Lukas

18 I mbus, a yôñôl bo hihéga inyu unda bo nseñ i soohe ngéda yosôna ibabé waa, 2 a kal le: “Nkéés wada a bé i tison yada, a bé kon bé Nyambe woñi, a bé ti bé to mut binam lipém. 3 Yik muda yada i bé mu tison i, i bé waa bé ke yak nkéés, i kalak nye le: ‘Boñ le me kôhna mbagi sép mu nkaa u yé ipôla me lôñni i mut di gwééna.’ 4 Inyu ngim ngéda, nkéés a bi top bé; ndi i mbus, a kalba le: ‘To hala kiki me nkon bé Nyambe woñi, me nti bé to mut binam lipém, 5 m’a boñ le i yik muda ini i bana mbagi sép inyu boñ le i lo ha bañ i tehe me inyu tééñga me ni jam a mbat.’”* 6 Ha nyen Nwet a bi kal le: “Emblana jam nkéés a nkal, to hala kiki a téé bé sép! 7 Ibabé pééna, baa Nyambe a’ pémés bé mbagi sép inyu mimpohlak nwé mi bôt mi mi nlôndôl nye juu ni njamuha, a hônbaga ki nwo? 8 Me nkal bé le, a ga pala pémhene nwo mbagi sép. Ndi ngéda Man mut a nlo, baa a’ koba yaga ntén hémle unu* hana ’isi?”

9 A yoñ ki hini hihéga hipe inyu bôt bahogi ba ba bé bôdôl telepsép yap ñem, ba tehge le bôt bape ba yé yañga: 10 “Bôt iba ba bi bet i témpel inyu soohe, wada a bé Farisai, nuu numpe a bé nkottas. 11 Farisai i telep, i bôdôl soohe haana ikété ñem wé: ‘A Nyambe, me nti we mayéga inyule me ta bé kiki bôt bape: Bôt ba ngadla, bôt ba téé bé sép, bôt ba ndéñg; me ta bé to kiki nkottas nunu. 12 Hiki sonde, me nsôga je* ngélé iba; hiki jam me nkôhna, me nti jôga jada ikété jôm.’ 13 Ndi nkottas a bi telep haa, a bé gwés bé to pa mis i béñge i ngii, ndi a bé bép tôl yé ibabé waa, a kalak le: ‘A Nyambe, kon me ngoo,* me yé mboñbéba.’ 14 Me nkal bé le, i mut nunu a bi témb i ndap yé, a bak mut telepsép iloo i Farisai ini. Inyule hiki mut a mbédés nyemede b’a wéha nye nyuu; ndi nu ni nu a nsuhus nyemede a’ bédhana.”

15 Ndi bôt ba bé lona nye bon bap batitigi inyu boñ le a tihba bo, ndi kiki banigil ba ntehe hala, ba bôdôl nyéyéi bo. 16 Ha nyen Yésu a bi sébél bon batitigi ipañ yé, a kal le: “Nwaha boñge batitigi ba lo i meeni, ni noode bañ to kéñ bo njel, inyule Ane Nyambe i yé inyu bôt ba yé kiki bo. 17 Me nkal bé maliga le, nu ni nu a nleege bé Ane Nyambe kiki mañge ntitigi, kekikel a’ jôp bé mukété.”

18 I mbus, ñane wada a bat nye le: “A loñge Malét, kii me nlama boñ inyu kôdôl niñ boga?” 19 Yésu a kal nye le: “Inyuki u nsébél me le loñge? Mut to wada a ta bé loñge, ndik Nyambe nyetama. 20 U nyi mambén: ‘U ke bañ i ndéñg, u nol bañ mut, u nip bañ, u bok bañ mbôgi bitembee, ti isoñ bo nyuñ lipém.’” 21 Mut a kal le: “Me bi tééda momasôna ibôdôl me mañge.” 22 Kiki a nok hala, Yésu a kal nye le: “Jam jada li ngi bédga we: Nuñul gwom gwobisôna u gwé, u ti diyeyeba i moni mi, ha nyen w’a bana nkus i ngii; i mbus, lo, u noñ me.” 23 Kiki mut nu a nok hala, hala a tééñga nye kiyaga inyule a bé ngwañ ngandak.

24 Yésu a nun nye, a kal le: “Hala a’ ba ndutu inyu bôt ba gwé moni i jôp i Ane Nyambe! 25 Ni maliga, hala a yé jam li ntomb le kamél i sooma i lituba li ndondok kôñôl, iloole ngwañ mut u jôp i Ane Nyambe.” 26 I bôt ba bi nok hala ba kal le: “Njee a nla ni kôhna tohi?” 27 A kal le: “I mam bôt ba binam ba nla bé boñ, Nyambe a nla boñ mo.” 28 Ndi Pétrô a kal le: “Nun-ki, di bi yék mam més, di noñ we.” 29 A kal bo le: “Me nkal bé maliga le, mut nye ki nye a ta bé, nu a bi yék to ndap, to nwaa, to lôkisañ, to bagwal, to bon inyu Ane Nyambe, 30 nu a’ kôhna bé i mam ma ngandak ngélé munu ngéda ini; ndi mu nkoñ ’isi u nlo,* a kôhna ki niñ boga.”

31 I mbus, a yoñ jôm ni iba botama ipañ, a kal bo le: “Nuna-ki, di yé i bet i Yérusalem, i mam momasôna bapôdôl ba bi tila inyu Man mut m’a yon.* 32 Kiki hihéga, b’a ti nye i moo ma bôt ba matén, ba nol nye hiol, ba sol nye, ba tjôle ki nye matai. 33 I ngéda ba mal bép nye, b’a nol nye; ndi i hilo hi nyônôs aa, a’ tuge.” 34 Ndi ba bi nok bé to jam munu mam mana, inyule i bibañga bini bi bé bi sôli inyu yap, ba bi nok bé to mam a bé kal.

35 Ndi kiki Yésu a bé tiige bebee ni Yérikô, mut ndim wada a bé a yii ipañ nloñ, a bé ki mut njagi. 36 Kiki a nok limut li ntagbe, a bôdôl bat kii i bé tagbe. 37 Ba añle nye le: “Yésu mut Nasaret nyen a yé i tagbe!” 38 Ha nyen a bi lond le: “A Yésu Man David, kon me ngoo!” 39 I bôt ba bé bôk i bisu ba bôdôl nyéyéi nye, ba kalak nye le a yén nwee, ndi nye a bé kônde ndik ki lond le: “A Man David, kon me ngoo!” 40 Ha nyen Yésu a bi telep, a ti oda le ba lona nye mut nu. I ngéda a bi kôôge bebee, Yésu a bat nye le: 41 “Kii u ngwés le me bôñôl we.” A timbhe le: “A Nwet, boñ le me témb me tehna.” 42 Jon Yésu a bi kal nye le: “Témb tehna; hémle yoñ i mélés kon woñ.” 43 I nlélém ngéda, a kahal tehna, a bôdôl ki noñ nye, a tinak Nyambe lipém. Kiki yak litén jôlisôna li ntehe hala, li ti Nyambe bibégés.