, 2) I ti wemede nkikip yak Yéhôva ni i kôs sôble bi nti we botñem i niñ i maséé, i boga ni boga.—1 Pétrô 3:21.

2. Kii di ga tehe munu yigil ini?

² Baa ngim jam i nkéñ we i kôs sôble? Ibale ñ, yi le u ta bé wetama. Inyu sôblana, didun di bôt di bi lona mahéñha mu libak jap, mahoñol map ni maboñok map. I len ini, ba ngwélél Yéhôva ni maséé lôñni makénd. Kii ndémbél i bôt ba bi sôblana i hiai bisu i niiga bés? Di béñge mandutu ba bi boma ni kii ndémbél yap i nla niiga bés.

BÔT BA SAMARIA BA BI SÔBLANA

3. Mambe mandutu bôt ba Samaria bahogi ba bi lama yémbél ilole ba nsôblana?

³ I ngéda Yésu a bé hana ’isi, bôt ba Samaria ba bé i ngim ntôñ u u bé i nlômbi Sikem ni i Samaria, i ñombok u Yudéa. Ilole bôt ba Samaria ba nsôblana, i bé béda le ba tibil nok Bañga i Djob. Bôt ba Samaria ba bé hémle ndik bikaat bitan bi bisu bi Bitilna, hala wee ibôdôl i kaat Bibôdle ipam i kaat Ndiimba Mbén, bebek yak kaat Yôsua. Ndi bôt ba Samaria ba bé bem malo ma Mésia inoñnaga ni mbônga u Nyambe, u u yé i kaat Ndiimba Mbén 18:18, 19. (Yôhanes 4:25) Inyu boñ le ba sôblana, i bé béda le ba hémle le Yésu a yé Mésia. “Ngandak bôt ba Samaria” i bi boñ hala. (Yôhanes 4:39) Bahogi ipôla yap ba bi lama yémbél mahoñol ma ndodla ni ma mbagla, ma ma bé bôdôl o minkañ ipôla bôt ba Samaria ni Lôk Yuda.—Lukas 9:52-54.

4. Inoñnaga ni Minson mi baôma 8:5, 6, 14, lelaa bôt ba Samaria bahogi ba bi yoñ ñañ nlam Filipô a bé añal?

⁴ Kii i bi hôla bôt ba Samaria i sôblana? I ngéda Filipô, ñañal ñañ nlam, a bi “tééne bo likalô inyu Kristô,” bôt bahogi ba Samaria ba bi “neebe Bañga i Nyambe.” (Añ Minson mi baôma 8:5, 6, 14.) To hala kiki Filipô a bé man Lôk Yuda, ba bi tjél bé emble nye. Bebek, ba bé bigda bikaat bitan bi bisu bi Bitilna bi bi bé niiga le Nyambe a ntodol bé bôt. (Ndiimba Mbén 10:17-19) Jon ba bi emble i yom Filipô a bi kal bo inyu Kristô, ba neebe ki le Nyambe a bé nit toi Filipô. Filipô a bi boñ ki ngandak bihélha bi mam. Mu mam ma, a bé mbuubaha bakokon, a pémhak mimbuu mimbe.—Minson mi baôma 8:7.

5. Kii ndémbél i bôt ba Samaria i niiga bés?

⁵ Bôt ba Samaria ba bé le ba nwas le mbagla ni ngiyi bi kéñ bo i hol. Ndi ba bi nwas bé le hala a bôña. I ngéda bôt ba Samaria ba bi yi le maliga mon Filipô a bé niiga bo, ba bi lep bé ngéda, ba sôblana. Bibel i ntoñol le: “Ndi i ngéda ba bi hémle Filipô nu a bé añal ñañ nlam u Ane Nyambe ni jôl li Yésu Kristô, bôlôm ni bôda ba kôhna sôble.” (Minson mi baôma 8:12) Baa u yé nkwoog nkaa le Bañga i Djob i yé maliga ni le Mbôgi Yéhôva i nyémbél ndodla, i boñok biliya i unda bañga gwéha i i yé yimbne i bañga bikristen? (Yôhanes 13:35) Jon, yoñ makidik ma ngui, u bôdôl Yéhôva ñem le a ga sayap we.

6. Lelaa ndémbél i Ruben i nla hôla bés?

⁶ Ruben, nu a nyééne i loñ Jaman, a bi néñél i lihaa li Mbôgi Yéhôva. Ndi i ngéda a bé mañge, a bé pééna le Yéhôva a yé toi. Kii i bi hôla nye le a pééna ha bañ? Kiki a bi yimbe le yi i bé hañ nye, a yoñ makidik le a nsal ni ngui. A nkal le: “I bé béda le me nigil bikaat bi ntôñ inyu boñ le me pééna ha bañ. Me bi nigil ño nkwel u u mpôdôl évolution ngandak ngélé.” A añ i kaat ini le Y’a-t-il un Créateur qui se soucie de vous ? I kaat i, i bi tihba Ruben ngandak. A bi kal le: ‘É Yéhôva a yé toi!’ I ngéda a bi yuuga hikuu hikeñi, Ruben a bi kônde ti Yéhôva mayéga inyu lihaa li lôk kéé li li édi i nkoñ ’isi wonsôna. I ngéda a bi témb i Jaman, Ruben a bi sôblana a ban-ga 17 nwii. Ibale u mpééna i mam u bi nigil, boñ nyiña i bikaat bi ntôñ inyu boñ le u bana ha bañ pééna mu ñem. “Bañga yi” i nla yémbél pééna. (Éfésô 4:13, 14) I ngéda u nok nwin u nlôl i bahoma bape le lôk kéé i ngwéhna, i niñik ikété adna, u tehge i gwéha i mu likoda joñ, u nkônde ti Yéhôva mayéga inyu lihaa li lôk kéé, li a bi ti bés.

SAULÔ, MUT TARSÔ, A BI SÔBLANA

7. Mambe mahoñol Saulô a bé lama héñha?

⁷ Di wan le hihéga hi Saulô, mut Tarsô. A bé hol ngandak i base i Lôk Yuda, a yik ki mam ma Lôk Yuda ngandak. (Galatia 1:13, 14; Filipi 3:5) I ngéda ngandak Lôk Yuda i bé tehe bikristen kiki batjañgbene maliga, Saulô a bi tééñga bikristen ngandak. A bé hoñol le a mboñ sômbôl i Nyambe. (Minson mi baôma 8:3; 9:1, 2; 26:9-11) Inyu boñ le a neebe Yésu, a sôblana ki inyu yila kristen, i bi béda le yak Saulô a ba bebee i hônba ndééñga.

8. (a) Kii i bi hôla Saulô i sôblana? (b) Inoñnaga ni Minson mi baôma 22:12-16, lelaa Anania a bi hôla Saulô? (Béñge yak titii.)

⁸ Kii i bi hôla Saulô i sôblana? I ngéda Nwet Yésu ikété lipémba jé a bi pémél nye, Saulô a bi kwo ndim. (Minson mi baôma 9:3-9) A bi sôga je dilo daa; ibabé pééna, a bé ôt pék mu mam ma bi pémél nye. Ñ, Saulô a bi kwo nkaa le Yésu a yé Mésia, ni le banigil bé ba yé i base maliga. Kiññem i bi lama kéés Saulô inyule a bi yoñ ngaba i nyemb i Étien! (Minson mi baôma 22:20) I mbus dilo daa di, nnigil wada le Anania a bi kôôge Saulô bebee ni loñgeñem, a mbuubaha nye, a ti ki nye makénd i sôblana ibabé i lep ngéda. (Añ Minson mi baôma 22:12-16.) Ni suhulnyuu, Saulô a bi neebe i mahôla ma, a sôblana.—Minson mi baôma 9:17, 18.

9. Kii ndémbél i Saulô i niiga bés?

⁹ Di nla ôt ngandak biniigana mu ndémbél i Saulô. A bé le a nwas le ngôk tole woñi u bôt u kéñ nye i sôblana. Ndi a bi nwas bé le hala a bôña. Ni suhulnyuu, Saulô a bi héñha niñ yé i ngéda a bi neebe maliga inyu Kristô. (Minson mi baôma 26:14, 19) Saulô a bééna ngôñ i yila kristen to hala kii a bé yi le a ga boma ndééñga. (Minson mi baôma 9:15, 16; 20:22, 23) I mbus sôble yé, Saulô a bi ke ni bisu i bôdôl Yéhôva ñem le a ga hôla nye i hônba mintén mi mandutu nwominsôna. (2 Korintô 4:7-10) I ngéda u ga sôblana, u yila Mbôgi Yéhôva, u ga boma mandutu tole hémle yoñ i ga wéna, ndi u ga kôhna mahôla. U nla ba nkwoog nkaa le ibabé set, Nyambe bo Kristô ba ga nit we.—Filipi 4:13.

10. Lelaa ndémbél i Anna i nla hôla bés?

¹⁰ Anna a bi néñél i mbai yada, i pes likôl i Érôpa. I ngéda nyañ a bi sôblana, isañ a ti nye kunde i nigil Bibel, a ban-ga nwii bôô. Ndi yigil yé i bi boñ le bôt bé ba lihaa bape, ba ba bé yééne i ndap yap ba bôdôl kolba nye. I tjôô base i basôgôlgôl i bé jam li wonyuu inyu bôt ba lihaa li Anna. I ngéda Anna a bééna 12 nwii, a bi bat isañ kunde inyu sôblana. Isañ a bé yéñ yi ibale nyemede nyen a nyoñ i makidik ma, tole mut nyen a nyégsa nye i boñ hala. A bi timbhe nye le: “Me ngwés Yéhôva.” Ha nyen isañ a bi neebe le a sôblana. I mbus ha, Anna a bi boma diyana ni ngolba nya ndi nya. Sôgôl wé a bi kal nye le: “I yé loñge le u yila muda ndéñg, u ôdôk siga iloole u yila Mbôgi Yéhôva.” Lelaa Anna a bi pamba? A nkal le: “Yéhôva a bi ti me ngui, yak mama yem ni pua yem ba bi nit me ngandak.” Anna a mbigda mangéda a bi tehe woo u Yéhôva i niñ yé. A mpôdôl mangéda ma hiki ngéda, inyu boñ le a hôya bañ lelaa Yéhôva a bi nit nye. Ibale u nkon ngolba woñi, bigda le yak we Yéhôva a ga hôla we.—Lôk Héber 13:6.

KORNÉLIÔ A BI SÔBLANA

11. Kii i bé le i kéñ Kornéliô i sôblana?

¹¹ Bibel i mpôdôl ndémbél i Kornéliô. A bé “ñane 100 bisônda,” nu ntôñ gwét u Lôk Rôma. (Minson mi baôma 10:1, buk isi lipep.) Inyu hala nyen, bebek a bééna tel ni kunde ikeñi. A bé ti “ki diyeyeba ngandak makébla.” (Minson mi baôma 10:2) Yéhôva a bi om ñôma Pétrô le a añle nye ñañ nlam. Baa tel i Kornéliô i bi sôña nye i sôblana?

12. Kii i bi hôla Kornéliô i sôblana?

¹² Kii i bi hôla Kornéliô i sôblana? Bitilna bi nkal le: “A bé kon Nyambe woñi, a béghak nye ni lihaa jé jolisôna.” Kornéliô a bé soohe ki Nyambe ngéda yosôna. (Minson mi baôma 10:2) I ngéda Pétrô a bi añle Kornéliô ñañ nlam, nye ni lihaa jé ba bi neebe Kristô, ba sôblana ki ibabé i lep ngéda. (Minson mi baôma 10:47, 48) Kornéliô a bé bebee i boñ mahéñha momasôna ma bé béda inyu gwélél Yéhôva ni lihaa jé.—Yôsua 24:15; Minson mi baôma 10:24, 33.

13. Kii ndémbél i Kornéliô i niiga bés?

¹³ Kiki Saulô, Kornéliô a bé le a nwas le tel yé i kéñ nye i yila kristen. Ndi a bi nwas bé le hala a bôña. Baa i mbéda le u boñ mahéñha makeñi i niñ yoñ inyu boñ le u sôblana? Ibale hala, yi le Yéhôva a ga hôla we. A ga sayap makidik moñ inyu boñ le u gwélél nye inoñnaga ni matiñ ma Bibel.

14. Kii ndémbél i Tsuyoshi i niiga bés?

¹⁴ Tsuyoshi, nu a yé i loñ Yapan, a bé lama lona mahéñha mu bôlô yé inyu boñ le a sôblana. A bé sal ni ñéga suklu i Ikenobo, i het ba niiga i eñg gwom ni mbônji. I ngéda nwet wé bôlô a bé la bé ke i maéya, Tsuyoshi nyen a bé a ke i jôl jé, inyu boñ mam momasôna inoñnaga ni base i Bouda. Ndi i ngéda Tsuyoshi a bi yi maliga inyu nyemb, bilem bi base i Bouda bi bé kéñ nye i sôblana. I mbus, a bi kit le a nyoñ ha bé ngaba mu bilem bi base i. (2 Korintô 6:15, 16) Tsuyoshi a bi kwel ni nwet wé bôlô mu jam li. Ndi mam ma bi sôk lelaa? Tsuyoshi a bi tééda bôlô yé ibabé le a yoñ ki ngaba mu bilem bi. Tsuyoshi a bi sôblana yom kiki bo nwii wada i mbus le a bi bôdôl nigil Bibel.a Ibale i mpam le u lona ngim mahéñha mu bôlô yoñ inyu lémél Nyambe, ba nkwoog nkaa le a ga yoñ ndun ni we lôñni lihaa joñ.—Tjémbi 127:2; Matéô 6:33.

BÔT BA KORINTÔ BA BI SÔBLANA

15. Mambe mandutu bôt ba Korintô ba bi boma, ma ma bé le ma kéñ bo i sôblana?

¹⁵ Bôt ba nlômbi tison u Korintô ba bé yiba kiki bôt le ba ngwés nkus ngandak, ba gwéhék mam mabe. Ngandak bôt i i bé nyoo, niñ yap i bé lémél bé Nyambe. Ibabé pééna, hala a bé bé jam li ntomb inyu nu ni nu a bé neebe ñañ nlam. Ndi i ngéda ñôma Paul a bi bol nyoo i tison i, a añal ñañ nlam inyu Kristô, “ngandak bôt ba Korintô ba ba bi nok, ba bôdôl hémle, ba sôblana ki.” (Minson mi baôma 18:7-11) Ha nyen Nwet le Yésu Kristô a bi pémél Paul ikété yiinda, a kal nye le: “Me gwé ngandak bôt munu tison ini.” Jon Paul a bi ke ni bisu i añal ñañ nlam nyoo nwii wada ni pes.

16. Kii i bi hôla bôt bahogi i Korintô i yémbél mandutu, ma ma bé le ma kéñ bo i sôblana? (2 Korintô 10:4, 5)

¹⁶ Kii i bi hôla bôt ba Korintô i sôblana? (Añ 2 Korintô 10:4, 5.) Bañga i Nyambe ni mbuu mpubi wé gwon bi bi hôla bo i lona mahéñha ma ngui i niñ yap. (Lôk Héber 4:12) Bôt ba Korintô ba ba bi neebe ñañ nlam inyu Kristô ba bi pam i tjôô maboñok kiki bo lihiua, wip ni lem i lalna baso bôlôm ni baso bôda.—1 Korintô 6:9-11.b

17. Kii ndémbél i bôt ba Korintô i niiga bés?

¹⁷ Yimbe le to hala kiki bôt bahogi i Korintô ba bééna bilem bibe ba bé lama yémbél, ba bi kal bé le i nlôôha ba ndutu inyu yap le ba yila bikristen. Ba bi boñ biliya bi ngui inyu kil mu nwemel ntitigi, u u nkena i niñ boga. (Matéô 7:13, 14) Baa i yé we ndutu i yémbél lem ibe tole liboñok libe inyu boñ le u sôblana? U tomb bañ! Soohe Yéhôva le a ti we mbuu mpubi wé inyu yémbél i lem ibe i.

18. Kii ndémbél i Monika i niiga bés?

¹⁸ Monika, nu a nyééne i loñ Géorgia, a bi jo sañ i ngui inyu tjôô bibuk bibe ni mintuk mimbe inyu boñ le a sôblana. A nkal le: “I ngéda me bé mañge wanda, masoohe mon ma bé ti me ngui. Yéhôva a bé yi le ngôñ yem i yé le me boñ loñge, jon a bé hôla me, a égga me.” Monika a bi sôblana ni 16 nwii. Baa u nlama tjôô ngim maboñok inyu gwélél Yéhôva i nya i nlémél nye? Kee ni bisu i bat nye ngui i boñ mahéñha. Yéhôva a nima bé mbuu mpubi wé.—Yôhanes 3:34.

HÉMLE YOÑ I NLA NYIÑGIS DIKÔA

19. Kii i nla hôla we i yémbél mandutu ma ma yé kiki dikôa? (Béñge yak titii.)

¹⁹ Yi le Yéhôva a ngwés we, a gwé ki ngôñ le u jôp ikété lihaa jé. To mambe mandutu u mboma inyu sôble, Yéhôva a yé ha. Yésu a bi kal banigil bé ba hiai bisu le: “Ibale hémle nan i yé ikeñi kiki hisiina hi mbôô, ki n’a kal hikôa hini le: ‘Nyodi hana, kee nyoo,’ hi boñ ki hala; to jam jo ki jo l’a loo bé bé ngui.” (Matéô 17:20) I bet ba bi emble i bibuk bi Yésu bini, ba bé ba ma tégbaha ndik ndék nwii ni nye, jon ba bé ngi bana hémle i ngui. Ndi Yésu a bi kal bo le ibale ba nhôlôs hémle yap, Yéhôva a ga hôla bo i yémbél mandutu map, to ma yé kiki dikôa. Hala nyen Yéhôva a ga hôla yak we!

20. Lelaa ndémbél i bikristen bi hiai bisu ni bi len ba mpôdôl munu yigil ini i nti we makénd?

²⁰ Ibale u nyimbe i mam ma nkéñ we i sôblana, yoñ bitelbene i yémbél mo ibabé i lep ngéda. U nla kôhna hogbe ni ngui mu ndémbél i bikristen bi hiai bisu ni bi len. Ndémbél yap i ga ti we makénd, i tinde ki we i ti wemede nkikip yak Yéhôva ni i sôblana. Hala a yé makidik malam u maa bé yoñ!