“Ba Bi Yoñ Bé Yihe”

TJÉL emble mabéhna li nla lona kuu keñi.

I Darwin, tison i Australia, bôt ba bé  kôôba mangand ma noi, i nwii 1974, ngéda minsébla mi bi béhe le soso mbugmbebi a yé lo. Ndi ntén mbug mbebi u, u bé u ma sôga i Darwin jam kikii bo 30 ma nwii. Inyuki hanano ni? Ngandak bôt i tison, i bi yoñ bé jam li kikii jam li niñ letee ni le mbug a bi bôdôl hôñ a hééga bo bibende, a bôgôk mabap ma mandap i homa bôt ba bé ba kôdi. Kekela i bé noñ ha, tison i bé hôlô.

I Colombia, i sôñ jôm ni yada, i nwii 1985, hikôa hiada hi bi lôs. Mabu ma neige mpôdnaga ni matanga ma bi ti liboo li li bi jô iloo 20 000 ma bôt i nkoñ u Armero. Ba, ba bôg bé béhe bo? Hikôa hi bi nyeñg ngandak sôñ. Ndi kikii ba bi meya ba niñ i pañ hikôa hi, hala a bi kal bé bôt ba to jam. Baane ba bi kôhna biyihne le kuu i bémi, ndi ba bi boñ bé bañga jam inyu béhe bôt. Minlegla mi nkuu mahop mi bé noode hôyôs miñem mi bôt. Nkuu mahop i ndap mitin u bi gwélana inyu mômôs bôt ñwee. Mu wo u nlélém u won, hikôa hi bi lôs ngélé ibaa. Ba u bé le u yôi nkus woñ inyu ke ngwéé? Ndég bôt ndig yon i bi joba ilole i nene le ngéda i mal tagbe.

Jôga li ngéda, bôt ba nigil disi ba ta ba yoba bé ngéda ba mbôk kal i homa hisi hi ga nyeng. Ndi ba nla bé kal ntiik mbe hilo hala a ga bôña. I nwii 1999, nyeng disi i bi nol bebe le 20 000 ma bôt i nkoñ isi. Ngandak i i bi wo, ba bé hoñol bé le hala a yé le a pémél bo kekikel.

Lelaa u nyoñ mabéhna ma ma nlôl yag Djob nyemede?

Bibel i bi bôk i pôdôl mam ma ga éba bés le di niñil i dilo di nsôk. Mu kikii i mpôdôl mam ma, i mbéhe bés le di hoñol “dilo di Nôa.” “I dilo ti, ntida malép ngi lo,” bôt ba bé ba pégi ni mam ba bi meya ba mboñ hiki kel, to hala kikii ba bé lama kon woñi inyu béba i i bé tôl ha yo ngéda. Ndi mabéhna Djob a bé ti bo ni njel Nôa, “ba bi yoñ bé yihe letee ntida malép u lo, u sas ki bobasô.” (Matéô 24:37-39) Ba u bé le u emble mabéhna ma? U ñemble hanano?

Ba ibale u bé niñil i Sôdôm, i pañ Lom Nwoga i ngéda Lôt, man manyañ Abraham, ki u bi boñ laa? Nkoñ u u bé pôôna paradis. U bé ngwañgwañ nkoñ. Bôt ba loñ ba bé tjelel bé. I dilo di Lôt, “ba bé je, ba nyog, ba sombog, ba nuñlag, ba beleg, ba oñog.” Nkoñ ba bé niñil u bé ki nyonog ni biyôgda. Ba u bé le u emble Lôt ngéda a bé yelel maboñog mabe? Ba u bé le u emble ngéda a bé kal le Djob a nkit le a ntjé nkoñ u Sôdôm? Tole ki u bi yoñ hala kikii njôha, nlélém kikii bakil bé ba bi boñ? Tole u bé le u bôdôl ke ngwé, ndi u témb u nun mbus kikii ñwaa Lôt a bi boñ? Tola kikii bôt bape ba bi emble bé mabéhna, yokel Lôt a nyodi eei Sôdôm, “nob hié ni solfa a lôl i ngii, a tjé bobasôna.”—Lukas 17:28, 29.

Ngandak bôt i dilo tjés i nyoñ bé yihe. Ndi i ndémbél ini i bi téédana ikété Bañga i Djob inyu béhe bés, ni ti bés makénd le di YÉN PÉÉ!

[Nkéñég matila/Titii i si lipep 22]

Ba ntida malép ni nkoñ isi woñsô u bé ni toi?

Ngandak i bawan miñañ ba nkal le To. Ndi bibel i nkal le Ñ.

Yésu Kristô nyemede a pot inyu ntida malép, ni le a bé niñ ha i ngéda u bé tagbe, a bag i ngii.

[Nkéñég matila/Titii i si lipep 23]

Ba Sôdôm ni Gômôra ba bi tjiba ni toi?

Bahun disi ba mbok mbôgi le hala a bi bôña.

Miñañ mi bôt ba kôba mi mpôdôl inyu tjiba i.

Yésu Kristô a bi wan ñañ u, u yé ki ntilga ikété 14 bikaat bi Bibel.