Lukas

19 I mbus, a jôp i Yérikô, a kahal tagbe mu. 2 Ndi mut wada a bé mu, jôl jé li bé le Sakiô; a bé wada ikété baéga bakottas, a bak ki ngwañ mut. 3 A bé noode tehe njee Yésu a yé, ndi a bé la bé inyule limut li bé ngandak, nyemede a bak kidik mut. 4 Jon a bi ôt ngwéé, a bôk i bisu, a bet i e sikômôr* inyu tehe nye inyule a bé lama tagbe mu njel i. 5 I ngéda Yésu a bi pam ha homa nu, a pa mis, a kal nye le: “A Sakiô, pala sôs inyule i len ini, m’a ba nkén woñ.” 6 Ha nyen a bi pala sôs, a leege nye loñge. 7 Kiki ba ntehe hala, bobasôna ba bôdôl huñbe le: “A neebe le mut nu a yé mboñbéba a leege nye i ndap yé.” 8 Ndi Sakiô a telep, a kal Nwet le: “A Nwet, nun-ki, m’a kap nkus wem i ñem, me ti diyeyeba pes yada; yak hiki yom me bi kadal mut ni malôga,* m’a timbhe nye yo ngélé ina.” 9 Ha nyen Yésu a bi kal nye le: “I len ini, tohi i njôp munu i ndap ini, inyule yak nye a yé man Abraham. 10 Inyule Man mut a bi lo inyu yéñ ni tohol ba ba bi nimil.”

11 Kiki ba bé emble i mam mana, a yôñôl bo hihéga hipe inyule a bé bebee ni Yérusalem, ni le ba bé hoñol le Ane Nyambe i bé lama lo kunda yada ha ngéda i. 12 Jon a bi kal le: “Bañga mut yada i bé bebee ni ke liké i loñ i i yé haa le a yila kiñe ndi a témb. 13 Kiki a nsébél jôm li minkol nwé a ti nwo jôm li mina,* a kal nwo le: ‘Boña nyuñga ni nwo letee me lo.’ 14 Ndi bôt ba loñ yé ba bé oo nye, ba ep bakenwin i mbus yé inyu kal le: ‘Di ngwés bé le i mut nunu a yila kiñe i ngii yés.’

15 “Sôk i nsôk, i ngéda a bi témb, a ma mal yila kiñe,* a sébél minkol a bi ti moni* inyu yi umbe nseñ ba bi kôhna mu nyuñga yap. 16 Ha nyen nu bisu a bi lo, a kal le: ‘A Nwet, mina woñ u nti jôm li mina.’ 17 A kal nye le: ‘Bôlô ilam, a loñge nkol! Kiki u ñunda le u yé maliga ikété hisiina jam, w’a ane jôm li bitison.’ 18 I mbus, nkol u nyônôs ima u lo, u kal le: ‘A Nwet, mina woñ u nti mina mintan.’ 19 A kal ki wo le: ‘Yak we me ntéé we i ngii bitison bitan.’ 20 Ndi umpe u lo, u kal le: ‘A Nwet, mina woñ unu, me bi sôô wo ikété libadô. 21 U nyi to? Ngo me bi kon we woñi inyule u yé mut nledek ñem, u mbada yom u mbii bé, u bumblak i homa u nwes bé mbôô.’ 22 A kal nye le: ‘A we béba nkol ini, me ngwélél bibañga gwoñ inyu kéés we. Baa wee u yik le me yé mut nledek ñem nu a mbada yom a mbii bé, a bumblak i homa a nwes bé mbôô? 23 Ndi inyuki ni u mbii bé moni nwem* i ndap ba ntéédana moni?* Inyu boñ le ngéda me nlo, me yoñ nwo ni yéñe.’

24 “Ha nyen a bi kal i bôt ba bé ba téé ha le: ‘Yoña nye mina wé, ni ti wo nu a gwé jôm li mina.’ 25 Ndi ba kal nye le: ‘A Nwet, ngo a gwé jôm li mina!’ 26 A timbhe le: ‘Me nkal bé le, nu a gwé, b’a kônde ki nye; ndi nu a gwé bé, yak ndék a gwé, b’a yoñ nye yo. 27 Jam lipe ki, baoo bem ba ba bé gwés bé le me yila kiñe, ni lona me bo hana, ni nol ki bo i bisu gwem.’”

28 I ngéda a bi mal pot i mam mana, a kônde ke ni bisu, a yoñ njel i mbet i Yérusalem. 29 Kiki a mpam bebee ni Bétfagé lôñni Bétania, nyoo hikôa ba nsébél le Hikôa Ôlivé, a ep banigil iba, 30 A kal le: “Kena i mbai ni ntehe nyoo bisu; i ngéda ni njôp mu, n’a koba le ba ntéñ man jakas, mut nye ki nye a yé ngi yén nye i ngii. Ni tiñil nye, ni lona nye hana. 31 Ndi ibale mut a mbat bé le: ‘Inyuki ni yé i tiñil man jakas?’ Ni nlama kal le: ‘Nwet a gwé ngôñ ni nye.’” 32 Ha nyen i bôt a bi ep ba bi ke, ba koba le mam ma yé yaga kiki a bi kal bo. 33 Ndi ngéda ba bé tiñil man jakas, i bôt ba bééna nye ba bat bo le: “Inyuki ni yé i tiñil man jakas?” 34 Ba kal le: “Nwet a gwé ngôñ ni nye.” 35 Ha nyen ba bi kena nye yak Yésu; i mbus, ba leñ mambot map i ngii man jakas, ba boñ le Yésu a yén mu ngii.

36 Kiki a bé ke, bôt ba bé tek mambot map i njel. 37 Kiki a mpam ndik bebee ni njel i nsôs i Hikôa Ôlivé, limut li banigil jolisôna li bôdôl kon maséé, li béghak Nyambe ni kiñ keñi inyu mimpémba mi mam nwominsôna ba bi tehe, 38 ba kalak le: “Bisai ni nu a nlo kiki kiñe i jôl li Yéhôva!* Nsañ nyoo i ngii, ni lipém nyoo i ngingii!” 39 Ndi Farisai ihogi ikété limut i kal nye le: “A Lét, nyéyéi banigil boñ.” 40 Ndi a timbhe, a kal le: “To ibale bana ba nyén nwee, ngok i nkahal lond.”

41 I ngéda a bi pam bebee, a tehe tison, a kahal ee inyu yo, 42 a kal le: “Ibale i len ini, wemede mede u yimbe i mam ma nlona nsañ, ndi hanano ma sôli i mis moñ. 43 Inyule i dilo d’a lo, baoo boñ b’a oñ soso lipénd li mbiñ, ba kéña we, ba hék ki we* bipes gwobisôna. 44 B’a leñ we ni bon boñ bobasôna ’isi, b’a yék bé to ngok yada i kéhi i ngii ipe, inyule u bi yimbe bé ngéda u bé lama wéna.”

45 I mbus, a jôp i témpel, a bôdôl buñga bôt ba bé nuñul, 46 a kalak bo le: “I yé ntilga le: ‘Ndap yem y’a séblana le ndap masoohe,’ ndi bé ni nyilha yo hôk* i mintonba.”

47 A ke ni bisu i niiga hiki kel i témpel. Ndi baéga biprisi, ni bayimbén lôñni bañga bôt ba litén ba bé yéñ njel i nol nye; 48 ndi ba bi léba bé njel to yada i boñ hala, inyule litén jolisôna li bé waa bé kéña nye inyu emble nye.