Ba Bi Yoñ Yihe, Jon Ba Bi Pei

YÉSU KRISTÔ a bôg ti mabéhna inyu mamélél ma hiai hi mam hi Lôk Yuda, hi hi bé hi umne i ngi témpel i Yérusalém. A yelel bé ngéda i. Ndi a bi toñol ngim mam i i bé lama bôña letee ni ngéda tjiba. A bi béhe banigil bé le ba yén péé ni ki le ba nyodi i homa mbe.

Yésu a bôg kal le: “Ngéda ni ntehe Yérusalem nkéñég ni mintôñ mi gwét, yina le tjiba yé i gwé ni moo.” A kal ki le: “Ngéda ni ntehe yom i nsuñgaha ñem i i lona tjiba . . . i té homa mpubhaga, . . . ha nyen, bet ba yé i Yudéa ba kenek ngwé i dikôa.” Yésu a béhe banigil bé le ba témb bañ ni mbus inyu sôñ nkus wap. Ba bé lama pala ke ngwé inyu boñ le ba pei.—Lukas 21:20, 21; Matéô 24:15, 16.

Inyu mélés ngolba i Lôk Yuda i i bi nom ntandaa ngéda, Cestius Gallus a bi éga mintôñ mi gwét mi Rôma i kolba Yérusalem i ñwii 66 i mbus Yésu. A bi jôb yag ikété nkoñ ndi a teg liyééne i témpel. Liyôgbe li yon ni nkoñ. Bôt ba bi yén péé ba bi la tehe le njiiha i nkôôge bebe. Ndi ba ngéda i kil ngwé i bé ki? Jam li hélha, Cestius Gallus a bi timbis mintôñ nwé ni mbus. Lôk Yuda i i bé nyagbene bo, i odop bo mbus. Ngéda i bi kola hanano le banigil ba ke Yérusalem ni Yudéa ngwé!

Nwii u bé noñ ha, mintôñ mi gwét mi Rôma mi bi témb i si ane i Vespasian bo man wé Titus. Loñ yosô i bé ikété gwét. I bibôdle bi nwii 70 i mbus Yésu, Lôk Rôma i bi kéñ Yérusalem ni lipénd li mimpomog mi bikék. Likil li ngwé li bé ha bé. (Lukas 19:43, 44) Bajo gwét ba ba bé ikété nkoñ ba bôdôl nolna bo ni bo. Bet ba bi yégle, Lôk Rôma i bi nol bo tole i kena bo minkôm. Nkoñ ni témpel yé bi bi tjiba gwobisô. Kikii kal i Yôsep, man Lôk Yuda, ñañal miñañ nu hiai hi bisu, Lôk Yuda i i bi nog ndutu ni i i bi wo ba bé loo hidun hiada. Témpel i, i maa ôña ha bé.

Ibale bikristen bi bé ki bi yii i Yérusalem i nwii 70 i mbus Yésu, ki bi bi nôla tole bi yila minkol lôñ yada ni bôt bape. Ndi baañal ba kôba ba nkal le bikristen bi bi nôgôl mabéhna ma Djob, bi ke Yérusalém ni Yudéa yosô ngwé inyu solob i dikôa di yéne i likôl li Lép Yordan. Bape ba bi yééne i Pella, tison i loñ ba nsébél le Péréa. Ba bi yôi Yudéa, ba témb ha bé to ki nyoo. Ba bi nôgôl mabéhna ma Yésu, jon ba bi pei.

Ibale mabéhna ma nlôl ni bôt ba mpot maliga ba u ndiihe mo?

Inyule jôga li mabéhna bôt ba nok ma nyon bé, ngandak yap i nyoñ mo kii yanga jam. Ndi liemble mabéhna li nla tohol we.

I loñ i Chine, i ñwii 1975, mabéhna ma bi tiba le hisi hi ga nyeñg. Baane ba yoñ bitelbene. Bôt ba loñ ba nôgôl bo. Jon dikôô di bôt di bi pei.

I sôñ i na i nwii 1991 i loñ i Philippine, bôt ba bé yéne i Hikôa hi Pinatubo ba bi kal le hida ni mabu ma bé pémél mu hikôa. Kikii banigil mam ma hisi ni nyeñg disi ba loñ ba bi wan jam lini ngim sôñ i ba ni bikei gwap, ba béhe le béba i yé bebe. Ngwé ni ngwé, ba héya dikôô di bôt ha homa nu. Tutu i hilo 15 i sôñ samal, hikôa hi bi lôs ni mbimba keñi, hi lo mabu mbôda ni hié iloo yom kii bo 37 000 000 000 ma pôndi. Mabu ma momasôna ma kôba mbok yosô. Liyoñ yihe li bi tohol dikôô di biniñ.

Bibel i mbéhe inyu lisuk li hiai hi mam hini. Di niñil i masuk ma ngéda hanano. Kikii lisuk li bémi, ba u nyén péé? Ba u njoba le u ba haa ni homa mbe? Ba u mpagda i béhe bôt bape le ba boñ nlélém?

[Titii i lipep 20]

Liyôñôl mabéhna yihe li bi tohol biniñ bi ngandak bôt ngéda Hikôa hi Pinatubo hi bi lo mabu ma hié

[Titii i lipep 21]

Bikristen bi bi ñemble mabéhna ma Yésu ba bi pei ngéda Yérusalem a bi tjiba i nwii 70