Galatia

3 Éé, a bijôñ bi bôt bi Galatia! Njee a bi lugha bé* hala, ki le ba bi tibil yaga toñle bé lelaa Yésu Kristô a bi tômlana i kék? 2 Me nyéñ ndik bat* bé jam jada: Baa ni bi kôhna mbuu mpubi ni njel minson mi mbén tole inyu hémle ni nhémle i mam ni bi nok? 3 Baa ni nai toi ni bijôñ? Ni bi bôdôl ngwéé i pes mbuu,* baa ni yé i mélés wo nano i pes minsôn?* 4 Baa ni bi nok ndutu ngandak hala yañga? Ibale hala a bé toi yañga. 5 Jon nu a nti bé mbuu mpubi, a boñok mimpémba mi mam ipôla nan, baa a mboñ hala inyu minson minan mi mbén tole inyu hémle ni nhémle mam ni bi nok? 6 Hala a yé ndik kiki Abraham a bi “hémle Yéhôva*, hala a éña nye le a téé sép.”

7 Ni nyi yaga le i bôt ba ntéñbe ni hémle bon ba yé bon ba Abraham. 8 Ndi kiki Nyambe a bé yi i bisu bi ngéda le a’ kal bôt ba matén le ba téé sép ni njel hémle, jon a bi añle Abraham ñañ nlam i bisu bi ngéda ni njel tilna i i nkal le: “Ni njel yoñ nyen biloñ gwobisôna gw’a ba nsaibak.” 9 Jon i bôt bobasôna ba ntéñbe ni hémle ba yé nsaibak lôñ yada ni Abraham nu a bééna hémle.

10 Ba bobasôna ba mbôdôl minson mi mbén ñem ba yé isi ndiihe, inyule i yé ntilga le: “Nu ni nu a ntéñbe bé ni mam momasôna ma yé ntilga ikété nhôdôk kaat u mbén Môsi, le ndi a boñok mo, a yé ntiihege.” 11 Handugi hala, i yé ntiik le Nyambe a nkal bé le mut nye ki nye a téé sép ni njel mbén, inyule “mut telepsép a’ niñil inyu hémle.” 12 Ndi mbén Môsi i niñne bé i ngii hémle. Ndi i nkal ndik le: “Nu a mboñ i mam mana a’ niñ ni njel yap.” 13 Kristô a bi somb bés, a begee ndiihe inyu yés le ndi a kobol bés isi ndiihe i mbén Môsi, inyule i yé ntilga le: “I mut ni mut a péni i kék a yé ntiihege.” 14 Hala a bi bôña le ndi biloñ bipe bi kôhna bisai bi Abraham ni njel Kristô Yésu, kayéle ni njel hémle yés di la kôhna mbuu mpubi Nyambe a bi bôn.

15 A lôk kéé, me nyoñ hihéga bôt ba binam ba nla nok: Ibale mut a mal boñ ngim malômbla, to hala kiki a yé ndik mut binam, mut nye ki nye a nsagal ha bé mo, to kônde mam mape mukété. 16 Ndi mimbônga mi bé inyu Abraham ni mbôda yé.* Tilna i nkal bé le: “Inyu bon boñ,”* wengoñle ba yé ngandak. Ndi i nkal le: “Inyu mbôda yoñ,”* hala wee i yé yada, yon i yé Kristô. 17 Me nkal ki le: To hala kiki mbén Môsi i bi lo mbôgôl nwii ina ni môm maa* i mbus ngéda, i bi sagal bé malômbla Nyambe a bi bôk a boñ, kayéle i mélés mbônga. 18 Inyule ibale bum i niñne i ngii mbén, wee i niñne ha bé i ngii mbônga; ndi ni njel mbônga nyen Nyambe a bi ti Abraham bum ni loñgeñem.

19 Mbén Môsi i bi tiba ni inyuki? I bi kôndba inyu yelel bibéba letee mbôda* i lo, nyen a bi kôhna mbônga, biañgel gwon bi bi lôôs wo ni njel moo ma ñat malômbla. 20 Ndi ñat malômbla a ta bé nseñ ngéda mut a yé ndik wada i yoñ ngaba i malômbla, ndi Nyambe a yé ndik wada. 21 Baa hala a nkobla ni le mbén Môsi i nkolba mimbônga mi Nyambe? To jam! Inyule ibale ngim mbén i tina le i nla ti bôt niñ, ki bôt ba bi bana yaga telepsép ni njel mbén. 22 Ndi Bitilna bi bi ha bôt bobasôna isi mok mi béba, le ndi i bôt ba ñunda le ba gwé hémle ba kôhna mbônga u u nlôl ni njel hémle ba nhémle Yésu Kristô.

23 Ndi ilole hémle i nlo, mbén yon i bé tééda bés, di bak i mok, di bemek hémle i i bé bebee ni soolana. 24 Jon mbén Môsi i bi yila ntééda* wés nu a nkena bés yak Kristô, le ndi i kéla le di téé sép ni njel hémle. 25 Ndi nano nu hémle i nlo, di ta ha bé isi ntééda.*

26 Bébobasôna ni yé yaga bon ba Nyambe ni njel hémle ni nhémle Kristô Yésu. 27 Inyule bébobasôna ba ni bi kôhna nlélém sôble kiki Kristô, ni bi yila kiki Kristô.* 28 Man Lôk Yuda to man Grikia a ta bé, nkol to mut nu a ta bé nkol a ta bé, munlôm to muda a ta bé, inyule bébobasôna ni yé wada ikété adna ni Kristô Yésu. 29 Ndi ibale ni yé ba Kristô, wee ni yé yaga mbôda* Abraham, ni bak bakôdôlbum inoñnaga ni mbônga.