Lukas

2 Mu dilo di nyen Kaisa Agustô a bi ti oda le bôt ba nkoñ ’isi bobasôna ba tila môl i kaat ngomin. 2 (Unu ñañga bôt u bisu u bi bôña ngéda Kiréniô a bé ngomin keñi i Siria.) 3 Bôt bobasôna ba bi ke i tila môl i kaat ngomin, hiki mut i tison i ligwééne jé. 4 Yak Yôsep a nyodi i Galiléa, i tison Nasaret, a bet i Yudéa, i tison i David ba nsébél le Bétléhém, inyule a bé mut ndap lihaa i David. 5 A ke i tila jôl i kaat ngomin, nye ni Maria nu a bi yila nwaa wé kiki ba bi yegna, a bak ki bebee ni gwal. 6 Kiki ba bé nyoo, ngéda i kola le a gwal. 7 A gwal man munlôm, man wé nu bisu, a lép nye mabadô, a niñi nye i jéhne bilém, inyule ba bi kôhna bé liyééne i ndap bakén.

8 Yak batééda bémba ba bé mu nlélém nkoñ, ba yénék juu i mbégdé inyu tat bibémba gwap. 9 Kunda yada, añgel Yéhôva* i telep i bisu gwap, yak lipém li Yéhôva* li béyéi bo bipes gwobisôna, ba kon ki woñi ngandak. 10 Ha nyen añgel i kal bo le: “Ni kon bañ woñi, nuna-ki, me yé i añle bé ñañ nlam u ngandak maséé bôt bobasôna b’a kôhna. 11 Inyule i len ini, ntohol a ngwéé inyu nan i tison i David, nyen a yé Kristô, Nwet. 12 Yimbne inyu nan ini le: N’a koba nkéñéé man u niñi i jéhne bilém, nlébék ni mabadô.”* 13 Kunda yada, limut li biañgel bi ntôñ u ngii li ba ni añgel i, li kahal bégés Nyambe, li kalak le: 14 “Lipém li ba ni Nyambe nyoo ngingii; hana ’isi, nsañ u ba ni bôt ba nlémél nye.”

15 Jon ngéda biañgel bi bi yék bo, bi témb i ngii, batééda bémba ba bôdôl kalna bo ni bo le: “Bôga bés, di kenek i Bétléhém, di tehe jam li ntagbe nyoo, li Yéhôva* a mboñ le di yi.” 16 Ha nyen ba pala ke, ba koba Maria bo Yôsep, ni nkéñéé man u niñi i jéhne bilém. 17 I ngéda ba bi tehe hala, ba bôdôl añal nwin ba bi nok inyu nkéñéé man. 18 I bôt bobasôna ba bi nok jam li, ba hel inyu mam batééda bémba ba bi kal bo, 19 ndi Maria a bôdôl tééda bipôdôl bi gwobisôna, a hegek pék mu ñem wé inyu tibil nok kii bi nkobla. 20 I mbus, batééda bémba ba témb, ba tinak Nyambe lipém, ba béghak ki nye inyu mam momasôna ba bi nok ni tehe, ndik kiki i bi kéla bo.

21 I hilo hi nyônôs juem, kiki ngéda i nkola le ba kwee nye, ba o nye jôl le Yésu, jôl añgel i bi ti ilole Maria a nembee.

22 Kiki ngéda i nkola le ba ti sesema inyu pubus bomede inoñnaga ni mbén Môsi, ba kena nye i Yérusalem inyu unda nye Yéhôva,* 23 ndik kiki i yé ntilga ikété Mbén i Yéhôva* le: “Hiki man munlôm nu bisu* a nlama séblana le numpubhaga inyu Yéhôva.”* 24 Ha nyen ba bi ti sesema inoñnaga ni i jam Mbén Yéhôva* i nkal, le: “Minhôôlak mi dibeñ ima tole bon ba dibeñ iba.”

25 Ndi nuna-ki, mut wada a bé i Yérusalem, jôl jé le Siméôn, a bé mut telepsép, a konok Nyambe woñi, a bemek ki hogbe i Israel, yak mbuu mpubi u bé i ngii yé. 26 Nyambe a bi yeelene ki nye ni njel mbuu mpubi le a’ wo bé nye ngi tehe Kristô nu Yéhôva.* 27 Lôñni ngui i mbuu, a bi lo i témpel; kiki bagwal ba bi jôbna nkéñéé man le Yésu inyu boñ nye kiki mbén Môsi i mbat, 28 a yoñ man i moo mé, a bégés Nyambe, a kal le: 29 “Nano, a Nwet Bayemlikok, nwahak le nkol woñ u ke ni nsañ inoñnaga ni lipôdôl joñ, 30 inyule mis mem ma mal tehe nu a yé njel tohi, 31 nyen u bi kôôba inyu boñ le matén momasôna ma tehe nye, 32 nyen a yé mapubi inyu héya jiibe i mis ma biloñ, a yé ki lipém li litén joñ Israel.” 33 I mam ma bé pôda inyu yé ma bé kônde hélés isañ bo nyañ. 34 Siméôn a sayap ki bo, a kal Maria, nyañ man le: “Nun-ki, i man nunu a bi tééba inyu boñ le ngandak bôt i Israel i kwo, i telep ki, ni inyu ba yom i diyana 35 (ñ, mbôñgô pansoñ w’a kan we ñem*), inyu yelel bipék bi miñem mi ngandak bôt.”

36 Ndi mpôdôl nu muda wada le Ana a bé ha, ngond Fanuel nu litén li Aser. A bé mañ muda, ndi a bi niñ lôñni nlôm nwii minsaambok i mbus libii jap.* 37 Nano, a bé yik muda, a ban-ga môm juem ma nwii ni mina. A bé hañ bé i témpel, a béghak Nyambe juu ni njamuha ni njel sôga je ni minyemhe. 38 I nlélém ngeñ, a kôôge bebee, a bôdôl ti Nyambe mayéga, a pôdhak bôt bobasôna ba ba bé bem kobla i Yérusalem inyu mañge nu.

39 I ngéda ba bi mal boñ mam momasôna inoñnaga ni Mbén Yéhôva,* ba témb i Galiléa, i tison yap le Nasaret. 40 Mañge a bé kônde nañ, a kôhôk ngui, a bak ki nyonok ni pék, a kôndge ki lémél Nyambe.

41 Ndi bagwal bé ba bééna lem i ke hiki nwii i Yérusalem inyu ngand Pasa. 42 I ngéda a bi bana jôm li nwii ni ima, ba bet kiki lem inyu ngand. 43 I ngéda ngand i bi mal, ba bôdôl témb, ndi mañge le Yésu a yégle i mbus, i Yérusalem, ndi bagwal bé ba yi bé hala. 44 Kiki ba bé hoñol le a yé ikété ntôñ bôt u u bé kiha ni bo, ba ke liké li ngim kel; i mbus, ba bôdôl yéñ nye ikété bôt ba lihaa ni bilôñ gwap. 45 Ndi kiki ba ntehe bé nye, ba témb i Yérusalem, ba yéñ nye homa nyensôna. 46 I mbus dilo daa, ba koba nye i témpel, a yii i ñemkété balét, a emblege bo, a badak bo mambadga. 47 Ndi i bôt bobasôna ba bé emble nye ba bé nhelek kiyaga inyu nogna yé lôñni mandimbhe mé. 48 Ndi ngéda bagwal bé ba bi tehe nye, ba bé nhelek; ha nyen nyañ a bi kal nye le: “A man, inyuki u mboñ bés hala? Me ni isoñ di yéñék we ni nduña i ñem.” 49 Ha nyen a timbhe bo le: “Inyuki ni yéñék me? Baa ni nyi bé le me nlama ba i ndap Tata?” 50 Ndi ba bi nok bé yom a bé kal bo.

51 I mbus, a sôs ni bo, ba témb i Nasaret, a ke ni bisu i suhus* nyemede isi yap. Yak nyañ a tibil tééda bibañga bini gwobisôna ikété ñem wé. 52 Yésu a bé nañ, yak pék yé i bé hôlôl, a kôndge lémél Nyambe ni bôt ba binam.