Galatia

2 I mbus jôm li nwii ni mina, me bi témb me bet i Yérusalem lôñni Barnabas, me ke ki lôñni Titô. 2 Me bi ke inyule me bi kôhna ngim masoola le me bet nyoo, me toñle ki bo i ñañ nlam me yé i añal ikété biloñ bipe. Ndi me bi boñ bé hala i mbamba, ndik i bisu bi bôt likoda li nlôôha ti lipém, inyu boñ le me ba nkwoog nkaa le me tumbbaga bé ni nson, tole me bi tumbba bé to ni nson yañga. 3 Ndi to Titô nu a bé lôñni me, a bi ba bé nyégsaga i kweeba, to hala kiki a yé man Grikia. 4 Ndi hala a bi lona mindañ inyule lôk kéé i bitembee i bi sooma ipôla yés inyu hes kunde di yé maséé i bana ikété adna ni Kristô Yésu, le ndi ba yilha yaga bés minkol; 5 di bi nôgôl bé bo to ndék, to inyu ndék ngéda* yaga, inyu boñ le maliga ma ñañ nlam ma ke ni bisu i ba ikété nan.

6 Ndi inyu bôt ba nene kiki bañga bôt (to ibale ba bé mimbe mintén mi bôt kôba, hala a nkal bé me to jam, inyule Nyambe a nkéés bé mut i bitéé bi mis), i bôt likoda li nlôôha ti lipém ba bi lona bé me jam li mondo. 7 Ndi ngéda ba bi tehe le men me bi kôhna bisai i añle bôt ba ta bé nkweebaga ñañ nlam, nlélém kiki Pétrô a bi kôhna bisai inyu bôt ba yé nkweebaga 8 (inyule nu a bi ti Pétrô ngui le a gwel nson ñôma inyu bôt ba yé nkweebaga, nyen a bi ti yak me ngui inyu bôt ba biloñ bipe) 9 ndi ngéda ba bi yimbe le konangoo i mbuma ñañ i bi tina me, Yakôbô, Kéfa* ni Yôhanes ba ba nene kiki mbiñ bôt ikété likoda, ba bi ti Barnabas lôñni me woo walôm inyu unda le ba nit bés,* kayéle bés di bé lama ke i biloñ bipe, ndi bo ba bé lama ke yak bôt ba yé nkweebaga. 10 Ba kal ndik bés le di hoñlak diyeyeba, me bi ligip ki i boñ hala.

11 Ndi ngéda Kéfa* a bi lo i Antiôkia, me bi kolba* nye i mbombom inyule i bé ntiik le i jam a bi boñ li bé libe.* 12 Inyule ilole bôt bahogi ba ba bi lôl yak Yakôbô ba nlo, a bééna lem i je ni bôt ba biloñ bipe; ndi ngéda ba bi lo, a bi boñ ha bé hala, a bagla, inyule a bé kon bôt ba yé nkweebaga woñi. 13 Yak ini Lôk Yuda ipe i noñ nye mu bihéñba* gwé, kayéle yak Barnabas a noñ bo mu bihéñba* gwap. 14 Ndi ngéda me bi tehe le ba bé ke bé inoñnaga ni maliga ma ñañ nlam, me kal Kéfa* i bisu bi bôt bobasôna le: “Ibale we nu u yé man Lôk Yuda, u niñ kiki bôt ba biloñ bipe, ha kiki bon ba Lôk Yuda bé, lelaa u nla nyégsa bôt ba biloñ bipe le ba niñ inoñnaga ni bilem bi Lôk Yuda?”

15 Bés ba di bi gwéé bon ba Lôk Yuda, di ta bé baboñbéba ba ba nlôl i biloñ bipe, 16 di nyi le mut a nkéla bé le a téé sép ni njel minson mi mbén, ndi ndigi ni njel hémle a nhémle Yésu Kristô. Jon di bi hémle Kristô Yésu, le ndi di kéla le di téé sép ni njel hémle di nhémle Kristô, ha ni njel minson mi mbén bé; inyule mut* to wada a’ kéla bé le a téé sép ni njel minson mi mbén. 17 Nano ibale di nyéñ le i kéla le di téé sép ni njel Kristô, ndi di nen-ge kiki baboñbéba, baa hala a nkobla le Kristô a yé ngwélél nu béba? To jam! 18 Ibale i mam yaga me bi tjé kôba mon me ntiimba oñ, wee me ñunda le me yé mboñbéba. 19 Inyule ni njel mbén, me bi wo inyu mbén, le ndi me témb i niñ inyu Nyambe. 20 Me yé ntômlak i kék lôñni Kristô. Me ha bé nyen me niñ, ndi Kristô nyen a yé i niñ ikété adna lôñni me. Ni maliga, i niñ me niñ nano ikété minsôn, me niñ yo ni njel hémle me nhémle Man Nyambe nu a bi gwés me, a sem ki nyemede inyu yem. 21 Me ntjél bé* me konangoo i mbuma ñañ i Nyambe, inyule ibale telepsép i yé ni njel mbén, wee Kristô a bi wo toi yañga.